މުޖުތަމަޢުގެ އެންމެ މުހިންމު އެއް ބަޔަކީ ޒުވާނުން ކަމަށާއި، ޒުވާނުން ބާރުވެރިކުރުވުމަށްޓަކައި ވަރަށް ގިނަ މަސައްކަތްތަކެއް އަދުގެ ސަރުކާރުން ކުރައްވަރުން ކުރައްވަމުން ގެންދަވާ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ދިވެހިރާއްޖޭގެ ޖުމްހޫރީ ދުވަހުގެ މުނާސަބަތުގައި ދަރުބާރުގޭގައި ރޭ ބޭއްވި ރަސްމީ ޖަލްސާގައި ޤައުމާ މުޚާޠަބުކުރައްވައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވަނީ، ޒުވާނުން ބާރުވެރިކުރުވުމަށްޓަކައި އެ މަނިކުފާނުގެ ސަރުކާރުން ފައްޓަވާފައިވާ ގިނަގުނަ މަޝްރޫޢުތަކުގެ ތެރެއިން ބައެއް ކަންކަން ވިދާޅުވެދެއްވައިފަ އެވެ.

ރައީސް މުޢިއްޒު ވިދާޅުވި ގޮތުގައި، ޤައުމުގެ ކަންކަމުގައި ވީހައިވެސް ބޮޑަކަށް ޒުވާނުންގެ މަޝްވަރާ އާއި ބައިވެރިވުން ހޯއްދެވުމަށްޓަކައި، "ދިވެހި ޒުވާނުންގެ ލަފާދޭ ކޮމެޓީ" މިއަހަރު ތެރޭގައި އުފައްދަވާފައިވެއެވެ. މީގެ އިތުރުން، ޒުވާނުން ބާރުވެރިކުރުވުމުގެ ޚާއްޞަ 71 ޕްރޮގްރާމެއްގައި 3،470 ޒުވާނުން ބައިވެރިވެފައިވާކަން ވެސް އެ މަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ އިތުރަށް ވިދާޅުވީ، ދުޅަހެޔޮ މުޖުތަމަޢެއް ބިނާކުރުމުގެ އެންމެ މުހިންމު އެއް ދާއިރާއަކީ ކުޅިވަރުގެ ދާއިރާ ކަމަށާއި، ރާއްޖޭގައި ކުޅިވަރު ކުރިއަރުވައި، އެކި ދާއިރާތަކުން ދިވެހި އެތުލީޓުން ތަމްރީނުކުރުމަށް ޚާއްޞަ މަސައްކަތްތަކެއް ކުރަންޖެހިފައިވާ ކަމަށެވެ. އެގޮތުން، ކުޅިވަރު އެސޯސިއޭޝަންތައް ޙަރަކާތްތެރިކުރުވުމަށް ސަރުކާރުން ބޮޑެތި އެހީތަކެއް ދެއްވާފައިވާ ކަމަށާއި، މާލެއާއި އަތޮޅުތަކުގައި ކުޅިވަރު ކުޅޭ ތަންތަން ތަރައްޤީކުރުމުގެ މަޝްރޫޢުތައް ވެސް ސަރުކާރުން މިހާރު ހިންގަވަމުން ގެންދަވާކަން އެ މަނިކުފާނު ފާހަގަކުރެއްވިއެވެ.

މި މަސައްކަތްތަކުގެ ނަތީޖާ މިހާރު ފެންނަމުންދާކަން ފާހަގަކުރައްވައި، ރައީސުލްޖުމްހޫރިއްޔާ ވިދާޅުވީ މި އަހަރުގެ މިހާތަނަށް، ކުޅިވަރުގެ ރޮނގުން ބައިނަލްއަޤުވާމީ 75 ޙަރަކާތެއްގައި ދިވެހި އެތުލީޓުން ޤައުމު ތަމްސީލުކޮށްފައިވާ ކަމަށާއި، މި ޙަރަކާތްތަކުން 12 މެޑަލް ދިވެހި އެތުލީޓުން ހޯދައިދީފައިވާ ކަމަށެވެ.