ދިވެހި ސަރުކާރުގެ ސިޔާސަތު ބިނާވާންވާނީ ދިވެހި ރައްޔިތުންނަށް އެންމެ މަސްލަހަތު ހުންނާނެ ގޮތުގެ މައްޗަށް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ ޖުމްހޫރީ ދުވަހުގެ މުނާސަބަތުގައި  ދަރުބާރުގޭގައި ރޭ ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާގެ ވާހަކަފުޅުގައި، އެ މަނިކުފާނުގެ ސަރުކާރުގައި އެންމެ އިސްކަމެއް ދެއްވާނީ ޤައުމުގެ މިނިވަންކަން ހިމާޔަތް ކުރުމަށާއި، ޤައުމުގެ އަމިއްލަވަންތަކަން ޔަގީންކުރުމަށް ކަމުގައި ވިދާޅުވިއެވެ. އަދި މި ސަރުކާރުން ޤައުމުތަކާ އެކު ރަހުމަތްތެރިކަން ބާއްވާނެ ކަމަށާއި ހަތުރުވެރިކަމެއް، ހަސަދަވެރިކަމެއް ނުބާއްވާނެ ކަމުގައި އެ މަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ އިތުރަށް ވިދާޅުވީ، މި ރާއްޖޭގައި ތިބި ބޭރުގެ ސިފައިން ހިމޭން ރީތި މިންގަނޑުތަކުން މަޝްވަރާކޮށްގެން، ޑިޕްލޮމަސީގެ ރިވެތި އުސޫލުން ކުރެވުނު މަޝްވަރާއިން، މި އަހަރުގެ މެއި 10 ގައި މި ޤައުމުން ބޭލިފައިވާ ކަމަށެވެ.

ދިވެހި ރާއްޖޭގެ ކަނޑުން ގެއްލުވާލި ބައި އަނބުރާ ހޯދުމަށް ސަރުކާރުން ކުރައްވަމުންގެންދަވާ މަސައްކަތްޕުޅުގެ މައްޗަށް ވެސް ރައީސުލްޖުމްހޫރިއްޔާ އަލިއަޅުއްވާލެއްވިއެވެ. އެގޮތުން އެޓަރނީ ޖެނެރަލްގެ އޮފީހުގެ ބޭފުޅަކު އ.ދ. ގައި ބަހައްޓަވައިގެން އަދި ޤާނޫނީ ވަކީލުންގެ ޓީމަކުން ވެސް ގިނަ މަސައްކަތްތަކެއް މެދުކެނޑުމެއްނެތި ކުރައްވަމުންގެންދާ ކަމުގައި އެ މަނިކުފާނު ވިދާޅުވި އެވެ.

މީގެ އިތުރުން، ދިވެހިރާއްޖޭގެ އެކްސްކްލޫސިވް އިކޮނޮމިކް ޒޯން ބެލެހެއްޓުމަށްޓަކައި ވައިގެ ބާރެއް ސިފައިންގޭގައި އުފައްދަވައި، އެކަމަށް ބޭނުންވާ ޔޫ.އޭ.ވީ. ގެންނަވައިގެން ރެޔާއި ދުވާލު ކަނޑުގެ މި ބިޔަ ބޮޑު ސަރަޙައްދު ބަލަހައްޓަމުންދާކަން ރައީސުލްޖުމްހޫރިއްޔާ ފާހަގަކުރެއްވިއެވެ.

މި ޖަލްސާގައި ރައީސުލްޖުމްހޫރިއްޔާ ވަނީ ދިވެހިރާއްޖޭގެ މުސްތަޤްބަލާ ގުޅޭ ގޮތުން ވެސް ވަނީ ވާހަކަފުޅު ދައްކަވާފައެވެ. އެގޮތުން، ދިވެހި ރާއްޖޭގެ ތަރައްޤީއަށް ކުރިއަށް އޮތް ތަނުގައި އިތުރު މަސައްކަތްތަކެއް ކުރައްވާނެ ކަމަށް ވިދާޅުވިއެވެ. ޚާއްޞަކޮށް ތަޢުލީމީ ދާއިރާ އާއި، ޞިއްޙީ ދާއިރާ އަދި އިޤްތިޞާދީ ދާއިރާއަށް އިތުރު ސަމާލުކަމެއް ދެއްވާނެ ކަމަށް ވިދާޅުވިއެވެ.

ރައީސުލްޖުމްހޫރިއްޔާ އިތުރަށް ވިދާޅުވި ގޮތުގައި، ދިވެހި ރާއްޖޭގެ ޒުވާނުންނަށް ވަޒީފާގެ ފުރުޞަތުތައް އިތުރުކުރުމަށް ޚާއްޞަ އިސްކަމެއް ދެއްވާނެއެވެ. އަދި ޒުވާނުންގެ ހުނަރުވެރިކަން އިތުރުކުރުމަށް އާ ތަމްރީނު ޕްރޮގްރާމްތަކެއް ތަޢާރަފުކުރައްވާނެ ކަމަށް ވެސް ވިދާޅުވިއެވެ.

ތިމާވެށި ރައްކާތެރިކުރުމާ ގުޅޭ ގޮތުން ވެސް ރައީސުލްޖުމްހޫރިއްޔާ ވާހަކަފުޅު ދެއްކެވިއެވެ. މޫސުމަށް އަންނަ ބަދަލުތަކާ ގުޅިގެން ދިވެހިރާއްޖެއަށް ކުރިމަތިވެފައިވާ ގޮންޖެހުންތަކަށް ޙައްލު ހޯދުމަށް ބައިނަލްއަޤްވާމީ މުޖުތަމަޢުއާ އެކު މަސައްކަތްކުރައްވާނެ ކަމަށް ވިދާޅުވިއެވެ.

ރޭ ޖަލްސާގައި ދިވެހި ރާއްޖޭގެ ތަޢުލީމަށް ޚިދުމަތްކުރުމުގެ އެންމެ މަތިވެރި ޝަރަފު، ނިޝާން ޢިއްޒުއްދީނުގެ ޢިއްޒަތުގެ ވެރިޔާ (ނ.ޢ.ޢ.ވ)، ޑޮކްޓަރ މުޙައްމަދު ޒާހިރު ޙުސައިނަށް އަރުވައި، 53 ބޭފުޅަކަށް ޝަރަފުގެ ބެޖާއި އައްޑަނަ ދެއްވައި، އަދި 40 ބޭފުޅަކަށް ރައީސުލްޖުމްހޫރިއްޔާގެ ޚާއްޞަ އިނާމު ދެއްވާފައިވެ އެވެ.