ސަޢުދީ ޢަރަބިއްޔާގައި ބާއްވާ އެކްސްޓްރާ އޯޑިނަރީ ޖޮއިންޓް އަރަބް-އިސްލާމިކް ސަމިޓް އެންޑް އޯގަނައިޒޭޝަން އޮފް އިސްލާމިކް ކޯޕަރޭޝަން ސަމިޓުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މިއަދު މެންދުރުގެ ވަގުތެއްގައި ތަޤުރީރު ކުރައްވާނެ ކަމަށް ރައީސް އޮފީހުން ވިދާޅުވެއްޖެ އެވެ.

ރައީސް މުޢިއްޒު ސަޢުދީ ޢަރަބިއްޔާއަށް ވަޑައިގަތުމުން، ކިންގް ޚާލިދް އިންޓަރނޭޝަނަލް އެއަރޕޯޓުން އެމަނިކުފާނަށް މަރުހަބާ ދެންނެވީ ރިޔާޟު ރީޖަންގެ ޑެޕިއުޓީ ގަވަރުނަރު ޕްރިންސް މުޙައްމަދު ބިން ޢަބްދުލްރަޙްމާން ބިން ޢަބްދުލްޢަޒީޒެވެ.

މިއީ ސަޢުދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒްގެ ދަޢުވަތަކަށް ކުރައްވާ ދަތުރުފުޅެކެވެ. 

މި ސަމިޓުގައި އިސްރާއީލުގެ އިސްތިޢުމާރީ ބާރުތަކުން ފަލަސްޠީނާއި ލުބްނާނަށް ދެމުންދާ ހަމަލާތަކާއި، ސަރަޙައްދީ ޙުތޫރަތްތެރި މައްސަލަތަކާމެދު ސަރަޙައްދީ އިސްވެރިން ކުރައްވާ މަޝްވަރާގައި ރައީސުލްޖުމްހޫރިއްޔާ ބައިވެރިވެވަޑައިގަންނަވާނެއެވެ. މި މަޝްވަރާތައް ބިނާކުރައްވާނީ 2023 ވަނަ އަހަރުގެ ނޮވެމްބަރު މަހުގެ 11 ވަނަ ދުވަހު ސަޢުދީ ޢަރަބިއްޔާގެ ރިޔާޟުގައި ނިންމި ޖޮއިންޓް ޢަރަބް-އިސްލާމިކް ސަމިޓުގެ ނިންމުންތަކުގެ މައްޗަށެވެ.

މި ދަތުރުފުޅަށް ފަހު ރައީސް މުޢިއްޒު ވަޑައިގަންނަވާނީ ކޮޕް ސަމިޓުގައި ބައިވެރިވެވަޑައިގަތުމަށް އަޒަރުބައިޖާނަށެވެ.