ވެރިކަމުގެ ފަސް އަހަރުގެ ތެރޭގައި ރައްޔިތުންނަށް އިޚްލާޞްތެރިކަމާއެކު ޚިދުމަތް ކުރެއްވުމަށް އަޒުމް ކަނޑައަޅުއްވާފައިވާ ކަމަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ވިދާޅުވެއްޖެ އެވެ.

ޖުމްހޫރީ ދުވަހުގެ މުނާސަބަތުގައި ދަރުބާރުގޭގައި ރޭ ބޭއްވި ރަސްމީ ޖަލްސާގައި ރައީސް މުޢިއްޒު ދެއްކެވި ވާހަކަފުޅުގައި، ވެރިކަމަށް އަންނަ ފަރާތްތަކުން އަމިއްލަ ވެރިކަން ދިފާޢުކުރުމަށް މަސައްކަތް ކުރުމުގެ ބަދަލުގައި ރައްޔިތުންނަށް ޚިދުމަތް ކުރުމުގެ މުހިންމުކަން ފާހަގަކުރެއްވިއެވެ. އަދި ކުރިއަށް އޮތް 20 އަހަރަށް ޤައުމީ ތަރައްޤީގެ މާސްޓަރ ޕްލޭނެއް އެކުލަވާލުމަށް ނިންމަވާފައިވާކަމަށާއި، މި ޕްލޭން އެކުލަވާލުމުގައި ރައްޔިތުންގެ ޚިޔާލާއި މަޝްވަރާ ހޯއްދަވާނެކަމަށް ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވީ، ރާއްޖޭގެ ތަރައްޤީގެ ޕްލޭން ޤާނޫނީ ބާރު ލިބިގެންވާ އެއްޗަކަށް ހެދުމަށް މަސައްކަތް ކުރައްވާނެ ކަމަށެވެ. މިގޮތުން، ރާއްޖޭގެ އުތުރާއި ދެކުނުގައި އިންޓަގްރޭޓެޑް ޑިވެލޮޕްމަންޓް ޒޯންގެ ދެ ޒޯނެއް ތަރައްޤީކުރުމަށާއި، ރާއްޖޭގެ ހަތް ސަރަޙައްދެއްގައި އަރބަން ސެންޓަރުތަކެއް ގާއިމުކުރުމަށް ރޭވިފައިވާ ކަމަށް އެމަނިކުފާނު ހާމަކުރެއްވިއެވެ.