އަންނަ ބުދަ ދުވަހު އިންޑިއާއާ ދެކޮޅަށް ކުޅޭ އެކުވެރިކަމުގެ މެޗަށް ދިވެހި ގައުމީ ފުޓްބޯޅަ ޓީމު މިއަދު ފުރައިފިއެވެ.

މީގެކުރިން، ގައުމީ ޓީމަށް ކުޅެފައިވާ ކުޅުންތެރިންނާއި ޒުވާން ކުޅުންތެރިން ހިމެނޭ ގޮތަށް މިއަދު ހެނދުނު އިންޑިއާ އަށް ދާން ފުރާފައިވަނީ ޓީމުގެ ފުރަތަމަ ގްރޫޕެވެ.

ގައުމީ ޓީމުގެ ހުރިހާ ކުޅުންތެރިންނަށް އެއްކޮށް ޖާގަ ނުލިބުމުން ދެ ގްރޫޕަކަށް ބަހާލާފައިވާއިރު، ޓީމުގެ ދެވަނަ ގްރޫޕު ފުރުމަށް ހަމަޖެހިފައިވަނީ މިއަދު މެންދުރު އެވެ.

އެހެންނަމަވެސް، މެޗު ކުޅެން ހަމަޖެހިފައިވާ އިންޑިއާގެ ޝިލޮންގަށް ޓީމުގެ ހުރިހާ ކުޅުންތެރިން ވެސް ދިއުމަށް ހަމަޖެހިފައިވަނީ އެއްކޮށެވެ.

އިންޑިއާ އާ ދެކޮޅަށް ރާއްޖޭން ކުޅޭ އެކުވެރިކަމުގެ މެޗު އޮންނާނީ ޝިލޮންގުގައި ހުންނަ ޖަވާހިރު ލާލް ނެހްރޫ ސްޓޭޑިއަމްގައެވެ.

މި މެޗަށްފަހު ރާއްޖޭން ދެން ނުކުންނާނީ އޭޝިއަން ކަޕް ކޮލިފައިންގައި މި މަހުގެ 25 ވަނަ ދުވަހު ފިލިޕީންސްއާ ދެކޮޅަށް އެ ގައުމުގަ އެވެ. އެއަށްފަހު، އަންނަ ޖޫން މަހު ރަށުން ބޭރުގައި އީސްޓް ޓިމޯއާ ދެކޮޅަށް ނިކުތުމަށް ހަމަޖެހިފައިވާއިރު، ރާއްޖޭގެ ތިންވަނަ މެޗުގައި އަންނަ އޮކްޓޫބަރު މަހުގެ ތެރޭގައި ތަޖިކިސްތާނުގައި އެ ޓީމާ ބައްދަލުކުރާނެ އެވެ.

އިންޑިއާ އަށް ފުރުމުގެ ކުރިން، ބޭއްވީ ފަރިތަކުރުންތަކަށްފަހު، ރާއްޖޭގެ ކޯޗު، އަލީ ސުޒެއިން ބުނީ، ކުޅުންތެރިން ތިބީ ރަނގަޅު ކޮންޑިޝަނުގައި ކަމަށާއި، އެ ކުޅުންތެރިންނާ މެދު އުއްމީދު އެބައޮތް ކަމަށެވެ.

އޭޝިއަން ކަޕްގެ ކޮލިފައިންގައި ރާއްޖެ ހިމެނޭ ގްރޫޕުގައި ކުޅޭ ފުރަތަމަ ތިން މެޗުގައި ރަނގަޅު ނަތީޖާތަކެއް ނެރެވިއްޖެނަމަ، 2027 ވަނަ އަހަރު ބާއްވާ މުބާރާތުން ޖާގަ ހޯދުމުގެ ފުރުޞަތު ބޮޑުވެގެންދާނެ ކަމަށް ވެސް ކޯޗު، ސުޒެއިން ވަނީ ބުނެފައެވެ.