މެންޗެސްޓަރ ޔުނައިޓެޑުން ކުރިއެރުންތައް ހޯދަމުން އަންނަކަން މިދިޔަ ދެ މެޗުގައި ސާބިތުކޮށްދީފައިވާ ކަމަށާއި، އަދިވެސް ރަނގަޅުކުރެވޭނެ ކަންތައްތައް އެބަހުރި ކަމަށް އެ ޓީމުގެ ކޯޗު، ރުބެން އަމޯރިމް ބުނެފިއެވެ.

އަމޯރިމް މިހެން ބުނީ، ލެސްޓަރ ސިޓީއާ ދެކޮޅަށް ޔުނައިޓެޑް ކުޅުމަށް ހަމަޖެހިފައިވާ މެޗުގެ ކުރީން އިއްޔެ ބޭއްވި ނޫސްވެރިންގެ ބައްދަލުވުމުގައެވެ.

އެގޮތުން، އަމޯރިމް ވަނީ، ޔުނައިޓެޑުން ލީގުގައި އާސެނަލްއާ 1-1 އިން އެއްވަރުވި މެޗާއި، އެންމެ ފަހުން ޔުރޮޕާ ލީގުގައި ފަހަތުންއަރައި 1-4 އިން ރެއާލް ސޮސިއެޑާޑް އަތުން މޮޅުވި މެޗުގައި ހިނގައިދިޔަ ކަންތައްތަކުން ވެސް ޔުނައިޓެޑުން ހޯދަމުންއަންނަ ކުރިއެރުންތައް ފެނިގެންގޮސްފައިވާ ކަމަށް ބުނެފައެވެ.

"ފާއިތުވެދިޔަ ދެ މެޗުގައި ދެއްކި ކުޅުމުން ޔުނައިޓެޑުން ދާން ޖެހޭ މިސްރާބު އެނގިގެން ހިނގައްޖެ،" އަމޯރިމް ބުންޏެވެ.

އަދި، މެޗަތަކުގައި އޭނާގެ ކޯޗިންގ ޓީމުގެ ރޭވުންތެރިކަމާ އެއްގޮތަށް ކުޅުންތެރިންގެ އަމަލުތައް ބަހައްޓަމުންދާކަން ދޭހަވާ ކަމަށް ވެސް އަމޯރިމްގެ ވާހަކައިގައި ފާހަގަކުރިއެވެ.

އޭނާގެ ޓީމުން މެޗު ކާމިޔާބުކޮށް، ނޫނީ ނަތީޖާ އެއްވަރުކުރުމަށް އެ މެޗެއްގައި އެކަށީގެންވާ ވަގުތު ހޯދަމުން އަންނަ ކަމަށާއި، ބައިކޮޅަށް ލަނޑެއް ވަނުމުން ދެން އަނެއްކާ އިތުރު ގޯލެއް ވަދެ، ޓީމުގެ ހަމަޖެހުމަށް ބުރޫ އެރިޔަނުދިނުމަށް ކުޅުންތެރިން މަސައްކަތްކުރާ ކަމަށް ވެސް އަމޯރިމް ބުންޏެވެ.

ލީގުގައި ނެރެމުންއައި ދަށް ނަތީޖާތަކުގެ ސަބަބުން ޔުނައިޓެޑް އުޅެނީ 14 ވަނައިގައެވެ. އެ ޓީމަށް 28 މެޗުން ލިބިފައިވަނީ 34 ޕޮއިންޓެވެ. އެ ޓީމަށް ކުރިއަށް އޮތް މެޗުގައި ފުލުން ދެވަނައިގައި އޮތް ލެސްޓަރ ބަލިކޮށްގެން ތާވަލްގެ ކުރިއަށް ޖެހިލުމުގެ ފުރުޞަތު ލިބިގެންދާނެ އެވެ.

ޔުނައިޓެޑް މިހާރު އޮތް ހާލަތުގައި އެކަން ރަނގަޅުވެ، ނޫނީ ގޯސްވެގެން މިހާރަށްވުރެ ދަށް ހާލަތަކަށް ވެއްޓިގެން ހިނގައިދާނެ ކަމަށް ގަބޫލުކުރާ ކަމަށާއި، އޭނާގެ ޓީމުން އަބަދުވެސް ވިސްނާފައި ސަމާލުކަން ދޭނީ ނިކުންނަ ނަތީޖާއަކާ މެދު މާބޮޑަށް އުފާނުކޮށް، ނުވަތަ އެހާބޮޑަށް މާޔޫސްނުވުމަށް ކަމަށް ވެސް އަމޯރިމް ވަނީ ބުނެފައެވެ.

"އަހަރެމެން އެބަޖެހޭ މެޗުތަކުން ކާމިޔާބު ހޯދޭނެކަން ގަބޫލުކުރަން. ދެ މެޗުގެ ދޭތެރޭގައި ތައްޔާރުވުމަށް ލިބޭ ވަގުތުގެ މާބޮޑު މުހިއްމު ކަމެއް ނެތް،" އަމޯރިމް ބުންޏެވެ.

ޔުނައިޓެޑުން ބޭނުންވަނީ ރަނގަޅު ނަތީޖާތަކެއް ނެރެ، ތާވަލްގައި މިހާރު އޮތް މަގާމަށްވުރެ ކުރިއަށް ޖެހިލުމަށް ކަމަށާއި އެންމެ މުހިއްމީ، ޓީމެއްގެ ގޮތުގައި ހޯދަމުން އަންނަ ކުރިއެރުމާއި، މޮޅުވުން ދެމެހެއްޓުން ކަމަށް ވެސް އަމޯރިމްގެ ވާހަކަ ނިންމާލަމުން ބުނެފައިވެއެވެ.