އެމެރިކާ އާއި ރައީސް ޑޮނަލްޑް ޓްރަމްޕަށް ނަފުރަތު ކުރައްވާ ކަމަށް ތުހުމަތުކޮށް، ދެކުނު އެފްރިކާއިން އެމެރިކާއަށް ކަނޑައަޅާފައި ހުންނަވާ ސަފީރު އަނބުރާ ފޮނުވައިލަން ނިންމައިފިއެވެ.

އެމެރިކާގެ ޚާރިޖީ ވަޒީރު މާކޯ ރޫބިޔޯ އެކްސްގައި ވިދާޅުވީ، ދެކުނު އެފްރިކާއިން އެމެރިކާއަށް ކަނޑައަޅާފައި ހުންނަވާ ސަފީރު އެބްރާހިމް ރަސޫލު، އެމެރިކާގެ ފަސްގަނޑުގައި ހުންނަވަން އެމެރިކާ ސަރުކާރުން ބޭނުންނުވާ ކަމަށެވެ.

ރަސޫލްއަކީ، ނަސްލީ ތަފާތުކުރުމުގެ ވިސްނުން ގެންގުޅުއްވާ، އެމެރިކާ އާއި ޓްރަމްޕަށް ނަފްރަތު ކުރައްވާ ބޭފުޅެއްގެ ގޮތުގައި ރޫބިޔޯ ވަނީ ސިފަކުރައްވައިފައެވެ.

ބޭރުގެ ޤައުމެއްގެ ސަފީރަކު މި ގޮތަށް އަނބުރާ ފޮނުވައިލުމަކީ ޚާރިޖީ ގޮތުން އެންމެ ހަރުކަށި އެއް ފިޔަވަޅެވެ. މިއީ ވަރަށް މަދުން ނޫނީ ޤައުމުތަކުން އަޅާ ފިޔަވަޅެއް ނޫނެވެ.

ދެކުނު އެފްރިކާގެ ސަރުކާރުގެ ފަރާތުން ނެރުނު ބަޔާނެއްގައި ވަނީ އެމެރިކާ ސަރުކާރުގެ މި ނިންމުމާ މެދު ހިތާމަކުރާ ކަމަށް ބުނެފައެވެ. އަދި އެމެރިކާ އާއެކު އޮތް ގާތްގުޅުން އިތުރަށް ހަރުދަނާ ކުރަން ބޭނުންވާ ކަމަށް ވެސް އެ ބަޔާނުގައި ބުނެފައިވެއެވެ.

ދެކުނު އެފްރިކާ އާއި އެމެރިކާ އާ މެދު އޮތް ގުޅުން ގޯސްވީ، ދެވަނަ ދައުރަކަށް އެމެރިކާ ރައީސްކަމަށް ވަޑައިގެން ޓްރަމްޕް އެޅުއްވި ފިޔަވަޅުތަކާ ގުޅިގެންނެވެ.

މިގޮތުން، ދެކުނު އެފްރިކާއަށް އެމެރިކާއިން ދެމުންދާ އެހީތައް ކަނޑާލައިފައެވެ.

މި ފިޔަވަޅު އެޅީ، ދެކުނު އެފްރިކާގެ ދޮން ނަސްލުގެ ދަނޑުވެރިންގެ ބިންތައް އަތުލުމުގެ ޤާނޫނެއް އޮތް ކަމަށް ބުނެއެވެ.

މިއީ ނަސްލީ ތަފާތުކުރުމުގެ ޢަމަލެއްގެ ގޮތުގައި އެމެރިކާއިން ޤަބޫލުކުރެއެވެ.