ރާއްޖޭގައި މޫސުމީ ނޭދެވޭ ބަދަލުތަކުން ކުރިމަތިވެފައިވާ ނާޒުކު ޙާލަތުން ސަލާމަތްވުމަށް ރައްޔިތުންގެ ޙައްޤުގައި ވަކާލާތުކުރައްވާނެ ކަމުގެ ޔަޤީންކަން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.

ރައީސުލްޖުމްހޫރިއްޔާ މިފަދައިން ވިދާޅުވެފައިވަނީ، ޖުމްހޫރީ ދުވަހުގެ މުނާސަބަތުގައި ދަރުބާރުގޭގައި ރޭ ބޭއްވި ރަސްމީ އިޙްތިފާލުގައި، ޤައުމާ މުޚާޠަބުކޮށް ދެއްކެވި ވާހަކަފުޅުގައެވެ. މި ވާހަކަފުޅުގައި، ތިމާވެއްޓާއި މޫސުމީ ނޭދެވޭ ބަދަލުތަކުގެ ދާއިރާއަށް ޚާއްޞަ އަހައްމިއްޔަތުކަމެއް ދެއްވިއެވެ.

ރައީސުލްޖުމްހޫރިއްޔާ ވިދާޅުވީ، ނޮވެމްބަރު 11 ގައި އަޒަރުބައިޖާނުގައި ފެށޭ ކޮޕް-29 ސަމިޓުގައި ދިވެހި ރައްޔިތުންގެ ޙައްޤުގައި ބައިވެރިވެވަޑައިގަންނަވާނެ ކަމަށެވެ. މި ދަތުރުފުޅުގެ މައިގަނޑު މަޤްޞަދަކީ ތިމާވެށި ހަލާކުކުރަމުންދާ ފަރާތްތަކުގެ އަތުން، އެ ގެއްލުން ފޫބެއްދުމުގެ ބަދަލެއްގެ ގޮތުގައި ފައިސާ ހޯއްދެވުން ކަމުގައި ފާހަގަކުރެއްވިއެވެ.

ރައީސުލްޖުމްހޫރިއްޔާ އިތުރަށް ވިދާޅުވީ، ދިވެހިރާއްޖެއަކީ ތިމާވެށީގެ ގޮތުން ވަރަށް ނާޒުކު ޤައުމެއް ކަމަށާއި، މޫސުމަށް އަންނަމުންދާ ނޭދެވޭ ބަދަލުތަކަކީ ޙަޤީޤަތެއް ކަމުގައި ޤަބޫލުކުރަންޖެހޭ ކަމަށެވެ. މި ގޮތުން، ރާއްޖޭގެ ދެމެހެއްޓެނިވި ތަރައްޤީގެ އަމާޒުތައް ޙާޞިލުކުރުމަށްޓަކައި ތިމާވެށި ހިމާޔަތްކުރުމަށް އަދުގެ ސަރުކާރުން ގިނަ މަސައްކަތްތަކެއް ކުރައްވަމުން ގެންދަވާކަން ފާހަގަކުރެއްވިއެވެ.

ރައީސުލްޖުމްހޫރިއްޔާ ވާހަކަފުޅުގައި، ރާއްޖޭގައި ބޭނުންކުރާ ޖުމުލަ ހަކަތައިގެ ތެރެއިން، ތިމާވެއްޓާ ރައްޓެހި، ސާފު ހަކަތައިގެ ނިސްބަތް 33 އިންސައްތައަށް މަތިކުރުމަކީ އަމާޒެއް ކަމުގައި ވިދާޅުވިއެވެ. މި އަމާޒަށް ވާޞިލުވުމަށްޓަކައި މިދިޔަ އަހަރެއްހާ ދުވަހުގެ ތެރޭގައި 15 މެގަވޮޓްގެ ސޯލާޕަވަރ އިތުރަށް އުފައްދަން ފެށިފައިވާ ކަމަށާއި، 164 މެގަވޮޓްގެ ސޯލާޕަވަރ އުފެއްދުމުގެ މަޝްރޫޢު މިހާރުވެސް ކުރިއަށްދާކަން ފާހަގަކުރެއްވިއެވެ.

މީގެއިތުރުން، "މަގޭ ސޯލާ މަޝްރޫޢު" އާއި ފަސް މިލިއަން ގަސް އިންދުމުގެ މަޝްރޫޢުގެ ދަށުން މިހާތަނަށް ހަތަރު ލައްކައަށްވުރެ ގިނަ ގަސް އިންދާފައިވާކަން ރައީސުލްޖުމްހޫރިއްޔާ ފާހަގަކުރެއްވިއެވެ. އަދި ބ. އަތޮޅުގެ އިތުރުން، އިތުރު ތިން ރަށެއްގައި ބަޔޮސްފިޔަރ ރިޒަރވް ހެދުމަށް ނިންމާފައިވާ ކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ.

ތިމާވެށި ހިމާޔަތްކުރުމުގެ އިތުރު މަސައްކަތްތަކުގެ ތެރޭގައި، 17 ރަށެއްގައި ކުނިކޮށި ހެދުމާއި، ކުނި އުފުލަން ޚާއްޞަ އުޅަނދުތަކެއް 99 ރަށަކަށް ހަދިޔާކުރުމާއި، ކުނި މެނޭޖުކުރުމުގެ އިތުރު އެހީތައް ފޯރުކޮށްދީފައިވާކަން ވެސް ރައީސުލްޖުމްހޫރިއްޔާ ފާހަގަކުރެއްވިއެވެ.