ޔަމަނުގައި ހަރަކާތްތެރިވާ ހަނގުރާމަވެރި ހޫތީ ޖަމާޢަތުން ރަތް ކަނޑުގައި ދޭ ކޮންމެ ޙަމަލާއަކަށް އީރާނު ޒިންމާކުރުވާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފިއެވެ.

"މި ވަގުތު ފެށިގެން، ހޫތީންގެ ކޮންމެ ހަތިޔާރަކުން ނުކުންނަ ކޮންމެ ޙަމަލާއަކީ، އީރާނާއި އީރާނުގެ ވެރިންގެ ހަތިޔާރުން ނުކުންނަ ޙަމަލާއެއް ކަމަށް ބަލާނަން. އަދި އެކަމުގައި އީރާނު ޒިންމާ ކުރުވައި، އަގު އަދާކުރަންޖެހޭނެ،" ޓްރަމްޕް ވިދާޅުވިއެވެ.

ހޫތީންގެ ޙަމަލާތަކުގައި ބައިވެރިވުމެއް އޮތް ކަމަށް ވިދާޅުވެ، ޓްރަމްޕް ކުރައްވާ ތުހުމަތުތަކުގައި އެއްވެސް އަސާސެއް ނެތް ކަމަށް އީރާނުން ވަނީ ބުނެފައެވެ.

އީރާނުން ވާގިވެރިވާ ހޫތީންނާ ދެކޮޅަށް އެމެރިކާއިން ވަނީ ވަރުގަދަ އަސްކަރީ އޮޕަރޭޝަނެއް ފަށައިފައެވެ.

މި އޮޕަރޭޝަން ފެށީ، ރަތްކަނޑު ހުރަސްކޮށް ދަތުރުކުރާ އެމެރިކާ އަދި ރަހުމަތްތެރި ޤައުމުތަކުގެ އުޅަނދުތަކަށް ހޫތީން ޙަމަލާ ދެމުންދާތީ ކަމަށް ޓްރަމްޕް ވަނީ ވިދާޅުވެފައެވެ.

އެމެރިކާގެ ޙަމަލާތަކުގައި މިހާތަނަށް 53 މީހަކު މަރުވެ، 98 މީހަކު ޒަޚަމްވެފައިވާ ކަމަށް ހޫތީން ވަނީ ބުނެފައެވެ.

އޭގެ ރައްދުގައި، ހޫތީން ވަނީ އެމެރިކާގެ އަސްކަރީ މަތިންދާބޯޓު އުފުލާ އަސްކަރީ އުޅަނދުތަކަށް ޙަމަލާތައް އަމާޒުކޮށްފައެވެ.

ނަމަވެސް، އެ ޙަމަލާތަކުގައި މާބޮޑު ގެއްލުމެއް ނުލިބޭކަމަށް އެމެރިކާއިން ވަނީ ބުނެފައެވެ.

އިޒްރޭލުން ޣައްޒާއަށް 2023 ވަނަ އަހަރުގެ އޮކްޓޯބަރު މަހު ޙަމަލާތައް ދޭން ފެށުމާއެކު، އެ ޢުދުވާނުގެ ރައްދުގައި ހޫތީން ވަނީ ރަތް ކަނޑު ހުރަސްކޮށް ދަތުރު ކުރާ އާގުބޯޓުފަހަރަށް އަމާޒުކޮށް ޙަމަލާތަކެއް ދީފައެވެ. މިގޮތުން މިހާތަނަށް 190 އަށް ވުރެ ގިނަ އުޅަނދަށް ޙަމަލާދީފައިވާއިރު، އިޒްރޭލަށް އަމާޒުކޮށް ނުރައްކާތެރި ވައިގެ ޙަމަލާތަކެއް ވެސް ދީފައިވެއެވެ.