ޔޫކްރޭނާ ދެކޮޅަށް ކުރަމުންދާ ހަނގުރާމައިގައި ޙަމަލާތައް ހުއްޓައިލުމާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕާއި ރަޝިޔާގެ ރައީސް ވްލެޑިމިޔަރ ޕޫޓިން މި ހަފްތާގެ ތެރޭގައި މަޝްވަރާ ކުރައްވާނެ ކަމަށް އެމެރިކާ ސަރުކާރުގެ އޮފިޝަލުން ވިދާޅުވެއްޖެއެވެ.

އެމެރިކާ އާއި ޔޫކްރޭނުން ސައުދީ އަރަބިއްޔާގައި ކުރިއަށް ގެންދިޔަ މަޝްވަރާތަކަށްފަހު، އެމެރިކާއިން ހުށަހެޅި ގޮތަށް 30 ދުވަހަށް ޙަމަލާތައް ހުއްޓައިލަން ޔޫކްރޭނުން ވަނީ އެއްބަސްވެފައެވެ.

އަދި އެ ހުށަހެޅުމާއެކު ޓްރަމްޕްގެ ޙާއްސަ މަންދޫބު ސްޓީވް ވިޓްކޯފް ވަނީ ރަޝިޔާއަށް ވަޑައިގެން ޕޫޓިންއާ ބައްދަލުކުރައްވައިފައެވެ.

އޭގެ ފަހުން އެ ހުށަހެޅުމަށް އެއްބަސްވުމަށް އެމެރިކާއިން ދަނީ ރަޝިޔާއަށް ބާރުއަޅަމުންނެވެ.

ނަމަވެސް، ޙަމަލާތައް ހުއްޓައިލަންޖެހޭ ކަމަށް ޤަބޫލުކުރެއްވިޔަސް، އެ ހުށަހެޅުމުގެ އަސާސާމެދު ސުވާލު އުފައްދަވައި، ވަރުގަދަ ޝަރުތުތަކެއް ޕޫޓިން ވަނީ ކުރިމަތި ކުރައްވައިފައެވެ.

"ޙަމަލާތައް ހުއްޓައިލުމުގެ ވިސްނުން ރަނގަޅު. އެކަމަށް އަޅުގަނޑުމެން ތާއީދު. އެކަމަކު ބައެއް ކަންކަމާ ގުޅޭގޮތުން އެބަޖެހޭ މަޝްވަރާކޮށް، އަޅުގަނޑުމެންގެ ހުރި ބައެއް ސުވާލުތަކަށް ޖަވާބު ހޯދަން،" ޙަމަލާތައް ހުއްޓައިލުމުގެ އެއްބަސްވުމާ ގުޅޭގޮތުން ޕޫޓިން ނޫސްވެރިންނަށް ވިދާޅުވިއެވެ.

ޕޫޓިން ވިދާޅުވި ގޮތުގައި، ޙަމަލާތައް ހުއްޓައިލުމުގެ އެއްބަސްވުމަކަށް ދާއިމީކޮށް ހަނގުރާމަ ހުއްޓައިލުމާ ހަމައަށް ދެވެންވާނެއެވެ.

"އަދި މި ހަނގުރާމަ ފެށުމުގެ މުގުލުގައި އޮތް މައްސަލައަށް ޙައްލެއް ލިބެންޖެހޭނެ،" ޕޫޓިން ވިދާޅުވިއެވެ.

ޕޫޓިން އެހެން ވިދާޅުވެފައިވީ ނަމަވެސް، ޓްރަމްޕްއާ އެކު މި ހަފްތާގައި ކުރެވޭ މަޝްވަރާތަކުން "ރަނގަޅު" ނަތީޖާއެއް ނެރެވޭނެ ކަމަށް ޤަބޫލުކުރައްވާ ކަމަށް ވިޓްކޯފް ވިދާޅުވިއެވެ.

ނަމަވެސް، ޕޫޓިންގެ ޝަރުތުތަކާބެހޭ ގޮތުން އޭނާ ވެސް އެއްޗެއް ވިދާޅެއްނުވެއެވެ.