ފަލަސްތީނުގެ ޣައްޒާގައި ޙަމަލާތައް ހުއްޓައިލުމުގެ އެއްބަސްވުން ބޮލާލައި ޖަހާފައި، އިޒްރޭލުން ހުއްޓުމެއް ނެތި ޣައްޒާއަށް ވައިގެ ޙަމަލާތައް ދެމުންދާއިރު، މިހާތަނަށް 120 މީހުން ޝަހީދުވެފައިވާ ކަމަށް ފަލަސްތީނުގެ ދިފާޢީ ވުޒާރާއިން ބުނެފިއެވެ.

އިޒްރޭލުން ޣައްޒާއަށް އަނެއްކާވެސް ޙަމަލާދީފައިވަނީ، ޙަމަލާތައް ހުއްޓައިލުމުގެ އެއްބަސްވުމަކަށް ޢަމަލުކުރަމުން ދަނިކޮށެވެ.

މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން، ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.

އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ. ނަމަވެސް އެއްބަސްވުމުގެ ދެވަނަ ފިޔަވަހި ފެށުމުގެ މަޝްވަރާތައް މިޞްރުގައި ފެށިނަމަވެސް، އެ މަޝްވަރާތަކުން މާބޮޑު ކުރިއެރުމެއް ނުލިބުނެވެ.

އެކަން އެހެން އޮއްވައި، އިޒްރޭލުން ވަނީ އެއްބަސްވުމުގެ ދެވަނަ ފިޔަވަހި ފެށުމުގެ ބައްދަލުވުމުގައި، ފުރަތަމަ ފިޔަވަހީގެ ދަށުން ޙަމަލާތައް ހުއްޓައިލުމުގެ އެއްބަސްވުން އިތުރުކުރަން ހުށަހަޅައިފައެވެ. މިގޮތުން، އިޒްރޭލުން ބޭނުންވީ ޢުދުވާން ހުއްޓާލުމުގެ އެއްބަސްވުމުގެ ފުރަތަމަ މަރުޙަލާ ކުރިން އެއްބަސްވެފައިވާ 42 ދުވަހަށް ވުރެ އިތުރުކޮށް، ރަމަޟާން މަސް ހިމެނޭހެން އިތުރު 42 ދުވަހަށް އެ މަރުޙަލާގެ މުއްދަތު އިތުރު ކުރާށެވެ.

އަދި ދެވަނަ ފިޔަވަހި ނުފަށައި، ޙަމާސްގެ ބެލުމުގެ ދަށުގައި ބާކީތިބި އަސީރުން މިނިވަން ކުރަން މަޖުބޫރު ކުރުވަން، ޔަހޫދީންގެ ވެރިޔާ ބެންޖަމިން ނަތަންޔާހޫގެ އެންގުމަށް ޣައްޒާއަށް ޙަމަލާދިނުން ވަނީ ވަރުގަދަކޮށްފައެވެ.

އަދި ވައިގެ ޙަމަލާތަކުގެ އިތުރުން އިޒްރޭލުގެ އަސްކަރިއްޔާއިން ޣައްޒާއަށް އަލުން ވަދެގަންނާނެ ކަމުގެ އިންޒާރު ވެސް އިޒްރޭލުގެ ސަރުކާރުގެ ތެރެއިން ދަނީ އިވެމުންނެވެ.

ސުލްޙައިގެ އެއްބަސްވުމާ ޚިލާފަށް އިޒްރޭލުން ދެމުންދާ ޙަމަލާތަކުގެ ސަބަބުން، އަސީރުންގެ ފުރާނައަށް ވެސް ނުރައްކާވެފައިވާ ކަމަށް ޙަމާސްއިން ބުންޏެވެ.