ENGLISH

04 އޭޕްރީލު 2025

Advertisement

ހަމަނުޖެހުމެއްގެ ތެރެއަށް ދެކުނު ކޮރެޔާ ވެއްޓުމުގެ ކުރިން، ރައީސް ޔޫން އަޒުލުކުރި މައްސަލައިގައި ގޮތެއް ނިންމަން ކޯޓަށް ގޮވާލައިފި

17 މާރިޗު 2025

|

ހަސަން އާމިރު

ދެކުނު ކޮރެއާގައި ކުއްލި ޙާލަތު އިޢުލާނު ކުރެއްވި މައްސަލާގައި، ރައީސްކަމުގެ މަޤާމުން އަޒުލުކޮށްފައިވާ ޔޫން ސުކް ޔެއޯލް މަޤާމުގައި ދެމިހުންނެވުމާ މެދު ގޮތެއް ކަނޑައެޅުން އަވަސްކުރަން އިދިކޮޅު ފަރާތްތަކުން އެ ޤައުމުގެ ދުސްތޫރީ ކޯޓަށް ގޮވާލައިފިއެވެ.

ކުއްލި ޙާލަތު ޔޫން އިޢުލާނު ކުރެއްވި މައްސަލާގައި، ޤާނޫނު ހަދާ މަޖިލީހުގެ އަޣުލަބިއްޔަތުން އެ މަނިކުފާނުގެ މައްޗަށް އިތުބާރު ނެތް ކަމަށް ފާސްކުރީ މިދިޔަ ޑިސެމްބަރު މަހުގެ 13 ވަނަ ދުވަހުއެވެ.

ދެކުނު ކޮރެޔާގެ ޤާނޫނުއަސާސީގެ ދަށުން ރައީސްކަމުން އަޒުލުކުރިޔަސް، އެކަމާ މެދު ފަހު ބަސް ބުނާނީ ދެކުނު ކޮރެޔާގެ ދުސްތޫރީ ކޯޓުންނެވެ.

މިގޮތުން، މި މަހުގެ މެދެއްހާ ތަނުގައި ހުކުމް ކުރާނެ ކަމަށް ބެލެވިފައި އޮތަސް، ކޯޓުން އަދިވެސް މި މައްސަލައިގައި ގޮތެއް ނުނިންމައެވެ. މިއީ، ދެކުނު ކޮރެޔާގެ ތާރީޚުގައި ދުސްތޫރީ ކޯޓުން ގޮތެއް ކަނޑަނާޅައި އެންމެ ގިނަ ދުވަސް ހޭދަވާ މައްސަލައެވެ.

އެއާއެކު ދެކުނު ކޮރެޔާގެ އެކި ހިސާބުތަކުގައި މިހާރު ވެސް ދަނީ ހަމަނުޖެހުންތައް ހިނގަމުންނެވެ.

އެގޮތުން، މިދިޔަ ހަފްތާ ބަންދުގައި ވެސް ޔޫން މަޤާމުން ދުރުކުރުމަށް ގޮވާލައި، ލައްކައަކަށް ވުރެ ގިނަ މީހުން ވަނީ މަގުތަކަށް ނުކުމެ މުޒާހަރާކޮށްފައެވެ.

އޭގެ ރައްދުގައި ޔޫންގެ ގިނަ އަދަދެއްގެ ސަޕޯޓަރުން ވެސް ވަނީ ނުކުމެ، އެ މަނިކުފާނުގެ ދިފާޢުގައި އަޑުއުފުލައިފައެވެ.

އިދިކޮޅުން ބުނީ، ޔޫންގެ މުސްތަޤުބަލާ މެދު ގޮތެއް ކަނޑަނޭޅި ދިގުލައިގެން ދިޔުމުގެ ސަބަބުން މުޅި ޤައުމުގެ ކެތްތެރިކަން ކޮޅުންލާފައިވާ ކަމަށެވެ. އަދި މިކަމުގެ ސަބަބުން ނުތަނަސްވަކަން އިތުރުވެ، ބޮޑު ހަމަނުޖެހުމެއްގެ ތެރެއަށް ޤައުމު ވެއްޓިގެން ދިޔުމުގެ ބިރު ހީވެފައިވާ ކަމަށް ވެސް އިދިކޮޅުން ބުންޏެވެ.

އެހެންކަމުން، ކޯޓުން ވެސް ޒިންމާދާރުކަން އިސްކޮށް، މި މައްސަލަ އަވަހަށް ނިންމައިދިނުމަށް އިދިކޮޅުން ވަނީ ގޮވާލައިފައެވެ.

ކިޔުންތެރިންގެ ހިޔާލު