ENGLISH

04 އޭޕްރީލު 2025

Advertisement

ޓޮރޭސްގެ ދެ ލަނޑާއެކު، ބާސާ އަލުން އެއްވަނަ އަށް

17 މާރިޗު 2025

|

މުޙައްމަދު އަދުހަމް

ބާސެލޯނާއާ އެތުލެޓިކޯ ބައްދަލުކުރި މެޗުގެ ތެރެއިން. --ފޮޓޯ: ރޮއިޓާސް

ފަހަތުން އަރައި އެތުލެޓިކޯ މެޑްރިޑް 4-2 އިން ބަލިކޮށް، ބާސެލޯނާ، އަލުން ސްޕެނިޝް ލީގު ތާވަލްގެ އެއްވަނަ އަށް ޖެހިލައިފިއެވެ.

މި މޮޅާއެކު، ބާސެލޯނާ އެއްވަނައިގައި އޮތީ 27 މެޗުން 60 ޕޮއިންޓް ހަމަކޮށްގެންނެވެ. އެއް މެޗު އިތުރަށް ކުޅެގެން ދެވަނައިގައި އޮތް ރެއާލް މެޑްރިޑަށް ވެސް އެ އަދަދަށް ޕޮއިންޓް ލިބިފައިވާއިރު، ބާސެލޯނާ އަށް ކުރި ލިބެނީ ގޯލްގެ ތަފާތުންނެވެ. އެތުލެޓިކޯ ތިންވަނައިގައި އޮތީ 56 ޕޮއިންޓާއެކު އެވެ.

އެތުލެޓިކޯގެ ދަނޑުގައި ކުޅުނު މެޗުގައި އެ ޓީމުން ލީޑު ނެގީ ފުރަތަމަ ހާފު ނިމެންދަނިކޮށް، ހޫލިއަން އަލްވަރޭޒް ކާމިޔާބުކުރި ގޯލުންނެވެ. އޭގެފަހުން، ދެވަނަ ހާފުގައި އަލެކްސެންޑާ ސޯލޯތުގެ ގޯލުން އެތުލެޓިކޯ އިން ދެ ލަނޑުގެ ލީޑެއް ނެގިއެވެ.

އޭގެ މާގިނައިރުތަކެއް ނުވަނީސް، ޕޮލެންޑްގެ ފޯވާޑް، ރޮބަޓް ލެވަންޑޯސްކީގެ ގޯލުން ބާސެލޯނާ ފަރަގު ކުޑަކުރިއެވެ. އަދި، އޭގެފަހުން، ފަހު ހާފުގައި ކުޅެން ނުކުތް ފެރާން ޓޮރޭސްގެ ގޯލުން ބާސެލޯނާ އެއްވަރުކޮށްފައިވަނިކޮށް، އިތުރު ވަގުތުގެ ތެރޭގައި ލަމީން ޔަމާލް އާއި ޓޮރޭސް އިތުރު ގޯލެއް ޖަހައި މުހިއްމު މޮޅެއް ކަށަވަރުކޮށްދިނެވެ.

މެޗަށްފަހު ވާހަކަ ދައްކަމުން ބާސެލޯނާގެ ކޯޗު، ހަންސީ ފްލިކް ބުނީ، އޭނާ ހުރީ ވަރަށް އުފަލުން ކަމަށާއި، ޓީމާ މެދު ފަޚުރުވެރިވާ ކަމަށެވެ.

އޭނާގެ ޓީމުން ގޮތްދޫނުކުރާ ކަމަށާއި، މި މެޗުން ލިބުނު ތިން ޕޮއިންޓާއެކު އެއްވަނަ އަށް އެރުމުން ވަރަށް ބޮޑަށް އުފާވާ ކަމަށް ވެސް ފްލިކް ވަނީ ބުނެފައެވެ.

ކިޔުންތެރިންގެ ހިޔާލު