ބްރެޒިލްގެ ތަރި، ނޭމާ އަށް އަނިޔާވެ، ބްރެޒިލަށް ކުރިއަށް އޮތް ފީފާ ވޯލްޑް ކަޕް ކޮލިފައިންގ މެޗުތަކަށް ނެގި ސްކޮޑުން ވަކިވެއްޖެއެވެ.

ނޭމާގެ އިތުރުން ގޯލްކީޕަރު، އެޑަސަން އާއި ޑިފެންޑަރު، ޑަނީލޯ އަށް ލިބިފައިވާ އަނިޔާގެ ސަބަބުން ނުކުޅެވޭނެކަން ބްރެޒިލްގެ ފުޓްބޯޅަ ފެޑެރޭޝަނުން ނެރުނު ވީޑިއޯއެއްގައި އެ ޓީމުގެ ކޯޗު، ޑޮރިވާލް ޖޫނިއާ ވަނީ ބުނެފައެވެ.

އުމުރުން 33 އަހަރުގެ ނޭމާ، މިދިޔަ ޖަނަވަރީ މަހު ސަންޓޯސްއާ އަލުން ގުޅުނުއިރު، މި މަހުގެ ދެވަނަ ދުވަހު ވަނީ އެ ޓީމަށް ކުޅެފައެވެ. ނޭމާގެ ވާތު ފައިގެ ފަލަމަސްގަނޑަށް އަނިޔާވީ އެ މެޗުގައެވެ.

ނޭމާ އަށް ލިބުނު މި އަނިޔާގެ ސަބަބުން ސަންޓޯސް އެންމެ ފަހުން ސައޮ ޕައުލޯ ސްޓޭޓް ޗެމްޕިއަންޝިޕްގެ ސެމީ ފައިނަލުގައި ކޮރިންތިއަންސްއާ ދެކޮޅަށް ކުޅުނު މެޗު ވަނީ ގެއްލިފައެވެ.

ބްރެޒިލްގެ ކުރީގެ ކެޕްޓަން، ނޭމާ އަށް އަނިޔާވެފައި މިވަނީ ގާތްގަނޑަށް 17 މަސްދުވަހުގެ މުއްދަތަކަށްފަހު އެނބުރި ގައުމީ ޓީމާ ގުޅިފައިވަނިކޮށެވެ. މީގެކުރީން، 2023 ވަނަ އަހަރުގެ އޮކްޓޫބަރު މަހު އުރުގުއޭއާ ދެކޮޅަށް ބްރެޒިލް ކުޅުނު މެޗުގައި ނޭމާ އަށް ކަކުލުގެ އޭސީއެލް އަނިޔާއެއް ކުރިމަތިވެ، ދުވަސްތަކަކަށް ކުޅުމާ ދުރަށް ދާން ޖެހިފައިވެއެވެ. މި އަނިޔާއިން ރަނގަޅުވެ، ކުޅުމަށް އެނބުރިއައީ ވަރަށް ފަހުންނެވެ.

ނޭމާގެ ބަދަލުގައި ރެއާލް މެޑްރިޑްގެ ޒުވާން ފޯވާޑް، އެންޑްރިކް ސްކޮޑަށް އިތުރުކޮށްފައިވާއިރު، ކީޕަރު، އެޑަސަން އާއި ޑަނީލޯގެ ބަދަލުގައި އޮލިމްޕިކް ލިޔޯންގެ ގޯލްކީޕަރު، ލޫކަސް ޕެރީ އާއި އަލެކްސް ސެންޑްރޯ ވަނީ ގެނެސްފައެވެ.

ދެކުނު އެމެރިކާގެ ކޮލިފައިންގ ގްރޫޕުގެ ފަސްވަނައިގައި މި ވަގުތު އުޅޭ ބްރެޒިލަށް ދެން އެންމެ އެންމެ އަވަހަށް އޮތީ މި މަހުގެ 21 ވަނަ ދުވަހު ރަށުން ބޭރުގައި ކޮލަމްބިއާއާ ދެކޮޅަށް ކުޅެން ޖެހޭ މެޗެވެ. އޭގެ ފަސް ދުވަސް ފަހުން ރަށުން ބޭރުގައި ނިކުންނާނީ ވާދަވެރި އާޖެންޓީނާއާ ދެކޮޅަށެވެ.