ޖަރުމަން ލީގުގައި މިރޭ ކުޅުނު މެޗުގައި ޔޫނިއަން ބާލިންއާ 1-1 އިން ބަޔާން މިއުނިކް އެއްވަރުވެއްޖެއެވެ.

މި ނަތީޖާއާއެކު، އަދިވެސް އެއްވަނައިގައި އުޅެނީ ބަޔާނެވެ. އެ ޓީމަށް 26 މެޗުން ލިބިފައިވަނީ 62 ޕޮއިންޓެވެ. ދެވަނައިގައި އޮތް ބަޔާ ލެވަކޫސަން އަށް އެއް މެޗު މަދުން ކުޅެގެން ލިބިފައިވަނީ 53 ޕޮއިންޓެވެ. މައިންޒް ތިންވަނައިގައި އޮތީ 45 ޕޮއިންޓާއެކު އެވެ.

ޔޫނިއަން ބާލިންގެ ދަނޑުގައި ކުޅުނު މެޗުގައި އެ ޓީމުން ވަނީ ފުރަތަމަ ހާފުގައި މޮޅު ކުޅުމެއް ދައްކައި ބަޔާންގެ އެޓޭކުތައް ހުއްޓުވައިފައެވެ.

މެޗުގައި ބަޔާނަށް ލީޑު ނަގައިދިނީ ފަހު ހާފުގައި ކުޅެން ނުކުތް ލެރޯއީ ސާނޭ އެވެ. ބަޔާންގެ ރިޒާވް ގޯލްކީޕަރަށް ހެދުނު ގޯހެއްގެ ފައިދާނަގައި، ޔޫނިއަން ބާލިން އަށް އެއްވަރުކޮށްދިނީ ކުރީން ބަޔާންގެ އެކަޑެމީގައި އުޅުނު ބެނެޑިކްޓް ހޮލަބެކް އެވެ.

މި މެޗުން ލިބުނު ޕޮއިންޓާއެކު ޔޫނިއަން ބާލިން އޮތީ 13 ވަނައިގައެވެ. އެ ޓީމަށް ލިބިފައިވަނީ 27 ޕޮއިންޓެވެ.