މީގެ 10 އަހަރު ކުރިން ގެއްލުނު މެލޭޝިޔަން އެއަރލައިންސްގެ މަތިންދާބޯޓު އެމްއެޗް370 ހޯދުމުގެ މަސައްކަތް އަލުން ފެށުމަށް މެލޭޝިޔާގެ ވަޒީރުންގެ މަޖިލީހުން ހުއްދަ ދީފިއެވެ.

މެލޭޝިޔާގެ ވެރިރަށް ކުއާލަ ލަމްޕޫރުން ޗައިނާގެ ވެރިރަށް ބެއިޖިންގަށް 239 ފަސިންޖަރުންނާއެކު ދަތުރުކުރި މެލޭޝިޔަން އެއަރލައިންސްގެ ފްލައިޓް އެމްއެޗް370 އަށް ވީނުވީއެއް ނޭނގި ގެއްލުނީ 2014 ވަނަ އަހަރުގެ މާޗް މަހުގެ 8 ވަނަ ދުވަހުއެވެ.

އެ ބޯޓު ހޯދުމަށްޓަކައި، އެތައް ޤައުމެއް ބައިވެރިވެގެން ދުނިޔޭގެ ތާރީޚުގައި މިހާތަނަށް ހިންގި އެންމެ ބޮޑު އޮޕަރޭޝަނަށް ފަހު ވެސް އެ ބޯޓު ފެނިފައެއް ނުވެއެވެ.

އެ ބޯޓު ހޯދުމުގެ އާ އޮޕަރޭޝަނެއް ފެށުމަށް ހަވާލުކުރާނީ މެރިޓައިމް އެކްސްޕްލޯރޭޝަން ކުންފުނި އޯޝަން އިންފިނިޓީ އާއެވެ.

މިގޮތުން، އިންޑިއާ ކަނޑުގެ ދެކުނުގެ 15،000 އަކަކިލޯމީޓަރުގެ އާ ސަރަޙައްދެއް އޯޝަން އިންފިނިޓީ ކުންފުނިން ބަލާނެ ކަމަށް ބުނެފައިވެއެވެ.

މި އެއްބަސްވުމުގެ ދަށުން 70 މިލިއަން ޑޮލަރު އޯޝަން އިންފިނިޓީއަށް ދޭންޖެހޭނީ ބޯޓު ފެނިއްޖެނަމަ ކަމަށް މެލޭޝިޔާގެ ޓްރާންސްޕޯރޓް މިނިސްޓަރ އެންތަނީ ލޯކޭ ވިދާޅުވިއެވެ.

އެ ކުންފުންނިން 2018 ވަނަ އަހަރުގެ ތެރޭގައި ވެސް ވަނީ އެ ބޯޓު ހޯދުމުގެ އޮޕަރޭޝަނެއް ހިންގައިފައެވެ.