އާދިއްތަ ދުވަހު ލިވަރޕޫލް ބަލި ކުރުމަށްފަހު ނިއުކާސެލް ޔުނައިޓެޑް އުފުލާލި ކަރަބާއޯ ކަޕަކީ، ފާއިތުވެދިޔަ 70 އަހަރުގައި އެޓީމު ކާމިޔާބުކުރި ފުރަތަމަ ތައްޓެވެ. އަދި މިތަށި އެޓީމަށް ކަމިޔާބުކޮށްދިން ކޯޗު އެޑީ ހައު އަކީ މިދިޔަ 17 އަހަރުގެ ތެރޭގައި ބޮޑު ތައްޓެއް ކާމިޔާބު ކުރެވުނު ފުރަތަމަ އިނގިރޭސި ކޯޗެވެ. މިކާމިޔާބީއާ ހަމަޔަށް ވާސިލްވާން އެޑީ ކޮށްފައިވަނީ ވަރަށްވެސް އުނދަގޫ ދަތުރެކެވެ.

އެޑީ ހައު އުމުރުން 30 އަހަރުގައި ކަކުލުގެ ދާއިމީ އަނިޔާއެއްގެ ސަބަބުން ފުޓްބޯޅަ ކުޅުން ހުއްޓާލަން ޖެހުނެވެ. ދެހާސް ހަވަނަ އަހަރު، އޭނާ އެންމެ ފުރަތަމަ ކޯޗެއްގެ ގޮތުގައި އިރުޝާދު ދީފައިވަނީ ރިޓެޔާވިއިރު ކުޅެމުންދިޔަ ކުލަބު ކަމަށްވާ ބޯންމައުތުގެ ޒުވާން ޓީމަށެވެ. އަދި އޭގެ ފަހުން 2008 ވަނަ އަހަރު އޭނާ އައްޔަންކުރެވުނީ ފުރަތަމަ ޓީމުގެ މެނޭޖަރުގެ މަގާމަށެވެ.

ބޯންމައުތަކީ އޭރު އިނގިރޭސި ފުރަތަމަ ޑިވިޝަނުގައި ކުޅޭ ޓީމެއް ނޫނެވެ. އެޓީމަކީ އޭރު އިނގިރޭސި ހަތަރުވަނަ ޑިވިޝަނުގައި ވެސް ރެލިގޭޝަނާ ހަނގުރާމަކުރަމުންދާ ޓީމެކެވެ. އަދި މާލީ ދަތިތަކުގެ ސަބަބުން އޭރުވަނީ ބޯންމައުތު ނެތިދާނެކަމުގެ ބިރުހީވެފައެވެ. އެޑީގެ މެނޭޖަރުކަމުގެ ކެރިއަރުގެ ކުރީކޮޅު، އޭނާއަށް ކޯޗެއްގެ ގޮތުގައި އެންމެ ރަނގަޅަށް މަސައްކަތްކުރާނެ ފުރުސަތެއް ނުލިބުނެވެ. ސަބަބަކީ އޭރު އޭނާ ހުރީ ކޯޗިންގ ސްޓާފެއް، ސްކައުޓިން ޓީމަކާވެސް ނުލާ އެކަންޏެވެ. ޓީމުގެ މާލީ ހާލަތު ދަށްވުމުން ކުޅުންތެރިންގެ އެންމެ އަސާސީ ކަންކަން ކުރުމަށްވެސް މެނޭޖުމެންޓުން ވަނީ ނުކުޅެދިފައެވެ. އެހެން ކަމުން އެޑީ ދިޔައީ ބައެއްފަހަރު އަމިއްލަ ޖީބުން ޚަރަދުކޮށްގެން ކުޅުންތެރިންގެ ފިޒިއޮތެރަޕީ ފަދަ ކަންކަން ކޮށްދެމުންނެވެ.

ކަންތައްތައް މިކަހަލަ ގޮތަށް ހުރުމުގެ ސަބަބުން، އޭރު އޭނާގެ ހުރިހާ ވިސްނުމެއްވެސް ހުރީ ޖެހިގެން އަންނަ މެޗުން އެންމެ ޕޮއިންޓެއް ނަމަވެސް ހޯދުމާއި، ލީގުގައި ދެމިހުރުމާއި، ބޯންމަތު ސަލާމަތްކުރުމަށެވެ. އެހިސާބުން އޭނާގެ "ސަވައިވަލް" ފަލްސަފާ އުފަންވިއެވެ. މިއީ އޭނާގެ މަސައްކަތުގެ އުސޫލުތަކުގައި ފާޅުކަން ބޮޑު ގޮތެއްގައި ފެންނަން ހުރި ސިފައެކެވެ. އޭނާގެ ހުރިހާ ކަމެއްގެ ފެށުމަކީ ، އެއްވެސްކަހަލަ ވަސީލަތެއް ނެތި ކޯޗިންގ ކެރިޔަރު ފެށުމެވެ. އޭނާގެ މަސައްކަތުން ދެއަހަރު ދުވަސްތެރޭ ބޯންމައުތު 4 ވަނަ ޑިވިޝަނުން 3 ވަނަ ޑިޝަނަށް ކޮލިފައިވިއެވެ.

ދެހާސް އެގާރަ ވަނަ އަހަރު އެޑީ، ބޯންމައުތުގެ ކޯޗުކަމުން ވަކިވެ ދެވަނަ ޑިވިޝަނުގެ ކުލަބު ބާންލޭއާ ގުޅުނެވެ. ނަމަވެސް 2012 ވަނަ އަހަރު ދެވަނަ ފަހަރަށް ބޯންމައުތުގެ ކޯޗުކަމާ އެޑީ ހަވާލުވިއެވެ. އެޔަށްފަހު ތިން އަހަރު ދުވަހުގެ ބުރަ މަސައްކަތުން 2015 ވަނަ އަހަރު އެޑީގެ މާލިމީކަމުގައި ބޯންމައުތު އިނގިރޭސި ފުރަތަމަ ޑިވިޝަނަށް ކޮލިފައި ވިއެވެ. ކާމިޔާބު ދުވަސްތަކެއް ބޯންމައުތުގައި ހޭދަކުރުމަށްފަހު އެޑީ 2021 ވަނަ އަހަރު ނިއުކާސެލް ޔުނައިޓެޑުގެ ކޯޗުމަކާ ހަވާލުވިއެވެ.

އެ ކްލަބާ ހަވާލުވިއިރު ރެލިގޭޝަންގަަައި އޮތް ނިއުކާސެލް ޔުނައިޓެޑުގެ ތާރީޚު، އެޑީ ވަނީ އެންމެ ހަތަރު އަހަރުތެރޭ ބަދަލު ކޮށްލާފައެވެ. ރެލިގޭޝަަނުން ޓީމު ސަލާމަތްކުރުމަށްފަހު، ދިގު ޒަމާންތަކަަށްފަހު އެޓީމަށް ޔޫރަޕުގެ އެންމެ ޝަރަފުވެރި މުބާރާތް ކަމަށްވާ ޔުއެފާ ޗެމްޕިއަންސް ލީގުގައި ކުޅުމުގެ ފުރުސަތު ހޯދައިދީ، އަދި ދާދިފަހުން ލިވަރޕޫލް ބަލިކޮށް ކަރަބާއޯ ކަޕު ކާމިޔާބުކޮށް، 1955 ވަނަ އަހަރުގެ ފަހުން ތައްޓެއް ކާމިޔާބުކޮށް، ނިއުކާސެލްގެ އެތަކެއްހާސް ސަޕޯޓަރުންގެ ހުވަފެން އެޑީވަނީ 70 އަހަރަށްފަހު ހަގީގަތަކަށް ހަދައިދީފައެވެ.

އެޑީ ހައު ދިރިއުޅުމުން ކެތްތެރިކަމާއި ހިތްވަރުގަދަކަން ރަމްޒުވާ ކިތަންމެ ކަމެއް ފާހަގަ ކުރެވޭނެއެވެ. ކިތަންމެ ގިނަ ގޮންޖެހުމަކާ ކުރިމަތިލާން ޖެހުނަސް މާޔޫސްނުވެ ހިތްވަރާއެކު މަސައްކަތް ކުރުމުން ކާމިޔާބީއަށް ވާސިލު ވެވޭނެކަން އެޑީގެ ކާމިޔާބީން ހެކިދެއެވެ.