ފާއިތުވެދިޔަ ތިން އަހަރުގެ ކްރިކެޓްގެ އެކި ފަރާތްތަކުގެ އަގުވަޒަންކުރުމުގެ ގޮތުން ރޭ ބޭއްވި "ކްރިކެޓް ހަވީރު" ގައި މިދިޔަ އަހަރުގެ އެންމެ މޮޅު ކްރިކެޓް ކުޅުންތެރިއަކަށް ޔޫސުފް އަޒްޔާން ފަރުހަތު ހޮވިއްޖެއެވެ.

ޣިޔާޘުއްދީން ސްކޫލުގައި ރޭ ބޭއްވި "ކްރިކެޓް ހަވީރު" ގައި މިހާރު ގައުމީ ކްރިކެޓް ޓީމުގެ ކެޕްޓަންކަން ކުރަމުންއަންނަ އަޒްޔާން ވަނީ، މިދިޔަ ދެ އަހަރުގެ އެންމެ މޮޅު ބެޓްސްމަންގެ އެވޯޑް ވެސް ހާސިލްކޮށްފައެވެ.

ދެހާސް ބާވީހާއި 2023 ވަނަ އަހަރުގެ އެންމެ މޮޅު ކްރިކެޓް ކުޅުންތެރިއަކަށް ހޮވުނީ އާދަމް ނާސިފް އުމަރު އެވެ. ދެހާސް ތޭވީސް ވަނަ އަހަރުގެ އެންމެ މޮޅު އަންހެން ކްރިކެޓް ކުޅުންތެރިޔާގެ މަގާމާއި، އެ އަހަރުގެ އެންމެ މޮޅު ބެޓާގެ މަގާމުގެ އިތުރުން އަތޮޅު ކްރިކެޓްގެ އެންމެ މޮޅު ކުޅުންތެރިއަކަށް ހޮވުނީ ސުމައްޔާ ބިންތި ހަމީދު އެވެ.

ރޭގެ ރަސްމިއްޔާތުގައި ފާއިތުވި ތިން އަހަރު އެކި ގޮތްގޮތުން ފާހަގަކުރެވުނު މޮޅު ކުޅުންތެރިންނާއި، ކުޅިވަރު ކުރިއެރުވުމަށް އެހީތެރިކަން ފޯރުކޮށްދިން ފަރާތްތަކަށް ވެސް އެވޯޑާއި ހަނދާނީ ފިލާ ދީފައިވެއެވެ.

ދެހާސް ބާވީހާއި 2023 ވަނަ އަހަރުގެ އެންމެ ޚިދުމަތްތެރި ކުލަަބަކަށް މިލާން ކްރިކެޓް އެކަޑެމީ ހޮވުނުއިރު، މިދިޔަ އަހަރުގެ އެވޯޑް ހާސިލްކުރީ ސީބީއެލް ސްޕޯޓްސް އެވެ.

މި ރަސްމިއްޔާތުގައި ކްރިކެޓް ނިއު އިނިޝިއޭޓިވް އިފްތިތާހުކޮށްދެއްވީ ޝަރަފުވެރި މެހެމާނު، ކުޅިވަރާއި ހަށިހެޔޮކަމާބެހޭ ވަޒީރު، އަބްދުﷲ ރާފިޢު އެވެ. މީގެއިތުރުން، ކްރިކެޓްގެ ޝަރަފުވެރި މަގާމުތައް ހާސިލްކުރި އެންމެހާ ފަރާތްތަކަށް އެވޯޑް ހަވާލުކޮށްދެއްވީ ވެސް ވަޒީރު ރާފިޢު އެވެ.