ބ. ކަމަދޫ އާއި ދ. މާއެނބޫދޫގެ ފުޓްބޯޅަ ދަނޑު ޤާއިމްކުރުމާއި، ޅ. ކުރެންދޫ ދަނޑުގެ ލައިޓް ހަރުކުރުމުގެ އިތުރުން ހަތަރު ރަށަކަށް ބޭނުންވާ ޑްރޭގް ބްރަޝް މެޝިން ހޯދުމަށް ކުޅިވަރާއި ހަށިހެޔޮކަމާ ބެހޭ ވުޒާރާއިން، ފެނަކަ ކޯޕަރޭޝަން ލިމިޓެޑާ މިއަދު ހަވާލުކޮށްފިއެވެ.

ޑްރޭގް ބްރަޝް މެޝިން ހޯދުމަށް ބޭނުންވާ ރަށްތަކަކީ ބ. ކެންދޫ، ބ. ދަރަވަންދޫ، ބ. ތުޅާދޫ އަދި ރ. މީދޫއެވެ.

ފެނަކަ ކޯޕަރޭޝަން ލިމިޓެޑާއިއެކު މިއަދު ސޮއިކުރެވުނު އެއްބަސްވުމުގައި ކުޅިވަރު ވުޒާރާގެ ފަރާތުން ސޮއިކުރެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ. ފެނަކައިގެ ފަރާތުން ސޮއިކުރެއްވީ މެނޭޖިން ޑިރެކްޓަރ ރިޓަޔާޑް މުޙައްމަދު ނަޖާހުއެވެ.

މި އެއްބަސްވުމުގެ ދަށުން ޅ. ކުރެންދޫ ފުޓްބޯޅަ ދަނޑުގެ ލައިޓިން ސިސްޓަމް 90 ދުވަހުގެ ތެރޭގައި ޤާއިމްކޮށް ނިންމަން ޖެހެއެވެ. މި މަސައްކަތަށް 1.6 މިލިއަން ރުފިޔާ ހޭދަވާނެއެވެ. އަދި ބ. ކަމަދޫ ފުޓްބޯޅަ ދަނޑުގެ ޓާފް ސަޕްލައިކޮށް އިންސްޓޯލްކުރުމަށް 4.7 މިލިއަން ރުފިޔާ ހޭދަވާއިރު، މި މަސައްކަތް ނިންމުމަށް 60 ދުވަހުގެ މުއްދަތެއް ދީފައިވެއެވެ.

މީގެ އިތުރުން ދ. މާއެނބޫދޫ ފުޓްބޯޅަ ދަނޑުގެ މަސައްކަތް ނިންމުމަށް 120 ދުވަހުގެ މުއްދަތެއް ދީފައިވާއިރު، 6 މިލިއަން ރުފިޔާ ހަރަދުވާ މި މަޝްރޫޢުގެ ތެރޭގައި ހިމެނެނީ ދަނޑުގެ ޓާފް އިންޓޯލްކުރުމާއި، ފަށާފާރު ރޭނުމާއި ފެންސް ޖެހުމުގެ މަސައްކަތެވެ.

ރާއްޖޭގެ އެކި ސަރަހައްދުތަކުގައި ހުއްޓިފައި ހުރި ކުޅިވަރު ޕްރޮޖެކްޓްތައް ފުރިހަމަކުރުމުގެ ޕްރޮގްރާމް ސަރުކާރުން މިދިޔަ އަހަރު ފެށިއިރު، އެ މަސައްކަތުގެ ބޮޑުބައެއް މިހާރުވަނީ ނިންމާފައެވެ. މި މަސައްކަތްތައް ވީހާވެސް އަވަހަށް ހަރުދަނާ ގޮތެއްގައި ނިންމެވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެކެވެ. މިގޮތުން ސަރުކާރު ހިއްސާވާ ކުންފުނިތަކަށް މި ޕްރޮޖެކްޓްތައް ހަވާލުކޮށް މި އަހަރުގެ ދެވަނަ ކުއާޓާގެ ތެރޭގައި ނިންމުމުގެ މަސައްކަތް އަންނަނީ ކުރެވެމުން އަންނަ ކަމަށް ކުޅިވަރާއި ހަށިހެޔޮކަމާ ބެހޭ ވުޒާރާއިން ބުނެފައިވެއެވެ.