އެސްޓަން ވިލާ އަށް ކުޅެމުން އަންނަ މާކަސް ރަޝްފޯޑަށް އިންގްލެންޑްގެ އައު ކޯޗު، ތޯމަސް ޓުޗެލްގެ ފުރަތަމަ ސްކޮޑުން ޖާގަ ދީފިއެވެ.

މީގެކުރިން، ގަވާއިދުން އިންގްލެންޑް ޓީމުން ޖާގަ ހޯދަމުން އައި ރަޝްފޯޑަށް އެންމެ ފަހުން ގައުމީ ޓީމުން ފުރުޞަތު ލިބިފައިވަނީ މިދިޔަ އަހަރުގެ މާރިޗް މަހު ބްރެޒިލްއާ ދެކޮޅަށް ކުޅުނު އެކުވެރިކަމުގެ މެޗެއްގައެވެ.

މިދިޔަ ދުވަސްތަކުގައި ޔުނައިޓެޑްގައި އެންމެ އެކަށީގެންވާ ވަރަށް ކުޅުމުގެ ފުރުޞަތު ނުލިބި، ފޯމު ދަށްވުމުގެ ސަބަބުން މި އަހަރުގެ ޖަނަވަރީ މަހު ލޯނެއްގައި އެސްޓަން ވިލާ އަށް ބަދަލުވެ، ރަނގަޅު ކުޅުމެއް ދެއްކުމުން އައު ކޯޗު، ޓުޗެލްގެ ސްކޮޑުން ފުރުޞަތު ލިބުނީ އެވެ.

މިދިޔަ ޔޫރޯ ފުޓްބޯޅަ މުބާރާތުގައި ލިބުނު ނާކާމިޔާބީއަށް ފަހު އޭރުގެ ކޯޗު، ގަރެތު ސައުތުގޭޓް މަގާމު ދޫކޮށްލުމުން އައު ކޯޗު، ޓުޗެލްގެ ފުރަތަމަ ސްކޮޑުގައި މި ފަހަރު މުޅިން އަލަށް ގައުމީ ޓީމުން ޖާގަ ހޯދި ކުޅުންތެރިންގެ ތެރޭގައި ނިއުކާސަލް ޔުނައިޓެޑްގެ ޑޭން ބާން އާއި އާސެނަލްގެ ޒުވާން ފުލްބެކް، މައިލްސް ލުވިސް-ސްކެލީ ހިމެނެއެވެ. އަދި، މި ފަހަރުގެ ސްކޮޑަށް ނެގި ބާންލީގެ ގޯލްކީޕަރު، ޖޭމްސް ޓްރެފޯޑް އާއި ލިވަޕޫލްގެ ޑިފެންޑަރު، ޖަރެލް ކުއަންސާ ވެސް ތިބީ ފުރަތަމަ ފަހަރަށް ގައުމީ ޓީމަށް ކުޅުމުގެ އުއްމީދުގައެވެ.

މީގެއިތުރުން، ދުވަސްތަކަކަށްފަހު ލިވަޕޫލްގެ ކުރީގެ ކެޕްޓަން، ޖޯޑަން ހެންޑަސަން އަށް މި ފަހަރުގެ ޓީމު ޖާގަ ދީފައިވާއިރު، އަނިޔާއަށްފަހު ޓޮޓްނަމް ހޮޓްސްޕަރގެ ފޯވާޑް، ޑޮމިނިކް ސޮލާންކޭ ވަނީ އެނބުރި ޓީމާ ގުޅިފައެވެ.

ޓުޗެލްގެ އިރުޝާދުގެ ދަށުން އިންގްލެންޑް ކުޅޭ ފުރަތަމަ މެޗުތަކުގައި 2026 ވަނަ އަހަރުގެ ފީފާ ވޯލްޑް ކަޕް ކޮލިފައިންގައި މި މަހުގެ 21 ވަނަ ދުވަހު އަލްބޭނިއާ އާ ދެކޮޅަށް ނުކުންނައިރު، އޭގެ ތިން ދުވަސް ފަހުން ނުކުންނާނީ ލެޓްވިއާއާ ދެކޮޅަށެވެ.

އިންގްލެންޑްގެ ސްކޮޑު:

ގޯލްކީޕަރުން: ޑީން ހެންޑަސަން (ކްރިސްޓަލް ޕެލަސް)، ޖޯޑަން ޕިކްފޯޑް (އެވަރޓަން)، އާރޮން ރަމްސްޑޭލް (ސައުތެމްޓަން)، ޖޭމްސް ޓްރެފޯޑް (ބާންލީ).

ޑިފެންޑަރުން: ޑޭން ބާން (ނިއުކާސަލް ޔުނައިޓެޑް)، ލެވީ ކޯލްވިލް (ޗެލްސީ)، މާކް ގޭހީ (ކްރިސްޓަލް ޕެލަސް)، ރީސް ޖޭމްސް (ޗެލްސީ)، އެޒްރީ ކޮންސާ (އެސްޓަން ވިލާ)، މައިލްސް ލުވިސް-ސްކެލީ (އާސެނަލް)، ޓީނޯ ލިވްރަމެންޓޯ (ނިއުކާސަލް ޔުނައިޓެޑް)، ޖެރެލް ކުއަންސާ (ލިވަޕޫލް)، ކައިލް ވޯކާ (އޭސީ މިލާން)

މިޑްފީލްޑަރުން: ޖޫޑް ބެލިންގހަމް (ރެއަލް މެޑްރިޑް)، އެބެރެޗީ އެޒޭ (ކްރިސްޓަލް ޕެލަސް)، ޖޯޑަން ހެންޑަސަން (އަޔެކްސް)، ކާޓިސް ޖޯންސް (ލިވަޕޫލް)، ކޯލް ޕާމާ (ޗެލްސީ)، ޑެކްލަން ރައިސް (އާސެނަލް)، މޯގަން ރޯޖާސް (އެސްޓަން ވިލާ).

ފޯވާޑުން: ޖަރޮޑް ބޮވެން (ވެސްޓް ހޭމް ޔުނައިޓެޑް)، ފިލް ފޯޑެން (މެންޗެސްޓަރ ސިޓީ)، އެންތަނީ ގޯޑަން (ނިއުކާސަލް ޔުނައިޓެޑް)، ހެރީ ކޭން (ބަޔާން މިއުނިކް)، މާކަސް ރަޝްފޯޑް (އެސްޓަން ވިލާ)، ޑޮމިނިކް ސޮލާންކޭ (ޓޮޓްނަމް ހޮޓްސްޕަރ).