ނޮވެމްބަރު 11 އަކީ ކޮން ދުވަހެއްތޯ އަހައިފި ނަމަ، އެއީ ޖުމްހޫރީ ދުވަސްކަން ގިނަ ބަޔަކަށް އެނގެއެވެ. އެކަމަކު ހިތާމައަކީ، އަޅުގަނޑުމެންގެ ތެރެއިން ބައެއް ޒުވާނުންނަށް މި ދުވަހުގެ މުހިންމުކަން ނޭނގޭ ކަމެވެ. ގިނަ ޒުވާނުންނަށް މި ދުވަހަކީ ބަންދު ދުވަހެއްކަން އެނގުނަސް، މި ދުވަސް ބަންދުވަނީ ކޮން މުނާސަބަތަކާ ގުޅިގެންކަން ނޭނގުމަކީ ހިތާމަހުރި ކަމެކެވެ.

ޤައުމުގެ ޚާއްޞަ ދުވަސްތަކާއި ތާރީޚާ ގުޅިފައިވާ ދުވަސްތައް މިއަދުގެ ޒުވާނުންނަށް ނޭނގޭ ނަމަ، ކުރިއަށް އޮތް ތަނުގައި މި ދުވަސްތަކަކީ ކޮބައިކަން އެނގޭ މީހުން މި ޤައުމުގައި މަދުވުން އެކަށީގެންވެއެވެ. އެކަމަކު ތާރީޚު އިލްމުވެރިން ބުނާ ގޮތުގައި، ތާރީޚު ނޭނގުމަކީ ތާރީޚެއް ނެތުމެއް ނޫނެވެ.

ދިވެހި ރާއްޖޭގެ ތާރީޚުން ދެ ޖުމްހޫރިއްޔަތެއް ފެންނަން އެބައޮތެވެ. އަޅުގަނޑުމެން ފާހަގަކުރަމުން މިދާ ޖުމްހޫރީ ދުވަހަކީ ރާއްޖެއަށް ދެވަނަ ޖުމްހޫރިއްޔަތު އައި ދުވަހެވެ. 

ދިވެހިރާއްޖެ ދުށް ހުރިހާ ރައީސުން ވެސް ޤައުމާއި ދީނަށް ޓަކައި ކަންތައްތަކެއް ކޮށްދެއްވާފައި އެބަހުއްޓެވެ. އެކަމަކު އަޅުގަނޑުމެންނަށް ފެންނަނީ އަބަދުވެސް އެ ރައީސުންގެ އުނި ސިފަތައް ބަޔަކު ފާހަގަކުރަން އުޅޭ މަންޒަރެވެ. އެ ރައީސުންނަށް ނުވެފައި އޮތް ކަމެއްގެ ވާހަކަ ދައްކާ މަންޒަރެވެ.

ތެދެއްމެ، އެއްވެސް މީހަކީ ފުރިހަމަ މީހެއް ނޫނެވެ. ދިވެހި ރާއްޖޭގެ ރައީސްކަން ކުރެއްވި ބޭފުޅުންނަކީ ވެސް އެންމެ ފުރިހަމަ ބޭފުޅުންނެކޭ އަޅުގަނޑު ނުބުނަމެވެ. އެކަމަކު 55 ވަނަ ޖުމްހޫރީ ދުވަސް އަޅުގަނޑުމެން ފާހަގަކުރަމުންދާއިރު، ދިވެހި ރާއްޖެ ދުށް ޖުމްހޫރީ ރައީސުންގެ ޒިކުރާ މިއަދު އަޅުގަނޑުމެން އާކުރަމާ ހިނގާށެވެ. އެ ރައީސުންގެ އަގު ވަޒަންކޮށް އެ ރައީސުންނަށް ޝުކުރުވެރިވަމާ ހިނގާށެވެ. ސިޔާސީ ދެކޮޅުވެރިކަން ދޫކޮށްލާ ޤައުމީ ލޯބިން އަތާއި އަތް ގުޅުވާލަމާ ފެހި، ރަތް އަދި ހުދުން އަޅުގަނޑުމެންގެ ޤައުމު ޒީނަތްތެރިވެފައި މިވާ ދުވަހުގައި އަޅުގަނޑުމެން އަރައިރުންވުން ހުއްޓާލަމާތޯއެވެ.

މިއަދު އަޅުގަނޑުމެން އެ ނަމޫނާ ނުދައްކައިފި ނަމަ، ފަހުގެ ޖީލުތަކުން ފެންނާނީ ވިޔާނުދާ ޢަމަލުތަކެވެ.

އަބަދުވެސް އެމީހެއްގެ ޕާޓީ ރަނގަޅުވެ، ޤައުމަށް އެހެން ޕާޓީއެއްގެ ލީޑަރަކު ކޮށްދޭ ކަމެއް ނުފެންނަ ގޮތަށް ވެއްޖެނަމަ، އުފެދިގެންދާނީ ސިޔާސީ ޕާޓީތައް ދެކެ ލޯބިވާ ޒުވާނުންތަކެކެވެ. ޤައުމު ދެކެ ލޯބިވާ ޒުވާނުންނެއް ނޫނެވެ. މިއީ އަޅުގަނޑުމެން ވިސްނާލަންޖެހޭ ކަމެކެވެ.

އަޅުގަނޑުމެންގެ ޤައުމުގެ މުސްތަޤްބަލަކީ މިއަދުގެ ޒުވާނުންނެވެ. އެހެންކަމުން، އަޅުގަނޑުމެން އެންމެން މަސައްކަތް ކުރަންޖެހޭނީ ޤައުމީ ރޫޙު އާލާކުރުމަށް. ޖުމްހޫރީ ދުވަހުގެ މާނަ އާއި މުހިންމުކަން ޒުވާނުންނަށް އޮޅުންފިލުވައިދިނުމަށެވެ. އަޅުގަނޑުމެންގެ ތާރީޚާއި ސަޤާފަތް ދިރުވައި އާލާކުރުމަށެވެ.

އަޅުގަނޑުމެންގެ ކުރީގެ ރައީސުންނާއި ވެރިންގެ ހެޔޮ ޢަމަލުތަކާއި ޤައުމަށް ކޮށްދެއްވާފައިވާ ޚިދުމަތްތައް ފާހަގަކޮށް، އެ ބޭފުޅުންގެ ހަނދާން އާކުރުމަކީ  މުހިންމު ކަމެކެވެ. މިއީ އަޅުގަނޑުމެންގެ ތާރީޚީ މުއްސަނދިކަން ދަމަހައްޓާނެ ގޮތެވެ.

މިއަދަކީ އަޅުގަނޑުމެން އެންމެން އެއް ސަފެއްގައި ތިބެ، ޤައުމީ އެއްބައިވަންތަކަން ދައްކުވައިދޭންވީ ދުވަހެވެ. ސިޔާސީ ތަފާތުތައް އެއްކިބާކޮށް، ދިވެހި ދައުލަތުގެ ދިދައިގެ ދަށުގައި އެއްބައިވެ، ޤައުމީ ލޯބި އާލާކުރަމާ ހިނގާށެވެ. ޖުމްހޫރީ ދުވަހުގެ ހެޔޮ އެދުންތަކާއެކު، ދިވެހި ޤައުމަށް އަބަދުމެ ކުރިއެރުމާއި ފާގަތިކަން ލިބިގެންދާނެ ކަމުގެ އުންމީދު އަބަދުވެސް އާލާކުރަމާ ހިނގާށެވެ.