ޕާކިސްތާނުގެ ހަމަނުޖެހުން ބޮޑު ބަލޮޗިސްތާނު ސަރަޙައްދުން ދަތުރުކުރަމުންދިޔަ ރޭލަކަށް ޙަމަލާދިން ހަނގުރާމަވެރިން މަރާލައި، ހުރިހާ ރަހީނުން މިނިވަންކޮށްފައިވާ ކަމަށް ޕާކިސްތާނުގެ އަސްކަރިއްޔާއިން ބުނެފިއެވެ.

މި ޙަމަލާގެ ޒިންމާ، އެ ސަރަޙައްދުގައި ހަރަކާތްތެރިވާ ހަނގުރާމަވެރި ޖަމާޢަތް، ބަލޮޗިސްތާނު ލިބަރޭޝަން އާމީ (ބީއެލްއޭ) އިން ވަނީ ނަގައިފައެވެ.

ބީއެލްއޭ ހަނގުރާމަވެރިން ވަނީ، ރޭލު ދަނގަޑުގެ ބައެއް ގޮއްވާލައި، ރޭލަށް އަރައި، އޭގެން ދަތުރުކުރަމުންދިޔަ 450 އެއްހާ ފަސަންޖަރުން ރަހީނުކޮށްފައެވެ.

ރަހީނުން ސަލާމަތްކުރަން، 30 ގަޑިއިރު ހަނގުރާމަވެރިންނާ ކުރިމަތިލުންތައް ހިނގާފައިވެއެވެ.

"346 ރަހީނުން މިނިވަންކޮށް، ހަނގުރާމަވެރިންގެ 30 މީހަކު ވަނީ މަރާލާފައި،" އަސްކަރިއްޔާގެ އޮފިޝަލަކު ވިދާޅުވިއެވެ.

އަދި ހަނގުރާމަވެރިންނާ އެކު ހިނގި ކުރިމަތިލުންތަކުގައި ސިފައިންގެ މީހަކު ވެސް މަރުވެފައިވާ ކަމަށް ރިޕޯޓުތައް ބުންޏެވެ.