ENGLISH

04 އޭޕްރީލު 2025

Advertisement

ޙަމަލާތައް ހުއްޓައިލަން ރަޝިޔާއިން ވެސް އެއްބަސްވާނެކަމުގެ އުއްމީދު ބޮޑު: ޓްރަމްޕް

13 މާރިޗު 2025

|

ހަސަން އާމިރު

ރަޝިޔާއާ ދެކޮޅަށް ޔޫކްރޭނުން ކުރަމުންދާ ހަނގުރާމައިގައި، 30 ދުވަހަށް ޙަމަލާތައް ހުއްޓައިލުމަށް އެމެރިކާ މެދުވެރިވެގެން ހުށަހަޅާފައިވާ ހުށަހެޅުމަށް ރަޝިޔާ އިން ވެސް އެއްބަސްވާނެކަމުގެ އުއްމީދު ބޮޑުކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

އެމެރިކާ އާއި ޔޫކްރޭނުން ސައުދީ އަރަބިއްޔާގައި ކުރިއަށް ގެންދިޔަ މަޝްވަރާތަކަށްފަހު، އެމެރިކާއިން ހުށަހެޅި ގޮތަށް 30 ދުވަހަށް ޙަމަލާތައް ހުއްޓައިލަން ޔޫކްރޭނުން ވަނީ އެއްބަސްވެފައެވެ.

އަދި އެ ހުށަހެޅުން ހިފައިގެން، އެމެރިކާގެ މަންދޫބުން މިހާރު ވަނީ ރަޝިޔާއަށް ވަޑައިގެންފައެވެ.

އެނގިފައިވާ ގޮތުގައި، އެއްވެސް ޝަރުތަކާ ނުލައި އެ ހުށަހެޅުމަށް އެއްބަސްވާން އެމެރިކާއިން އެދޭނެއެވެ.

ތިން އަހަރުގެ މި ހަނގުރާމައަށް ލިބުނު ކުރިއެރުން ހޯދަން، ރަޝިޔާއަށް ވިސްނައިދިނުމަކީ އެމެރިކާގެ ޒިންމާއެއް ކަމަށް ޔޫކްރޭނުގެ ރައީސް ވޮލޮޑިމިޔަރ ޒެލެންސްކީ ވަނީ ވިދާޅުވެފައެވެ.

ނަމަވެސް، އެ ހުށަހެޅުމާ ގުޅޭގޮތުން ރަޝިޔާއިން އަދި ވަކި އެއްޗެއް ބުނެފައެއް ނުވެއެވެ.

މި ހުށަހެޅުމަށް އެއްވެސް ޝަރުތަކާ ނުލައި އެއްބަސްވުނުވެއްޖެނަމަ، ރަޝިޔާއަށް ދަތިކުރުމުގެ ފިޔަވަޅު އެޅުމުގެ އިންޒާރު ޓްރަމްޕް ދެއްވިއެވެ.

"މާލީ ގޮތުން ރަޝިޔާއަށް ވަރަށް ދަތިވާ ފިޔަވަޅުތަކެއް އަޅުގަނޑުމެންނަށް އެޅި ދާނެ. އެކަމަކު އަޅުގަނޑު އެކަހަލަ ފިޔަވަޅެއް އަޅާކަށް ބޭނުމެއް ނޫން. އެއީ ސުލްޙަ ޤާއިމުކުރަން ބޭނުންވާތީ،" ޓްރަމްޕް ވިދާޅުވިއެވެ.

ސައުދީގައި މަޝްވަރާތައް ފެށީ އެމެރިކާގެ ރައީސް ޑޮނަލްޑް ޓްރަމްޕް އާއި ޒެލެންސްކީ، ވައިޓް ހައުސްގައި ބޭއްވި ބައްދަލުވުން ދެ ރައީސުންގެ މެދުގައި ބޮޑު އަރައިރުމަކަށް ބަދަލުވެ، ދެ ރައީސުންގެ މެދުގައި ބަހުގެ ހޫނު ޙަމަލާތަކެއް ބަދަލުކޮށްފައިވާ ދަނޑިވަޅެއްގައެވެ.

ވައިޓް ހައުސްގެ އޯވަލް އޮފީހުގެ ބައްދަލުވުން ހޫނުވީ، ރަޝިޔާގެ ރައީސް ވްލެޑެމިޔަރ ޕޫޓިންއާ އެކު މަޝްވަރާ އިސްކޮށް، ސުލްޙަވެރި ޙައްލެއް ގެންނަން ޒެލެންސްކީއަށް ބާރު އަޅަން ފެށުމުންނެވެ.

އޭގެފަހުން، ޓްރަމްޕް ވަނީ އެމެރިކާއިން ޔޫކްރޭނަށް ފޯރުކޮށްދެމުންދާ އަސްކަރީ އެހީ މި ވަގުތަށް މަޑުޖައްސައިލަން ނިންމަވައިފައެވެ.

ކިޔުންތެރިންގެ ހިޔާލު