ބައްޕާފުޅު އައްޝައިޚް ހުސައިން އަބްދުއްރަހުމާނުގެ މުހިންމު ބަސްފުޅަކާ އެކު ރާއްޖޭގެ 55 ވަނަ ޖުމްހޫރީ ދުވަހުގެ ތަހުނިޔާ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދިވެހި އެންމެހާ ލޮބުވެތި ރައްޔިތުންނަށް އަރިސްކުރައްވައިފިއެވެ. 

ރައީސްގެ ބައްޕާފުޅު ލިޔުއްވާފައިވާ "ދައުލަތުގެ ވެރިންނާއި މަސްއޫލިއްޔަތު އަދި ކިޔަމަންވުމުގެ މަފްހޫމް" ފޮތުގައި ބަޔާންކޮށްފައިވާ ގޮތުން "ހެޔޮ ގޮތުގައި ކުރެވޭ ވެރިކަމަކީ، ރައްޔިތުންގެ މަޞްލަޙަތުތައް ރަނގަޅަށް ބަލަހައްޓައި، ޤާނޫނީ ގޮތުންނާއި އިންސާނިއްޔަތުގެ ގޮތުން ފުރިހަމަ ޒިންމާ އުފުލައި، ރައްޔިތުންގެ ހެވާއި ލާބައަށްޓަކައި ތެދުވެރިކަމާއި އަމާނާތްތެރިކަމާއިއެކު ރައްޔިތުންގެ ފަރާތުން ކުރާ ރައްޔިތުންގެ ވެރިކަމެކެވެ."

ރައީސް މުޢިއްޒުގެ މެސެޖުގައި ވަނީ މިބަސްކޮޅު ހިމަނުއްވައި ދިވިހި ހުރިހާ ލޮބުވެތި ރައްޔިތުންނަށް ދުވަހުގެ ތަޙްނިޔާ ވިދާޅުވެފައެވެ.

ޖުމްހޫރީ ދުވަހުގެ މުނާސަބަތުގައި ރޭ ދަރުބާރުގޭގައި ބޭއްވި ރަސްމީ ޖަލްސާގައި ވެސް ރައީސް ވަނީ ވެރިކަން ހިންގުމާ ގުޅޭ ގޮތުން ބައްޕާފުޅު ލިޔުއްވާފައިވާ ފޮތުގެ ބައެއް ބައިތަކަށް އަލި އަޅުއްވާލައްވައިފަ އެވެ.