ފަލަސްތީނުގެ ޣައްޒާގައި ޙަމަލާތައް ހުއްޓައިލުމުގެ އެއްބަސްވުން ބޮލާލައި ޖަހާފައި، އިޒްރޭލުން ހުއްޓުމެއްނެތި ޣައްޒާއަށް ދެމުންދާ ވައިގެ ޙަމަލާތަކުގައި ޝަހީދުވި މީހުންގެ އަދަދު 400 އަށް ވުރެ މަތިވެއްޖެއެވެ.

ޣައްޒާގެ ސިއްޙީ ވުޒާރާއިން ބުނީ، ޝަހީދުވި މީހުންގެ ތެރޭގައި ގިނައީ އަންހެނުންނާއި ކުޑަކުދިން ކަމަށެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާންމުކުރި ވީޑިއޯ މެސެޖެއްގައި ބުނީ، ފާއިތުވި 24 ގަޑިއިރުގެ ތެރޭގައި އިޒްރޭލުގެ އަސްކަރީ ބާރު ޙަމާސްއަށް ރަނގަޅަށް އިޙްސާސް ކުރެވޭނެ ކަމަށެވެ.

އަދި ރޭ ދިން ވަރުގަދަ ޢުދުވާނުތަކަކީ ފެށުން ކަމަށާއި، ޙަމާސްގެ ބެލުމުގައި ބާކީ ތިބި އަސީރުން މިނިވަންކުރަންދެން ޢުދުވާނުތައް ކުރިއަށްދާނެ ކަމަށް ޔަހޫދީންގެ ވެރިޔާ ބުންޏެވެ.

ބައެއް މީޑިއާ ރިޕޯޓުތައް ބުނާ ގޮތުގައި، ޣައްޒާއަށް އަނެއްކާވެސް ޙަމަލާ ދޭން ފެށުމުގެ ކުރިން، އިޒްރޭލުން ވަނީ އެކަން އެމެރިކާއާ ޙިއްސާކޮށްފައެވެ.

މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ. ނަމަވެސް އެއްބަސްވުމުގެ ދެވަނަ ފިޔަވަހި ފެށުމުގެ މަޝްވަރާތައް މިޞްރުގައި ފެށިނަމަވެސް، އެ މަޝްވަރާތަކުން މާބޮޑު ކުރިއެރުމެއް ނުލިބުނެވެ.

އެކަން އެހެން އޮއްވައި، އިޒްރޭލުން ވަނީ އެއްބަސްވުމުގެ ދެވަނަ ފިޔަވަހި ފެށުމުގެ ބައްދަލުވުމުގައި، ފުރަތަމަ ފިޔަވަހީގެ ދަށުން ޙަމަލާތައް ހުއްޓައިލުމުގެ އެއްބަސްވުން އިތުރުކުރަން ހުށަހަޅައިފައެވެ. މިގޮތުން، އިޒްރޭލުން ބޭނުންވީ ޢުދުވާން ހުއްޓާލުމުގެ އެއްބަސްވުމުގެ ފުރަތަމަ މަރުޙަލާ ކުރިން އެއްބަސްވެފައިވާ 42 ދުވަހަށް ވުރެ އިތުރުކޮށް، ރަމަޟާން މަސް ހިމެނޭހެން އިތުރު 42 ދުވަހަށް އެ މަރުޙަލާގެ މުއްދަތު އިތުރު ކުރާށެވެ.

ސުލްޙައިގެ އެއްބަސްވުމާ ޚިލާފަށް އިޒްރޭލުން ދެމުންދާ ޙަމަލާތަކުގެ ސަބަބުން، އަސީރުންގެ ފުރާނައަށް ވެސް ނުރައްކާވެފައިވާ ކަމަށް ޙަމާސްއިން ބުންޏެވެ.