ENGLISH
04 އޭޕްރީލު 2025
ޗެލްސީ އަތުން އާސެނަލަށް ހަނި މޮޅެއް
16 މާރިޗު 2025
|
ޗެލްސީ ކޮޅަށް ލަނޑުޖެހުމަށްފަހު އާސެނަލްގެ ކުޅުންތެރިން އުފާ ފާޅުކުރަނީ. --ފޮޓޯ: ރޮއިޓާސް
އެންމެ މަޤްބޫލު
އިނގިރޭސި ޕްރިމިއަރ ލީގުގައި މިރޭ ކުޅުނު 'ލަންޑަން ޑާބީ' ގައި ޗެލްސީގެ މައްޗަށް 0-1 އިން އާސެނަލް ކުރިހޯދައިފިއެވެ.
މި މޮޅާއެކު، އާސެނަލް އަދިވެސް އުޅެނީ ދެވަނައިގައެވެ. އެ ޓީމަށް 29 މެޗުން 58 ޕޮއިންޓް ލިބިފައިވާއިރު، އެންމެ ކުރީގައި އުޅޭ ލިވަޕޫލާ ދެމެދު 12 ޕޮއިންޓްގެ ފަރަގެއް އެބައޮތެވެ. ލިވަޕޫލް އެއްވަނައިގައި އޮތީ 70 ޕޮއިންޓާއެކު އެވެ. ތިންވަނައިގައި އޮތް ނޮޓިންގހަމް ފޮރެސްޓަށް 54 ޕޮއިންޓް ލިބިފައިވާއިރު، ފަސް ޕޮއިންޓް ފަހަތުން ޗެލްސީ އޮތީ ހަތަރު ވަނައިގައެވެ.
ޗެލްސީން މި މެޗަށް ނުކުތްއިރު އަނިޔާގެ ސަބަބުން އެ ޓީމުގެ އިނގިރޭސި މިޑްފީލްޑަރު، ކޯލް ޕާމާ ނުކުޅެއެވެ. މީގެއިތުރުން، އެ ޓީމުގައި މި ވަގުތު އަނިޔާގައި ތިބި ކުޅުންތެރިންގެ ތެރޭގައި ފޯވާޑް، ނިކޮލަސް ޖެކްސަން ހިމެނެއެވެ. އާސެނަލްގެ އަނިޔާގެ ލިސްޓުގައި ތިބި ކުޅުންތެރިންގެ ތެރޭގައި، ބުކާޔޯ ސަކާ، ކައި ހަވާޓްޒް އާއި ގެބްރިއެލް ޖެސޫސް ހިމެނެއެވެ.
އެމިރޭޓްސް ސްޓޭޑިއަމްގައި ކުޅުނު މެޗުގައި ފެނިގެންދިޔަ ހަމައެކަނި ލަނޑު، ފުރަތަމަ ހާފުގެ 20 ވަނަ މިނެޓުގައި އާސެނަލަށް ކާމިޔާބުކޮށްދިނީ ސްޕެއިނުގެ މިޑްފީލްޑަރު، މިކޭލް މެރީނޯ އެވެ.
މެޗަށްފަހު ވާހަކަ ދައްކަމުން އާސެނަލްގެ ކޯޗު، މިކޭލް އާޓޭޓާ ބުނީ، މިއީ އޭނާގެ ޓީމުން ބޮޑު މެޗެއްގައި ވަރުގަދަ ޓީމެއް އަތުން ހޯދި މުހިއްމު މޮޅެއް ކަމަށެވެ.
މި ނަތީޖާއާއެކު، ކުރިއަށް އޮތް އިންޓަރނޭޝަނަލް ބްރޭކަށް ހަމަޖެހިލައިގެން ދެވެން އެބައޮތް ކަމަށާއި، ލީގުގެ ކުޅުން އަލުން ފަށާއިރު މުހިއްމު ކުޅުންތެރިންތަކެއް އެނބުރި ޓީމާ ގުޅޭނެ ކަމަށް އުއްމީދު ކުރާ ކަމަށް ވެސް އާޓޭޓާ ވަނީ ބުނެފައެވެ.
ލީގުގައި މިރޭ ކުޅުނު އަނެއް މެޗުގައި ފުލަމްގެ ދަނޑުގައި އެ ޓީމު ވަނީ 2-0 އިން ޓޮޓްނަމް ހޮޓްސްޕަރ ބަލިކޮށްފައެވެ.