ނިއުކާސްލް ޔުނައިޓެޑްއިން ލިވަރޕޫލްއާ ދެކޮޅަށް ކުޅުނު ތާރީޚީ މެޗުން މޮޅުވުމަށްފަހު، މިހާރު އެ ކްލަބުގައި ނުކުޅޭ ކުޅުންތެރިއަކަށް ކަރަބާއޯ ކަޕްގެ މެޑަލެއް ދޭން ނިންމައިފިއެވެ. ނިއުކާސެލްއިން ވެމްބްލީގައި ލިވަރޕޫލްއާ ދެކޮޅަށް ކުޅުނު ކަރަބާއޯ ކަޕްގެ ފައިނަލް މެޗުން މޮޅުވީ 2-1 އިންނެވެ. ޑޭން ބާން އާއި އެލެކްސަންޑަރ އިސާކްގެ ގޯލުތަކުން ނިއުކާސަލް ވަނީ 70 އަހަރު ފަހުން ފުރަތަމަ ބޮޑު މުބާރާތެއް ކާމިޔާބުކޮށް، ކުރިއަށް އޮތް ސީޒަނުގައި ޔޫރަޕިއަން ފުޓްބޯޅަ ކުޅުމުގެ ފުރުސަތު ހޯދާފައެވެ.

މެޗަށްފަހު ކުޅުންތެރިންނަށް މެޑަލް ދެމުން ދިޔައިރު ނިއުކާސެލްގެ ސަޕޯޓަރުން ދިޔައީ ތަރުހީބުގެ އަޑުތަކުން ދަނޑު ގުގުމާލަމުންނެވެ. މެޗަށްފަހު ކުރީގެ ނިއުކާސްލްގެ ކުޅުންތެރިއަކަށް ވެސް މެޑަލެއް ލިބޭނެކަމަށް ވަނީ ހާމަވެފައެވެ.

މިގުއެލް އަލްމިރޯން: ޖެނުއަރީގަ އެހެން ކުލަބަކަށް ބަދަލު ވުމުގެ ކުރިން އޭނާ ނިއުކާސެލްއަށް 6 އަހަރު ކުޅެފަވޭ--ފޮޓޯ/ގެޓީ އިމޭޖްސް

އީއެސްޕީއެންގެ އެސޯސިއޭޝަން އެޑިޓަރ ރޮބާޓޯ ރޯޖަސް ބުނާ ގޮތުގައި މިގުއެލް އަލްމިރޯންއަށް މެޑަލެއް ލިބޭނެއެވެ. އެއީ 6 އަހަރު ފަހުން ޖަނަވަރީ މަހު އެމްއެލްއެސްގެ އެޓްލާންޓާ ޔުނައިޓެޑްއަށް އެނބުރި ދިޔަ ނަމަވެސް، އޭނާ ވަކިވުމުގެ ކުރިން ކަރަބާއޯ ކަޕްގެ 4 މެޗެއްގައި ޖުމްލަ 178 މިނެޓު ކުޅެފައިވާތީއެވެ. އޭގެ ތެރޭގައި އާސެނަލްއާ ދެކޮޅަށް ސެމީ ފައިނަލްގެ ފުރަތަމަ ލެގްގައި ކުޅުނު މެޗު ހިމެނެއެވެ.

އެކްސްގައި ރޯޖަސް ބުނެފައިވަނީ މިގުއެލް އަލްމިރޯން ވިންޓަރ ޓްރާންސްފަރ ވިންޑޯގައި އެޓްލާންޓާ ޔުނައިޓެޑްއަށް ދިޔަ ނަމަވެސް، ނިއުކާސްލް ޔުނައިޓެޑްއިން ލިވަރޕޫލްއަތުން މޮޅުވުމުން އީއެފްއެލް ކަޕް މެޑަލެއް ލިބޭނެކަމަށެވެ. މި ސީޒަނުގައި 4 މެޗު ކުޅުނު ކަމަށްޓަކައި، އަލްމިރޯންއަށް އިނގިރޭސި ފުޓްބޯޅައިން ލިބޭ ފުރަތަމަ އަދި ހަމައެކަނި މެޑަލް ލިބޭނެކަމަށް ރޯޖަސް ފާހަގަކޮށްފައިވެއެވެ.

ކުޅުންތެރިން ވަކިވުމަށްފަހު މެޑަލް ލިބުމަކީ ފުޓްބޯޅައިގައި އާންމު ކަމެކެވެ. އެއީ ގިނަ ފަހަރު ކްލަބްތަކަށް ވަކި އަދަދެއްގެ މެޑަލް ދެވި، އެ މެޑަލްތައް ބޭނުން ގޮތަކަށް ބެހުމުގެ ފުރުސަތު ދޭތީއެވެ. އަލްމިރޯން ނިއުކާސްލްގައި ހޭދަކުރި މުއްދަތުގައި 30 ގޯލު ޖަހާފައިވެއެވެ.