ޔަމަނުގައި ހަރަކާތްތެރިވާ ހަނގުރާމަވެރި ހޫތީ ޖަމާޢަތަށް އަމާޒުކޮށް، އެމެރިކާގެ އަސްކަރިއްޔާއިން ވަރުގަދަ ވައިގެ ޙަމަލާތަކެއް ދީފިއެވެ.

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އެ ޖަމާޢަތާ ދެކޮޅަށް މި އަސްކަރީ އޮޕަރޭޝަން ފެށީ، އީރާނުން ވާގިވެރިވެގެން ރަތްކަނޑު ހުރަސްކޮށް ދަތުރުކުރާ އެމެރިކާ އަދި ރަހުމަތްތެރި ޤައުމުތަކުގެ އުޅަނދުތަކަށް ހޫތީން ޙަމަލާ ދެމުންދާތީ ކަމަށެވެ.

އެ ޙަމަލާތަކުގެ ސަބަބުން އެތައް ބިލިއަން ޑޮލަރުގެ ގެއްލުންވަމުންދާ ކަމަށް ވެސް ޓްރަމްޕް ވިދާޅުވިއެވެ.

އިޒްރޭލުން ޣައްޒާއަށް 2023 ވަނަ އަހަރުގެ އޮކްޓޯބަރު މަހު ޙަމަލާތައް ދޭން ފެށުމާއެކު، އެ ޢުދުވާނުގެ ރައްދުގައި ހޫތީން ވަނީ ރަތް ކަނޑު ހުރަސްކޮށް ދަތުރު ކުރާ އާގުބޯޓުފަހަރަށް އަމާޒުކޮށް ޙަމަލާތަކެއް ދީފައެވެ. މިގޮތުން މިހާތަނަށް 190 އަށް ވުރެ ގިނަ އުޅަނދަށް ޙަމަލާދީފައިވާއިރު، އިޒްރޭލަށް އަމާޒުކޮށް ނުރައްކާތެރި ވައިގެ ޙަމަލާތަކެއް ވެސް ދީފައިވެއެވެ.

އެމެރިކާއިން ދިން ވައިގެ ޙަމަލާތަކުގައި މިހާތަނަށް 15 މީހަކު މަރުވެފައިވާ ކަމަށް ހޫތީން ހިންގާ ސިއްޙީ ވުޒާރާއިން ބުންޏެވެ.

ހޫތީން ނެރުނު ބަޔާނެއްގައި ބުނީ، އެމެރިކާ އާއި އިނގިރޭސިވިލާތް ގުޅިގެން ވަރަށް ރަހުމުކުޑަ އަދި އަނިޔާވެރި ޙަމަލާތަކެއް ދީފައިވަނީ ސަންޢާގައި ދިރިއުޅޭ އާންމުންނަށް އަމާޒުކޮށް ކަމަށެވެ.

މި ޙަމަލާތަކުގައި ސީދާ ގޮތެއްގައި ބައިވެރިނުވިނަމަވެސް، އެމެރިކާގެ އަސްކަރީ މަތިންދާބޯޓުތަކަށް ތެޔޮ އަޅަން އިނގިރޭސިވިލާތުން ވަނީ އެހީތެރިވެފައެވެ.

ބައެއް ރިޕޯޓުތައް ބުނާ ގޮތުން، އެމެރިކާގެ ބައެއް ޙަމަލާތައް ވަނީ ސަންޢާ އެއަރޕޯޓަށް ވެސް އަމާޒުކޮށްފައެވެ. އެތަނުގައި ހޫތީންގެ އަސްކަރީ ބައެއް ވަޞީލަތްތައް ހުރެއެވެ.