އަމިއްލަ ދަނޑުގައި 1-0 އިން ޑެންމާކްގެ ކޯޕަންހޭގަން ބަލިކޮށް، ޗެލްސީ ޔުއެފާ ކޮންފަރެންސް ލީގުގެ ކުއާޓަރ ފައިނަލަށް ދަތުރުކޮށްފިއެވެ.

ރޭގެ ނަތީޖާއާއެކު، ޗެލްސީ ވަނީ ދެ މެޗުގެ އެގްރިގޭޓް 3-1 އިން ކުރިހޯދައިފައެވެ.

ސްޓެމްފޯޑް ބްރިޖްގައި ކުޅުނު މެޗުގައި ފެނިގެންދިޔަ ހަމައެކަނި ލަނޑު، ދެވަނަ ހާފުގައި ޗެލްސީ އަށް ކާމިޔާބުކޮށްދިނީ ކިއެނާން ޑޫސްބަރީ-ހޯލް އެވެ.

މުބާރާތުގެ ކުއާޓާގައި ޗެލްސީ ނުކުންނަންޖެހެނީ ޕޮލެންޑްގެ ލެގިއާ ވަރޒާވާއާ ދެކޮޅަށެވެ.

މި މުބާރާތުގައި ރޭ ކުޅުނު އެހެން މެޗުތަކުގެ ނަތީޖާއަށް ބަލާއިރު، ފިއޮރެންޓީނާގެ ދަނޑުގައި އެ ޓީމު ވަނީ 3-1 އިން ގްރީސްގެ ޕެނަތިނައިކޯސް ބަލިކޮށް، 5-4 ގެ އެގްރިގޭޓުން ކުރިހޯދައިފައެވެ.