ENGLISH
04 އޭޕްރީލު 2025
ފަލަސްތީނުގެ ޣައްޒާއަށް އިޒްރޭލުން އަނެއްކާވެސް ބޮން އަޅައިފި، ނުވަ މީހުން ޝަހީދުވެއްޖެ
16 މާރިޗު 2025
|
އެންމެ މަޤްބޫލު
ފަލަސްތީނުގެ ޣައްޒާއަށް އިޒްރޭލުގެ އަސްކަރިއްޔާއިން ދިން ވައިގެ ޙަމަލާއެއްގައި، މިހާތަނަށް ނުވަ މީހަކު ޝަހީދުވެފައިވާ ކަމަށް ބުނެފިއެވެ.
ޣައްޒާގެ ޞިއްޙީ ވުޒާރާއިން ބުނީ ޝަހީދު ކޮށްލި މީހުންގެ ތެރޭގައި ތިން ނޫސްވެރިން ވެސް ހިމެނޭ ކަމަށާއި، އެ ޙަމަލާގައި ގިނަ އަދަދެއްގެ މީހުން ޒަޚަމްވެފައިވާ ކަމަށެވެ.
އިޒްރޭލުގެ ޙަމަލާ އަމާޒު ކޮށްފައި ވަނީ އަލް-ޚައިރު ފައުންޑޭޝަން ކިޔާ ހިލޭސާބަހަށް މަސައްކަތް ކުރާ ޖަމްޢިއްޔާއެއްގެ މަސައްކަތުގައި އުޅުނު މީހުން އުފުލި ކާރަކަށް ކަމަށް ރިޕޯޓުތައް ބުންޏެވެ.
އިޒްރޭލުން ޣައްޒާއަށް އަނެއްކާވެސް ޙަމަލާދީފައިވަނީ، ޙަމަލާތައް ހުއްޓައިލުމުގެ އެއްބަސްވުމަކަށް ޢަމަލުކުރަމުން ދަނިކޮށެވެ.
މިދިޔަ މަހުގެ 19 ވަނަ ދުވަހު ގިނަ ޤައުމުތަކެއް މެދުވެރިވެގެން ޙަމަލާތައް ހުއްޓައިލަން އެއްބަސްވީ، އިޒްރޭލުން ހުއްޓުމެއް ނެތި ލާއިންސާނީ ޢުދުވާނުތައްދީ، ފަލަސްތީނުގެ ބައި ލައްކައެއްހާ މީހުން ޝަހީދުކޮށްލައި، ޣައްޒާގެ ގިނަ ސަރަޙައްދުތައް ސުންނާފަތިކުރަން ފެށިތާ 15 މަސް ފަހުންނެވެ.
އެއްބަސްވުމުގެ ފުރަތަމަ މަރުޙަލާގެ ދަށުން މިނިވަން ކުރާނެ ކަމަށް ބުނި ދިރިތިބި އަސީރުންނާއި ޤައިދީން ވަނީ މިނިވަންކޮށް ނިމިފައެވެ. ނަމަވެސް އެއްބަސްވުމުގެ ދެވަނަ ފިޔަވަހި ފެށުމުގެ މަޝްވަރާތައް މިޞްރުގައި ފެށިނަމަވެސް، އެ މަޝްވަރާތަކުން މާބޮޑު ކުރިއެރުމެއް ނުލިބުނެވެ.
އެކަން އެހެން އޮއްވައި، އިޒްރޭލުން ވަނީ އެއްބަސްވުމުގެ ދެވަނަ ފިޔަވަހި ފެށުމުގެ ބައްދަލުވުމުގައި، ފުރަތަމަ ފިޔަވަހީގެ ދަށުން ޙަމަލާތައް ހުއްޓައިލުމުގެ އެއްބަސްވުން އިތުރުކުރަން ހުށަހަޅައިފައެވެ. މިގޮތުން، އިޒްރޭލުން ބޭނުންވީ ޢުދުވާން ހުއްޓާލުމުގެ އެއްބަސްވުމުގެ ފުރަތަމަ މަރުޙަލާ ކުރިން އެއްބަސްވެފައިވާ 42 ދުވަހަށް ވުރެ އިތުރުކޮށް، ރަމަޟާން މަސް ހިމެނޭހެން އިތުރު 42 ދުވަހަށް އެ މަރުޙަލާގެ މުއްދަތު އިތުރު ކުރާށެވެ.
އެ ހުށަހެޅުމަށް ޙަމާސްއިން ނޫނެކޭ ބުނުމާއެކު، އިޒްރޭލުން މިހާރު ވަނީ އެ ހުށަހެޅުމަށް އެއްބަސްކުރުވަން، ޣައްޒާއަށް އެހީ ވެއްދުމުގެ މަގުތައް ވަގުތީ ގޮތުން ބަންދުކޮށްފައެވެ.