ENGLISH

04 އޭޕްރީލު 2025

Advertisement

ލިވަޕޫލްގައި މަޑުކުރާނެކަމާމެދު ވަކި އެއްޗެއް ބުނާކަށް ނޭނގޭ: ވެން ޑައިކް

13 މާރިޗު 2025

|

މުޙައްމަދު އަދުހަމް

ލިވަޕޫލްގެ ކެޕްޓަން، ވެން ޑައިކް. --ފޮޓޯ: ގެޓީ އިމޭޖަސް

ލިވަޕޫލްގެ ކެޕްޓަންކަން ކުރަމުން އަންނަ ނެދަލެންޑްސްގެ ޑިފެންޑަރު، ވާޖިލް ވެން ޑައިކް މި ސީޒަނުގެ ނިޔަލަށް އެ ޓީމުގައި މަޑުކުރާނެ ކަމާމެދު މި ވަގުތު އެއްޗެއް ބުނަން ނޭނގޭ ކަމަށް ބުނެފިއެވެ.

އުމުރުން 33 އަހަރުގެ ވެން ޑައިކްގެ އިތުރުން ލިވަޕޫލްގެ މިސްރު ފޯވާޑް، މުޙައްމަދު ސަލާހު އާއި އިނގިރޭސި ޑިފެންޑަރު، ޓްރެންޓް އެލެގްޒެންޑާ-އާނޯލްޑްގެ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ.

އެކަމަކު، ލިވަޕޫލާއެކު ވެން ޑައިކް އާ ކޮންޓްރެކްޓެއްގައި ސޮއިކުރުމަށް މަޝްވަރާތައް ކުރިއަށްގެންދާތާ ދުވަސްކޮޅެއް ވެއްޖެއެވެ. އަދި، މީގެކުރީން ވެން ޑައިކް ވަނީ ލިވަޕޫލާއެކު ހަދާފައިވާ އެއްބަސްވުން އާ ކުރަން ބޭނުންވާ ކަމަށް ބުނެފައެވެ.

ނަމަވެސް، ޔުއެފާ ޗެމްޕިއަންސް ލީގުގެ ނޮކްއައުޓް ބުރުގައި ރޭ އަމިއްލަ ދަނޑުގައި ޕީއެސްޖީ އަތުން ޕެނަލްޓީ ޖަހައިގެން ބަލިވި މެޗަށްފަހު ވެން ޑައިކް ބުނެފައިވަނީ މުސްތަގުބަލާމެދު އަދިވެސް ޔަގީންކަމެއް ނެތް ކަމަށެވެ.

"ތެދު ތެދަށް ބުނަންޔާ... އަހަރެންގެ ކުރިމަގާ މެދު މި ވަގުތު ބުނާނެ އެއްޗެއް ނޭނގޭ." ވެން ޑައިކް ބުންޏެވެ.

ވެން ޑައިކް ބުނީ، އަންނަ އަހަރު ވާނެ ގޮތެއް މި ވަގުތަށް ބުނަން ނޭނގޭ ކަމަށާއި، އެކަމާ ބެހޭގޮތުން އެނގޭ ކަމަށް ބުނާ މީހަކު ހުރިނަމަ އެ ހަދަނީ ދޮގު ކަމަށެވެ.

ކުލަބާއެކު މަޝްވަރާތައް ކުރިއަށްގެންދާކަން އެންމެންނަށް ވެސް އެނގޭނެ ކަމަށާއި، މީހުންނަށް އެނގޭނެ ހަމައެކަނި މައުލޫމާތަކީ އެއީ ކަމަށް ވެސް ވެން ޑައިކްގެ ވާހަކައިގައި ފާހަގަކުރިއެވެ.

ވެން ޑައިކްއާ އެކު ލިވަޕޫލުން ކުރިއަށްގެންދާ އައު ކޮންޓްރެކްޓްގެ މަޝްވަރާތައް މެދުކަނޑާލައިފައިވަނީ، ސީޒަނުގައި ކުރިއަށްހުރި މެޗުތަކުގެ ސަބަބުން އެކަމަށް ފުރިހަމައަށް އިސްކަންދިނުމުގެ ގޮތުން ކަމަށް އެހުމުން ބުނީ، އެއްވެސް ކަމެއް މެދުކަނޑާލައިފައިނުވާ ކަމަށެވެ.

ކިޔުންތެރިންގެ ހިޔާލު