މިހާރު ކުރިއަށްދާ ކޮންކާކަފް ޗެމްޕިއަންސް ކަޕްގައި މިއަދު ކުޅުނު ގަދަ 16 ގެ ބުރުގެ މެޗުގައި ޖެމެއިކާގެ ކަވާލިއާ އެސްސީ 2-0 އިން ބަލިކޮށް، އިންޓަރ މިއާމީ އިން ކުއާޓަރ ފައިނަލަށް ދަތުރުކޮށްފިއެވެ.

މި ދެ ޓީމުގެ މެދުގައި ކުޅުނު ފުރަތަމަ ލެގުގެ މެޗުން ވެސް 2-0 އިން ކާމިޔާބުކޮށް، މިއާމީން ވަނީ 4-0 ގެ އެގްރިގޭޓުން ކުރިހޯދައިފައެވެ.

ޖެމެއިކާގައި ހުންނަ އިންޑިޕެންޑެންސް ޕާކުގައި ކުޅުނު މެޗުގެ ފުރަތަމަ ހާފު ނިމެންދަނިކޮށް، މިއާމީ އަށް ލީޑު ނަގައިދިނީ ލުއިސް ސުއަރޭޒް އެވެ.

މި މެޗުގައި މިއާމީން ޖެހި ދެވަނަ ލަނޑު، އިތުރު ވަގުތުގެ ތެރޭގައި ކާމިޔާބުކޮށްދިނީ އާޖެންޓީނާގެ ކެޕްޓަން، ލިއޮނަލް މެސީ އެވެ. މި މުބާރާތުގައި އެ ޓީމު އެންމެ ފަހުން ކުޅުނު މެޗުގައި މެސީ ނުކުޅެއެވެ.

މެޗަށްފަހު ވާހަކަދައްކަމުން މިއާމީގެ ކޯޗު، ހަވިއޭ މަޝެރާނޯ ބުނީ، މިއާމީ އެންމެ ފަހުން ކުޅުނު ތިން މެޗުގައި މެސީ ބައިވެރިނުވީ މާބޮޑަށް ވަރުބަލިވުމުން، އަރާމުކުރަން ފުރުޞަތުދިނުމުގެ ގޮތުން ކަމަށެވެ. އަދި، ޖެމެއިކާގައި ކުޅުނު ދެވަނަ ލެގުގެ މެޗުގައި މެސީ ކުޅުވުމާމެދު ގޮތެއް ނިންމާފައިވަނީ އެންމެ ފަހު ވަގުތުގައި ކަމަށް ވެސް މަޝެރާނޯ ފާހަގަކުރިއެވެ.

މުބާރާތުގެ ކުއާޓަރ ފައިނަލުގައި މިއާމީ ނިކުންނާނީ ލޮސް އެންޖެލިސް އެފްސީއާ ދެކޮޅަށެވެ.