ކުރިއަށް އޮތް ޓްރާންސްފަރ ވިންޑޯއަށް ދާއިރު ލިވަރޕޫލްގެ އިތުބާރު ޑިފެންޑަރު އިބްރާހިމް ކޮނާޓޭ އެޓީމުގައި މަޑުރާނެ ކަމުގެ ޔަގީންކަމެއް ނެތެވެ. ފުޓުބޯޅައިގެ ހަބަރުތައް ގެނެސްދޭ "ޑިފެންސާ ސެންޓްރަލްގެ" ރިޕޯޓެއްގައި ބުނެފައިވާ ގޮތުން، ކޮނާޓޭގެ އެއްބަސްވުން އާކުރުމާމެދު އަދިވެސް ލިވަރޕޫލުން ކުރާ މަސައްކަތްތަކަށް އަލިމަގެއް ނުފެނެއެވެ. އެއްބަސް ވުމަކަށް ނާދެވިއްޖެނަމަ ކޮނާޓޭ ދޫކޮށްލަން ލިވަރޕޫލުން އޮތީ ތައްޔާރަށެވެ.

ކޮނާޓޭއަކީ ލިވަރޕޫލްގެ ދިފާއުގައި މުހިންމު ދައުރެއް އަދާކުރާ ކުޅުންތެރިއަކަށް ވީނަމަވެސް، މި އަންނަ ހޫނުމޫސުމުގައި އޭނާއަށް 50 މިލިއަން ޕައުންޑާ ގާތްކުރާ ހުށަހެޅުމެއް ލިބިއްޖެނަމަ، ކްލަބުން އެކަމާމެދު ވިސްނާނެއެވެ. ކުޅުންތެރިޔާގެ އެއްބަސްވުމުގެ ހާލަތާއި، މަޝްވަރާތައް ހުއްޓުމަކަށް އައުމުގެ ފުރުސަތު އޮތުމާއެކު، އެކަށީގެންވާ ހުށަހެޅުމެއް ލިބިއްޖެނަމަ ކްލަބުން އޭނާ ދޫކޮށްލުމާމެދު އިންކާރު ކުރާނެ މަންޒަރެއް ނުފެނެއެވެ.

ކޮނާޓޭ ގޯލެއް ޖެހުމަށްފަހު އުފާފާޅު ކުރަނީ--ފޮޓޯ/ގެޓީ އިމޭޖްސް

25 އަހަރުގެ، ކޮނާޓޭއަކީ ލިވަރޕޫލްއާ ގުޅުނީއްސުރެވެސް އޭނާގެ ހުނަރުން، އެއީ ކުޅަދާނަ ޑިފެންޑަރެއްކަން ސާބިތުކޮށްދީފައިވާ ކުޅުންތެރިއެކެވެ. ޕްރިމިއަރ ލީގާއި ބައިނަލްއަޤްވާމީ މުބާރާތް ތަކުގައި އޭނާ ދައްކާފައިވާ ހުނަރުން ޔޫރަޕުގެ އެންމެ ބޮޑެތި ކްލަބުތަކުގެ ސަމާލުކަންވަނީ ހޯދާފައެވެ.

މި ކުޅުންތެރިޔާއަށް އެންމެ ޝައުޤުވެރިވާ ޓީމުތަކުގެ ތެރޭގައި ސްޕެއިންގެ ރިއަލްމެޑްރިޑާއި ފްރާންސްގެ ޕީއެސްޖީ ފާހަގަކޮށްލެވެއެވެ. މި ދެ ކްލަބުންވެސް އޭނާގެ ހާލަތު ގާތުން ބަލަމުންދެއެވެ. ފާއިތުވި މޫސުންތަކުގައި މުހިންމު ކުޅުންތެރިން ދޫކޮށްލުމަށްފަހު، ޑިފެންސް ވަރުގަދަކުރުމަށް މަސައްކަތްކުރާ ރިއަލް މެޑްރިޑްއިން ކޮނާޓޭ އަކީ އެންމެ އެކަށޭނަ ކުޅުންތެރިއެއް ކަމުގައި ދެކެއެވެ. އަދި ހަމައެހެންމެ، އަލުން އޮނިގަނޑު ބައްޓަންކުރަމުންދާ ޕީއެސްޖީއިން ވެސް އެ ކްލަބުގެ ޑިފެންސް ހަރުދަނާކުރުމަށް ޒުވާން، ފެންވަރު ރަނގަޅު ކުޅުންތެރިން ހޯދުމަށް މަސައްކަތްކުރެއެވެ.

ލިވަރޕޫލްއިން މި ކުޅުންތެރިޔާގެ މުސްތަޤްބަލާ ގުޅޭގޮތުން ވަކި ނިންމުމެއް ނިންމާފައި ނުވިނަމަވެސް، ކޮނާޓޭގެ އެއްބަސްވުން އާކުރުމަކީ ލިވަރޕޫލްއިން އިސްކަންދޭ ކަމެއްކަން ފާހަގަކުރެވެއެވެ. ނަމަވެސް، މަޝްވަރާތައް އުންމީދުކުރާ ގޮތަށް ކުރިއަށް ނުދާނަމަ، ކުރިއަށް އޮތް ހޫނުމޫސުމުގެ މާކެޓުގައި ޔޫރަޕުގެ ބޮޑެތި ކްލަބުތަކުން ކުރެ ކްލަބަކުން އޭނާގެ ސޮއި ހޯދުމަށް މަގުފަހިވެދާނެއެވެ.

މިކަމުގެ ސަބަބުން، ކުރިއަށް އޮތް މަސްތަކުގައި މި ޓްރާންސްފަރ އަކީ އެންމެ ގިނައިން މަޝްވަރާކުރެވޭ ޓްރާންސްފަރތަކުގެ ތެރެއިން އެއް ޓްރާންސްފަރ ކަމުގައި ވެދާނެއެވެ.