ވެރިކަން ކުރުމަކީ ވަރަށް ބޮޑު މަސްއޫލިއްޔަތެއް ކަމަށާ އަދި ވަރަށް ބޮޑު ޒިންމާއެއްކަން ފާހަގަ ކުރައްވައި އެމަނިކުފާން ދިވެހި ރައްޔިތުންނަށް ވެރިކަން ކުރައްވަމުން ގެންދަވާއިރު ގައިޑަކަށް ބައްލަވަނީ ބައްޕާފުޅު ފަޟީލަތުއް ޝައިހް ހުސެއިން އަބްދުއްރަހްމާން ލިއުއްވާފައިވާ ފޮތުގައި ބަޔާން ކުރައްވާފައިވާ އަދުލް އިންސާފާއި ހަމަހަމަކަމާ އެކު ރައްޔިތުން އިސްކުރައްވައި، ރައްޔިތުންގެ ފަޅީގައި ހުންނެވުން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ޖުމްހޫރީ ދުވަހުގެ މުނާސަބަތުގައި ރައީސް ރޭ ދެއްކެވި ވާހަކަފުޅުގައި ވަނީ ވެރިކަމާއި ރައްޔިތުންނާއި ވެރިންނާ އޮންނަ ގުޅުމާއި ވެރިންގެ މަސްއޫލިއްޔަތު އަދާކުރަން ޖެހޭ ގޮތުގެ މައްޗަށް ދީނީ އަދި އިލްމީ ނަޒަރަކުން ބައްޕާފުޅު ލިޔުއްވި ފޮތް "ދައުލަތުގެ ވެރިންނާއި މަސްއޫލިއްޔަތު އަދި ކިޔަމަންވުމުގެ މަފްހޫމް" ގެ ބައެއް ބައިތަކަށް އަލި އަޅުއްވާލައްވައިފަ އެވެ. 

"ވެރިކަމަކީ މާބޮޑު މޮޅެއް ނޫން. އެއީ މާބޮޑު މުދާ ގަނޑެއް ވެސް ނޫން. އެއާ ހިލާފަށް ވެރިކަމަކީ ވަރުގަދަ ޒިންމާއެއް. ވަރުގަދަ މަސްއޫލިއްޔަތެއް. އަދި ހަމަ ވަރަށް ބޮޑު އަމާނާތެއް،" ރާއްޖޭގެ މަޝްހޫރު ދީނީ އިލްމުވެރިޔާ މަރްހޫމް ހުސައިން އަބްދުއްރަހުމާނުގެ ފޮތް ދައްކަވާލައްވަމުން ރައީސް ވިދާޅުވި އެވެ. 

ރޭގެ ޖަލްސާގައި ބައްޕާފުޅުގެ ފޮތުގެ ބައެއް ބައިތަކަށް ރައީސް އަލިއަޅުއްވާލައްވަނީ. --ފޮޓޯ: ރައީސް އޮފީސް

ރައީސް ވިދާޅުވީ ޖުމްހޫރީ ދުވަހުގެ ތަގްރީރުގައި އެ ފޮތުން މިސާލު ނެންގެވީ އެއީ ބައްޕާފުޅުގެ ފޮތަކަށް ވެގެން ނޫން ކަމަށާއި ނަމަވެސް އެއީ ވެރިކަން ހިންގުމާ ގުޅޭ ގޮތުން އިލްމީ އަދި ދީނީ ގޮތުން ވެސް މުހިންމު މައުލޫމާތުތަކެއް ހިމެނިފައިވާ ފޮތަކަށްވާތީ ކަމަށެވެ. ގާނޫނީ ގޮތުން ވެރިކަން ކުރުމުގެ ބައިތަކާއި ވެރިޔާގެ ޒިންމާތަކާއި ދައުލަތުގެ ބާރާއި، ގާނޫނު ހެދުމުގެ ބާރާއި އަދުލު އިންސާފުގެ ބާރާއި ނޫސްވެރިކަމުގެ ބާރާ ގުޅޭ މުހިއްމު ވާހަކަތަކެއް ހިމެނޭ ގޮތަށް އެއީ ވެރިކަން ކުރުމުގައި ވަށާޖެހޭ ގޮތަށް ލިޔުއްވާފައިވާ ފޮތެއް ކަމަށް ރައީސް ވިދާޅުވި އެވެ. 

ފޮތާ ހަވާލާ ދެއްވައި ރައީސް ވިދާޅުވީ ގައުމުގެ ހަގީގީ ވެރިންނަކީ ރައްޔިތުން ކަމަށެވެ. 

"ވަލިއްޔުލްއަމުރު ނުވަތަ ރައީސުއްދައުލާއަކީ ވަކި މުއްދަތަކަށް ރައްޔިތުން އެބައިމީހުން މަސްލަހަތުތައް ބަލަހައްޓައި ހިންގުމަށް ހަވާލުކޮށްފައިވާ ހަވާލްދާރެކެވެ. ވަކީލެކެވެ. އަދި ޚާދިމެއްމެއެވެ. އެކަން އޭނާގެ ހުރިހާ އަމަލަކާއި މުއާމަލާތަކުން ފެންނަންވާނެ އެވެ. އަދި އޭނާގެ މަސްއޫލިއްޔަތު އަދާކުރުމުގައި ކޮންމެހެން ހުންނަން ޖެހޭ ކަންތައްތައް ފިޔަވައި އެއްވެސް ހާލެއްގައި ރައްޔިތުންގެ މައްޗަށް އޭނާގެ ނަފްސު އުފުލައި ހައިބަތާއި ޖާހުގެ ބޮޑުކަން އެކިއެކި މަޒާހިރުތަކުން ދައްކައި އެމީހުން ނިކަމެތިކޮށް އަޅުދާސްކޮށްގެން ނުވާނެއެވެ. އެއީ ކުރަން ހެޔޮ ނުވާނެ ކަމެކެވެ. އަދި ގައުމުގެ ސިޔާދަތު ލިބިގެންވާ ހަގީގީ ވެރިފަރާތް ކަމުގައިވާ ރައްޔިތުން އެކަމަށް ރުހި ތިބެގެން ވެސް ނުވާނެއެވެ،" ފޮތާ ހަވާލައި ދެއްވައި ރައީސް ވިދާޅުވި އެވެ.

ރައީސް ވިދާޅުވީ މިދިޔަ 51 ހަފުތާ އާއި ދެ ދުވަހު މަސައްކަތް ކުރެއްވީ ބައްޕާފުޅުގެ އެ މުހިންމު ފޮތް ގައިޑަކަށް ބައްލަވައިގެން ކަމަށެވެ.