އިޓާލިއަން ލީގުގައި ރޭ ކުޅުނު މެޗުގައި 2-1 އިން ކޯމޯ ބަލިކޮށް، އޭސީ މިލާނުން މުހިއްމު މޮޅެއް ހޯދައިފިއެވެ.

މިއީ ލީގުގައި އެންމެ ފަހުން ކުޅުނު ފަސް މެޗުގެ ތެރެއިން މިލާން މޮޅުވި ދެވަނަ ފަހަރެވެ. ބާކީ ތިން މެޗުން ވަނީ ބަލިވެފައެވެ. އެ ޓީމު މޮޅުވީ އެންމެ ފަހުން ކުޅުނު ދެ މެޗުންނެވެ.

މިލާންގެ ސެން ސީރޯ ސްޓޭޑިއަމްގައި ކުޅުނު މެޗުގައި ކޯމޯ އަށް ލީޑު ނަގައިދިނީ ލޫކަސް ޑަ ކޫންޔާ އެވެ. މި ގޯލާއެކު އެ ޓީމު ފުރަތަމަ ހާފު ނިންމާލީ 1-0 އިން ކުރީގައި އޮވެގެންނެވެ.

ދެވަނަ ހާފުގެ ކުރީކޮޅު، މިލާނަށް އެއްވަރުކޮށްދިނީ ކްރިސްޓިއަން ޕުލިސިޗް އެވެ. އެ ޓީމު މޮޅުވި ލަނޑު ޖަހައިދިނީ ނެދަލެންޑްސްގެ މިޑްފީލްޑަރު، ޓިޖާނީ ރެއިންޑާސް އެވެ.

މެޗުގެ އިތުރު ވަގުތުގެ ތެރޭގައި ކޯމޯގެ މިޑްފީލްޑަރު، ޑެލޭ އަލީ އަށް ސީދާ ރަތް ކާޑު ދެއްކުމުން އެ ޓީމުން ނިންމާލީ 10 ކުޅުންތެރިންނާއެކު އެވެ.

މި ނަތީޖާއާއެކު، މިލާން އުޅެނީ ހަތްވަނައިގައެވެ. އެ ޓީމަށް ކުޅުނު 29 މެޗުން ލިބިފައިވަނީ 47 ޕޮއިންޓެވެ. މި މެޗުން ބަލިވި ކޯމޯ އޮތީ 13 ވަނައިގައެވެ. އެ ޓީމަށް ލިބިފައިވަނީ 29 ޕޮއިންޓެވެ.