އިޓާލިއަން ލީގުގައި ކުޅުނު މެޗުގައި ވެނެޒިއާއާ 0-0 އިން އެއްވަރުވެ، ނަޕޯލީން މިރޭ ތާވަލްގެ އެއްވަނަ އަށް ޖެހިލަން ލިބުނު ފުރުޞަތު ނަގާލައިފިއެވެ.

މި ނަތީޖާއާއެކު، ނަޕޯލީ އުޅެނީ ދެވަނައިގައެވެ. އެ ޓީމަށް 29 މެޗުން ލިބިފައިވަނީ 61 ޕޮއިންޓެވެ. އެއްވަނައިގައި އުޅޭ އިންޓަރ މިލާނަށް ވެސް މި އަދަދަށް ޕޮއިންޓް ލިބިފައިވާއިރު، އެ ޓީމަށް ބާކީ މެޗެއް އެބައޮތެވެ. ތިންވަނައިގައި އޮތް އެޓަލާންޓާ އަށް ލިބިފައިވަނީ 58 ޕޮއިންޓެވެ.

ވެނެޒިއާގެ ދަނޑުގައި ކުޅުނު މެޗު ފެށިގެން ދެ ޓީމަށް ވެސް ލަނޑު ޖަހާނެ ރަނގަޅު ފުރުޞަތުތައް ލިބި ވަނީ ބޭކާރުވެފައެވެ. އެގޮތުން، ނަޕޯލީގެ ފޯވާޑް، ޖިއަކޮމޯ ރަސްޕަޑޯރީ ފޮނުވާލި ބޯޅައެއް ގޯލްގެ ދަނޑިއަށް އަމާޒުވެފައިވާއިރު، ވެނެޒިއާގެ ޑެނިއެލް ފިލާ ފޮނުވާލި ހަމަލާ ނަޕޯލީގެ ކީޕަރު، އަލެކްސް މެރެޓް ވަނީ ހުއްޓުވައިފައެވެ.

ނަޕޯލީގެ ކުޅުންތެރިން ފޮނުވާލި ގިނަ ހަމަލާތަކެއް ވެނެޒިއާގެ ކީޕަރު، އިއޮނަޓް ރަޑޫ މަތަކުރިއިރު، އެ ޓީމުގެ ކުޅުންތެރިއަކު ފޮނުވާލި ބޯޅައެއް ނަޕޯލީގެ ޑިފެންޑަރު، އާމިރު ރަހްމާނީ ވަނީ ގޯލްގެ ރޮނގުމަތިން ސަލާމަތްކޮށްފައެވެ.

ލީގުގައި އެންމެ ފަހުން 2022 ވަނަ އަހަރުގެ ޑިސެންބަރު މަހު މެޗަކުން މޮޅުވި ވެނެޒިއާ އަދިވެސް އުޅެނީ ފުލުން ދެވަނައިގައެވެ. އެ ޓީމަށް ލިބިފައިވަނީ 20 ޕޮއިންޓެވެ.

މި މުބާރާތުގައި މިރޭ ކުޅުނު އަނެއް މެޗުގައި ބޮލޯނިއާ އިން ވަނީ 0-5 ގެ ތަފާތު ބޮޑު ނަތީޖާއަކުން ލާޒިއޯ ބަލިކޮށްފައެވެ.