ENGLISH

04 އޭޕްރީލު 2025

Advertisement

ފަހުގެ އިންޒާރު ދިނުމަށްފަހު އިޒްރޭލު ސިފައިން އެއްގަމުން ޣައްޒާއަށް ވަދެގެންފި

20 މާރިޗު 2025

|

ހަސަން އާމިރު

އިޒްރޭލުގެ އުދުވާނުގައި ޣައްޒާ އިން ޝަހީދުވި ކުޑަ ކުއްޖެއްގެ ހަށިގަނޑު ގެންދަނީ. --ފޮޓޯ:ރޮއިޓާސް

ޙަމާސް ޖަމާޢަތުގެ ބެލުމުގެ ދަށުގައި ތިބި އަސީރުން މިނިވަންކުރުމުގެ އެންމެ ފަހުގެ އިންޒާރު ދިނުމަށްފަހު، އިޒްރޭލުގެ އިސްތިޢުމާރީ ފައުޖުގެ ސިފައިން ފަލަސްތީނުގެ ޣައްޒާއަށް އެއްގަމުން އަނެއްކާވެސް ވަދެގެންފިއެވެ.

ދެ ފަރާތުގެ ދެމެދުގައި މިދިޔަ ޖެނުއަރީ މަހު ޢަމަލުކުރަމުންދިޔަ ސުލްޙައިގެ އެއްބަސްވުން ބޮލާލައިޖަހާފައި، މިދިޔަ އަންގާރަ ދުވަހުން ފެށިގެން އިޒްރޭލުން ދަނީ ހުއްޓުމެއް ނެތި ޣައްޒާގެ އެކި ސަރަޙައްދުތަކަށް ބޮން އަޅަމުންނެވެ.

އެ ލާއިންސާނީ ޙަމަލާތަކުގައި މިހާތަނަށް 400 އަށް ވުރެ ގިނަ މީހުން ޝަހީދުވެފައިވާއިރު، އޭގެ ތެރޭގައި ގިނައީ އަންހެނުންނާ ކުޑަކުދިން ކަމަށް ޣައްޒާގެ ސިއްޙީ ވުޒާރާއިން ބުންޏެވެ.

އެއްގަމުން ޣައްޒާއަށް އަރައިގަތުމުގެ ކުރިން، އިއްޔެ ދިން ވައިގެ ޙަމަލާތަކުގައި އިތުރު 40 އެއްހާ މީހުން ވަނީ ޝަހީދުކޮށްލައިފައެވެ.

ޣައްޒާގެ އުތުރާއި ދެކުނުން އިޒްރޭލު ސިފައިން އެއްގަމުން ވަދެގަނެ، މިހާރު ވަނީ ދެ ފަޅި ވަކިވާ ގޮތަށް ސަފުތައް ރުކުރުވާލައިފައެވެ.

މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ. ނަމަވެސް އެއްބަސްވުމުގެ ދެވަނަ ފިޔަވަހި ފެށުމުގެ މަޝްވަރާތައް މިޞްރުގައި ފެށިނަމަވެސް، އެ މަޝްވަރާތަކުން މާބޮޑު ކުރިއެރުމެއް ނުލިބުނެވެ.

އެކަން އެހެން އޮއްވައި، އިޒްރޭލުން ވަނީ އެއްބަސްވުމުގެ ދެވަނަ ފިޔަވަހި ފެށުމުގެ ބައްދަލުވުމުގައި، ފުރަތަމަ ފިޔަވަހީގެ ދަށުން ޙަމަލާތައް ހުއްޓައިލުމުގެ އެއްބަސްވުން އިތުރުކުރަން ހުށަހަޅައިފައެވެ. މިގޮތުން، އިޒްރޭލުން ބޭނުންވީ ޢުދުވާން ހުއްޓާލުމުގެ އެއްބަސްވުމުގެ ފުރަތަމަ މަރުޙަލާ ކުރިން އެއްބަސްވެފައިވާ 42 ދުވަހަށް ވުރެ އިތުރުކޮށް، ރަމަޟާން މަސް ހިމެނޭހެން އިތުރު 42 ދުވަހަށް އެ މަރުޙަލާގެ މުއްދަތު އިތުރު ކުރާށެވެ.

ސުލްޙައިގެ އެއްބަސްވުމާ ޚިލާފަށް އިޒްރޭލުން ދެމުންދާ ޙަމަލާތަކުގެ ސަބަބުން، އަސީރުންގެ ފުރާނައަށް ވެސް ނުރައްކާވެފައިވާ ކަމަށް ޙަމާސްއިން ބުންޏެވެ.

ބައެއް މީޑިއާ ރިޕޯޓުތައް ބުނާ ގޮތުގައި، ޣައްޒާއަށް އަނެއްކާވެސް ޙަމަލާ ދޭން ފެށުމުގެ ކުރިން، އިޒްރޭލުން ވަނީ އެކަން އެމެރިކާއާ ޙިއްސާކޮށްފައެވެ.

ޙަމާސްގެ ބަލުމުގެ ދަށުގައި 58 އަސީރުން ތިބި ކަމަށް ބެލެވެއެވެ. ނަމަވެސް، އޭގެ ތެރެއިން ގިނަ މީހުން މަރުވެފައިވާކަމަށް އިޒްރޭލުން ލަފާކުރެއެވެ.

ކިޔުންތެރިންގެ ހިޔާލު