އެމެރިކާއިން ހުށަހަޅާފައިވާ ގޮތަށް، ޔޫކްރޭނަށް ޙަމަލާދިނުން 30 ދުވަހުގެ މުއްދަތަށް ހުއްޓައިލުމަށް ރަޝިޔާގެ ރައީސް ވްލެޑިމިޔަރ ޕޫޓިން އެއްބަސްވެވަޑައިނުގަންނަވާނެކަން ރައީސް ޑޮނަލްޑް ޓްރަމްޕް އަރިހު ދަންނަވައިފިއެވެ.

އެމެރިކާ އާއި ޔޫކްރޭނުން ސައުދީ އަރަބިއްޔާގައި ކުރިއަށް ގެންދިޔަ މަޝްވަރާތަކަށްފަހު، އެމެރިކާއިން ހުށަހެޅި ގޮތަށް 30 ދުވަހަށް ޙަމަލާތައް ހުއްޓައިލަން ޔޫކްރޭނުން ވަނީ އެއްބަސްވެފައެވެ.

އެ ހުށަހެޅުމާ ގުޅޭގޮތުން ޓްރަމްޕް އާ ފޯނުން ކުރެއްވި މަޝްވަރާތަކަށްފަހު، ޕޫޓިން ވަނީ ޙަމަލާތައް ހުއްޓައިލަން އެއްބަސްވެވަޑައިނުގަންނަވާނެ ކަމަށް ވިދާޅުވެފައެވެ.

ޕޫޓިން ވިދާޅުވި ގޮތުގައި، ހުޅަނގު ޤައުމުތަކުން ޔޫކްރޭނަށް އަސްކަރީ އެހީ އަދި އިންޓެލިޖެންސް މަޢުލޫމާތު ފޯރުކޮށްދިނުން ހުއްޓައިނުލާނަމަ، ޙަމަލާތައް ހުއްޓައިލުމުގެ އެއްބަސްވުމެއް އެކަށީގެންވާ ގޮތެއްގައި ތަންފީޒެއް ނުކުރެވޭނެއެވެ.

ޙަމަލާތައް ހުއްޓައިނުލިޔަސް، ޔޫކްރޭނުގެ ހަކަތަ އުފައްދާ މަރުކަޒުތަކަށް އަމާޒުކޮށް ޙަމަލާދިނުން މަޑުޖައްސައިލަން ޕޫޓިން ވަނީ އެއްބަސްވެވަޑައިގެންފައެވެ.

ރަޝިޔާގެ ޙަމަލާތަކުގައި ޔޫކްރޭނުގެ ހަކަތަ އުފައްދާ މަރުކަޒުތަކުގެ 80 ޕަސަންޓު ހުއްޓުމަކަށް އައިސްފައިވާ ކަމަށް ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ މިދިޔަ ސެޕްޓެމްބަރު މަހުގެ ތެރޭގައި ވަނީ ވިދާޅުވެފައެވެ.