ސްޕެނިޝް ލީގުގައި ރޭ ކުޅުނު މެޗުގައި ފްރާންސްގެ ތަރި، ކީލިއަން އެމްބާޕޭ ވައްދާލި ދެ ލަނޑާއެކު، ފަހަތުން އަރައި ވިޔަރެއާލް 2-1 އިން ބަލިކޮށް، ރެއާލް މެޑްރިޑު ތާވަލްގެ އެއްވަނަ އަށް ޖެހިލައިފިއެވެ.

މި މޮޅާއެކު، ރެއާލް އެއްވަނައިގައި އުޅެނީ 28 މެޗުން 60 ޕޮއިންޓް ހޯދައިގެންނެވެ. ދެވަނައިގައި އޮތް ބާސެލޯނާ އަށް ދެ މެޗު މަދުން ކުޅެގެން ލިބިފައިވަނީ 57 ޕޮއިންޓެވެ. އެތުލެޓިކޯ މެޑްރިޑް ތިންވަނައިގައި އޮތީ 56 ޕޮއިންޓާއެކު އެވެ.

ވިޔަރެއާލްގެ ދަނޑުގައި ކުޅުނު މެޗުގައި ހަތްވަނަ މިނެޓުގައި އެ ޓީމު ލީޑު ނެގީ ހުއާން ފޮއިތުގެ ގޯލުންނެވެ. އޭގެ ދިހަ މިނެޓުފަހުން، ރެއާލަށް އެއްވަރުކޮށްދިނީ އެމްބާޕޭ އެވެ.

ފުރަތަމަ ހާފުގެ 23 ވަނަ މިނެޓުގައި އެމްބާޕޭ ވަނީ އިތުރު ގޯލެއްޖަހައި، ރެއާލަށް މޮޅު ކަށަވަރުކޮށްދީފައެވެ.

މި މެޗުން ބަލިވި ވިޔަރެއާލް އޮތީ ތާވަލްގެ ފަސްވަނައިގައެވެ. އެ ޓީމަށް ލިބިފައިވަނީ 44 ޕޮއިންޓެވެ.

ލީގުގައި ރޭ ކުޅުނު އަނެއް މެޗުގައި ޖިރޯނާގެ ދަނޑުގައި އެ ޓީމުން ވަނީ 1-1 އިން ވެލެންސިއާ އާ އެއްވަރުވެފައެވެ.