މި ސީޒަނުގައި ޕީއެސްޖީން އަމާޒުހިފާފައިވާ ލަނޑު ދަނޑިތަކާ ގުޅޭގޮތުން ވާހަކަދައްކަން ފަސްނުޖެހޭނެ ކަމަށާއި، އެ ޓީމުން ބޭނުންވަނީ ހުރިހާ މުބާރާތެއްގެ ޓްރޮފީ ކާމިޔާބުކުރަން ކަމުގައި ކޯޗު، ލުއިސް އެންރީކޭ ބުނެފިއެވެ.

އެންރީކޭ މިހެން ބުނީ، ފްރެންޗް ލީގުގައި ރޭ ވާދަވެރި އޮލިމްޕިކް މާސޭ އަތުން މޮޅުވި މެޗަށްފަހު ބޭއްވި ނޫސްވެރިންގެ ބައްދަލުވުމުގައެވެ. ޕީއެސްޖީން ރޭގެ މެޗު ކާމިޔާބުކޮށް، ތާވަލްގެ ކުރީގައި 19 ޕޮއިންޓުގެ ލީޑެއް ނަގައި، ޗެމްޕިއަންކަން ހޯދުމާ ގާތަށް ވަނީ ޖެހިލައިފައެވެ. އެ ޓީމު ވަނީ ޔުއެފާ ޗެމްޕިއަންސް ލީގުގެ ދެވަނަ ބުރުގައި ވަރުގަދަ ލިވަޕޫލް ބަލިކުރުމަށްފަހު، ކުއާޓާ ފައިނަލަށް ދަތުރުކޮށްފައެވެ. އަދި، ފްރެންޗް ކަޕްގެ ސެމީ ފައިނަލުން ޖާގަ ހޯދާފައިވާއިރު، އަންނަ ޖޫން މަހު ފަށާ ފީފާ ކްލަބް ވޯލްޑް ކަޕްގައި ވެސް އެ ޓީމު ވާދަކުރާނެ އެވެ.

"މިއީ އަހަރެމެންނަށް ވަރަށް ފާހަގަކޮށްލެވޭ ހަފްތާއެއް. 'ކްލަސިކް' މެޗަކަށްފަހު ކުޅުންތެރިންނަށް އަބަދުވެސް ފޯރި ނަގާނެ،" އެންރީކޭ ބުންޏެވެ.

އެންރީކޭ ބުނީ، ރޭގެ މެޗަކީ އޭނާގެ ޓީމުގެ ފަރާތުން ފެނިގެންދިޔަ ރީތި މެޗެއް ކަމަށެވެ.

ލިވަޕޫލާ ދެކޮޅަށް ކުޅުނު އުނދަގޫ މެޗަކަށްފަހު، މާސޭއާ ދެކޮޅަށް ވެސް ވަރަށް ފުރިހަމަ ކުޅުމެއް އޭނާގެ ކުޅުންތެރިން ދައްކުވައިދީފައިވާ ކަމަށް އެންރީކޭ ވަނީ ބުނެފައެވެ.

އެންރީކޭ ވަނީ، ޕީއެސްޖީއާ މެދު ވަރަށް އުފާވާ ކަމަށާއި، ޚާއްސަކޮށް އެ ޓީމުގެ ސަޕޯޓަރުންގެ ފަރާތުން ލިބެމުން އަންނަ އެހީތެރިކަމާމެދު ވެސް ހިތްހަމަޖެހޭކަން ފާހަގަކޮށްފައެވެ.

"އަހަރެމެންގެ އަމާޒަކީ ފްރެންޗް ލީގު ހިމެނޭ ގޮތަށް ހުރިހާ މުބާރާތެއް ކާމިޔާބުކުރުން. އެއީ އުއްމީދަކީ،" އެންރީކޭ ބުންޏެވެ.

ނިންމާލަމުން އެންރީކޭ ބުނީ، އޭނާގެ ޓީމުގެ ކުރިމަތީގައި އޮތް ޗެލެންޖާ މެދު ފަރުވާތެރިވެ، ބޭނުންވާ އަމާޒަށް ވާސިލްވުމަށް ކޮންމެ ދުވަހަކުވެސް ބުރަކޮށް މަސައްކަތްކުރަމުން ދާ ކަމަށެވެ.

ޕީއެސްޖީ އަށް ދެން އެންމެ އަވަހަށް އޮތީ މި މަހުގެ 29 ވަނަ ދުވަހު ލީގުގައި ސެއިންޓް އެޓިއެންއާ ދެކޮޅަށް ކުޅެން ޖެހޭ މެޗެވެ.