ޤަވާއިދާ ޚިލާފަށް އުޅޭ ބިދޭސީންގެ މައްސަލައަށް ދާއިމީ ޙައްލެއް ނުހޯދިއްޖެ ނަމަ، ޤައުމުގެ މިނިވަންކަމަށް އަރައިގަތުމުގެ ނުރައްކަލެއް ކުރިމަތިވެދާނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ޖުމްހޫރީ ދުވަހުގެ މުނާސަބަތުގައި ދަރުބާރުގޭގައި ރޭ ބޭއްވި ރަސްމީ ޖަލްސާގައި ޤައުމާ މުޚާޠަބުކޮށް ދެއްކެވި ވާހަކަފުޅުގައި ރައީސް ވިދާޅުވީ ޤަވާއިދާ ޚިލާފަށް އުޅޭ ބިދޭސީންގެ މައްސަލައަކީ އެތައް އަހަރެއް ވަންދެން އެއްވެސް ސަރުކާރަކަށް ޙައްލު ނުކުރެވި އޮތް މައްސަލައެއް ކަމަށެވެ. ނަމަވެސް މިސަރުކާރުން މިހާތަނަށް 4،700 އަށްވުރެ ގިނަ ޤަވާއިދާ ޚިލާފު ބިދޭސީން ޑިޕޯޓްކޮށްފައިވާކަން ފާހަގަކުރެއްވިއެވެ. މިއީ އަހަރެއްގެ ތެރޭގައި ޑިޕޯޓްކުރެވުނު އެންމެ ގިނަ އަދަދު ކަމަށް ވެސް ވިދާޅުވިއެވެ.

މީގެ އިތުރުން، ރައީސް މުޢިއްޒުގެ ވާހަކަފުޅުގައި މަސްތުވާތަކެތީގެ މައްސަލަ ޙައްލުކުރުމަށް ކުރެވޭ މަސައްކަތްތަކާއި، މަގުމަތީގެ ސަލާމަތާއި ރައްކާތެރިކަން އިތުރުކުރުމަށް އެޅުނު ފިޔަވަޅުތަކުގެ މައްޗަށް ވެސް އަލިއަޅުވާލެއްވި އެވެ. އަދި އޯގާތެރި ސަރުކާރެއްގެ ގޮތުގައި ކުޑަކުދިންނާއި، އިސްރަށްވެހިންނާއި، ނުކުޅެދުންތެރިކަން ހުންނަ ފަރާތްތަކަށް އެހީތެރިވުމަށް ކުރެވުނު މަސައްކަތްތަކުގެ ވާހަކަ ވެސް ހިއްސާކުރެއްވިއެވެ.

ރައީސް މުޢިއްޒު ވަނީ 2025 ވަނަ އަހަރު ނިމޭއިރު ރާއްޖޭގެ ހުރިހާ އަތޮޅަކުން އައިޑީ ކާޑާއި ޕާސްޕޯޓުގެ ޚިދުމަތް ލިބޭނެކަމުގެ ޔަޤީންކަން ވެސް ދެއްވައިފައެވެ.