ޔުއެފާ ޗެމްޕިއަންސް ލީގުގެ ގަދަ 16 ގެ ބުރުގައި ރޭ ކުޅުނު މެޗުގައި ޕެނަލްޓީ ޖަހައިގެން 4-2 އިން އެތުލެޓިކޯ މެޑްރިޑް ބަލިކޮށް، ރެއާލް މެޑްރިޑް އެ މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.

މި ދެ ޓީމުގެ މެދުގައި މީގެ ހަފްތާއެއްހާ ދުވަސްކުރިން، ރެއާލްގެ ދަނޑުގައި ކުޅުނު މެޗުން އެ ޓީމު މޮޅުވީ 2-1 އިންނެވެ.

އެތުލެޓިކޯގެ ދަނޑުގައި ކުޅުނު މެޗު ފެށިތާ 27 ވަރަކަށް ސިކުންތުގެ ތެރޭގައި އެ ޓީމަށް ލީޑު ނަގައިދިނީ ކޮނާ ގަލަގާ އެވެ.

އޭގެފަހުން، މެޗުގެ 70 ވަނަ މިނެޓުގައި ރެއާލަށް ލިބުނު ޕެނަލްޓީއަކުން ވިނީޝިއުސް ޖޫނިއާ ފޮނުވާލި ބޯޅަ ދިޔައީ ގޯލަށް ވުރެ މާމަތިންނެވެ.

މިއާއެކު، މެޗުގެ ފުރިހަމަ ވަގުތު ހަމަވިއިރު ދެ ޓީމު 1-1 ގެ އެގްރިގޭޓުން އެއްވަރުވެ، އިތުރު ވަގުތުގެ 15 މިނެޓުގެ ދެ ހާފުގައި ވެސް ނަތީޖާ ބަދަލުނުވުމުން ޖެހުނީ ޕެނަލްޓީއަށް ދާށެވެ.

ޕެނަލްޓީ ޝޫޓްއައުޓްގައި ދެ ޓީމު ހިމެނޭ ގޮތަށް އެންމެ ފުރަތަމަ ފޮނުވާލި ތިން ޕެނަލްޓީ ކާމިޔާބުކުރިއިރު، އެތުލެޓިކޯ އިން ދެވަނަ އަށް ޕެނަލްޓީ ފޮނުވާލަންދިއުމުން ހޫލިއަން އަލްވަރޭޒް ވެއްޓުނު ވަގުތު ދެފަހަރަށް ބޯޅައިގައި ޖެހުނު ކަމަށް ވީއޭއާރް އިން ބެލުމަށްފަހު ނިންމާ، އެ ޕެނަލްޓީ ގަބޫލެއް ނުކުރިއެވެ.

އޭގެފަހުން، ރެއާލުން ފެޑެރީކޯ ވަލްވާޑޭ ފޮނުވާލި ޕެނަލްޓީ ކާމިޔާބުކޮށް، ނަތީޖާ 3-1 އަށް ބަދަލުކޮށްލާފައިވަނިކޮށް، ރެއާލުން ދެން ލޫކަސް ވަޒްކޭޒް ފޮނުވާލި ޕެނަލްޓީ އެތުލެޓިކޯގެ ގޯލްކީޕަރު، ޔެން އޮބްލަކް މަތަކުރިއެވެ. އެކަމަކު، އެތުލެޓިކޯގެ މާކަސް ލޮރެންޓޭ ފޮނުވާލި ބޯޅަ ހުރަސްދަނޑިއަށް އަމާޒުވުމުން، ރެއާލް މޮޅުވީ އެންޓޯނިއޯ ރުޑިގާ ވައްދާލި ޕެނަލްޓީންނެވެ.

މުބާރާތުގެ ކުއާޓާ ފައިނަލުގައި ރެއާލް ނުކުންނާނީ އާސެނަލްއާ ދެކޮޅަށެވެ. އާސެނަލުން ވަނީ ރޭ އަމިއްލަ ދަނޑުގައި 2-2 އިން ނެދަލެންޑްސްގެ ޕީއެސްވީ އެއިންދޯވަންއާ އެއްވަރުވިނަމަވެސް، 9-3 ގެ އެގްރިގޭޓުން ކުރި ހޯދައިފައެވެ.