އިނގިރޭސި ޕްރިމިއަރ ލީގުގައި ބްރައިޓަންއާ 2-2 އިން މިރޭ އެއްވަރުވެ، ގަދަ ހަތަރެއްގެ ރޭހުގައި މެންޗެސްޓަރ ސިޓީއަށް އުނދަގޫތައް ކުރިމަތިވެއްޖެއެވެ.

މިއީ ލީގުގައި ސިޓީ އެންމެ ފަހުން ކުޅުނު ދެ މެޗުގެ ތެރެއިން މޮޅެއްނުލިބި ނިންމާލަން ޖެހުނު ދެވަނަ ފަހަރެވެ. އެ ޓީމު އެންމެ ފަހުން ކުޅުނު މެޗުގައި ނޮޓިންގހަމް ފޮރެސްޓް އަތުން ވަނީ ބަލިވެފައެވެ.

އިއްތިހާދު ސްޓޭޑިއަމްގައި ކުޅުނު މެޗުގެ ކުރީކޮޅު، ލިބުނު ޕެނަލްޓީއަކުން ނޯވޭގެ ފޯވާޑް، އާލިން ހާލަންޑް ސިޓީ އަށް ލީޑު ނަގައިދީފައިވަނިކޮށް، ބްރައިޓަން އަށް އެއްވަރުކޮށްދިނީ ޕާވިސް އެސްޓުޕިނިއާން އެވެ.

ފުރަތަމަ ހާފު ނިމުމުގެކުރީން، މިސްރުގެ ފޯވާޑް، އޮމަރް މާމޯޝްގެ ގޯލުން ސިޓީ އަލުން ލީޑުނެގިއެވެ. މި ގޯލާއެކު އެ ޓީމުން ހާފު ނިންމާލީ 1-2 އިން ކުރީގައި އޮވެގެންނެވެ.

މެޗުގެ ދެވަނަ ހާފުގެ ކުޅުން ފެށިތަނާ ސިޓީގެ ޑިފެންޑަރު، އަބްދުކޮދީރު ކުސަނޯފް އަތުން ބައިކޮޅަށް ވަތް ގޯލަކުން ބްރައިޓަން އަނެއްކާވެސް އެއްވަރުކުރިއެވެ.

މި މެޗުން އެއްވަރުވުމާއެކު ސިޓީ އަށް ގަދަ ހަތަރެއްގެ ރޭހުގައި ވަނީ އަމިއްލަ ބާރު ގެއްލިފައެވެ. އެ ޓީމަށް ކުޅުނު 29 މެޗުން ލިބިފައިވަނީ 48 ޕޮއިންޓެވެ. މިއާއެކު، ލީގުގެ ހަތަރު ވަނައިގައި އެއް މެޗު މަދުން ކުޅެގެން 49 ޕޮއިންޓާއެކު އޮތް ޗެލްސީގެ އިތުރުން ސިޓީ އަށް ވުރެ އެއް ޕޮއިންޓް ފަހަތުން ހަވަނައިގައި އޮތް ނިއުކާސަލް ޔުނައިޓެޑަށް ކުރިއަށް އޮތް މެޗު ކާމިޔާބުކޮށްގެން އެ ޓީމުގެ ކުރިއަށް އެރޭނެ އެވެ.

މި މުބާރާތުގައި މިރޭ ކުޅުނު އެހެން މެޗުތަކުގެ ނަތީޖާއަށް ބަލާއިރު، ރަށުން ބޭރުގައި އިޕްސްވިޗް ޓައުން އަތުން 2-4 އިން ފޮރެސްޓް ވަނީ މޮޅުވެފައެވެ.

އެވަޓަންގެ ދަނޑުގައި އެ ޓީމުން ވަނީ 1-1 އިން ވެސްޓް ހޭމް ޔުނައިޓެޑާ އެއްވަރުވެފައެވެ. ރަށުން ބޭރުގައި ސައުތެމްޓަން އަތުން ވުލްވްސް މޮޅުވީ 1-2 އިންނެވެ.