ވެރިކަމަކީ ލިބޭ މޮޅުކަމަކާއި މުދާގަނޑެއް ނޫންކަމަށާއި އެއީ ބުރަ މަސްއޫލިއްޔަތަކާއި ބޮޑު ޒިންމާއެއް ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ދަރުބާރުގޭގައި ރޭ ބޭއްވި ޖުމްހޫރީ ދުވަހުގެ ރަސްމީ ޖަލްސާގައި ޤައުމާ މުޚާޠަބުކުރައްވަމުން ދެއްކެވި ވާހަކަފުޅުގައެވެ.

ޖުމްހޫރީ ދުވަހަކީ ރައްޔިތުންގެ ދުވަހެއް ކަމާއި، ޖުމްހޫރީ ވެރިކަމަކީ ރައްޔިތުންގެ ވެރިކަމެއްކަން ފާހަގަކުރައްވައި ރައީސް ވިދާޅުވީ، އެމަނިކުފާނުގެ ވެރިކަމަށް މަގު ދައްކާ އަލިމަގަކީ ކީރިތި ޤުރުއާނާއި ސުންނަތުގެ އިތުރުން އެމަނިކުފާނުގެ ބައްޕާފުޅު ލިޔުއްވާފައިވާ ފޮތް "ދައުލަތާއި ވެރިންނާއި މަސްއޫލިއްޔަތު އަދި ކިޔަމަންވުމުގެ މަފްހޫމު" ކަމަށެވެ.

ރައީސުލްޖުމްހޫރިއްޔާއަކީ ވަކި މުއްދަތަކަށް ރައްޔިތުން ޙަވާލުކުރާ ހަވާލްދާރެއް ކަމާއި، ވަކީލެއް ކަމާއި، ޚާދިމެއްކަން ފާހަގަކުރައްވައި ރައީސް މުޢިއްޒު ވިދާޅުވީ، ވެރިޔަކު ރައްޔިތުންގެ މައްޗަށް އަމިއްލަ ނަފްސު އުފުލައި، ހައިބަތާއި ޖާހު ދައްކައި، ރައްޔިތުން ނިކަމެތިކޮށް އަޅުދާސްކުރުމަކީ ކުރަން ހެޔޮވާވަރުގެ ކަމެއް ނޫންކަމަށެވެ.

މި ސަރުކާރުގެ ޢަމަލުތައް ބައްޓަންކުރެވިފައިވަނީ ރައްޔިތުންގެ އަޑު އަހައިގެން، ރައްޔިތުންނަށްޓަކައިކަން ރައީސް ފާހަގަކުރެއްވި އެވެ.

އެމަނިކުފާން ވިދާޅުވީ މިހާރު ވަނީ ސިޔާސީ ވާދަވެރިން ދުރަށްލައި އެއްފަރާތްކުރި ޒަމާން ނިމިފައިކަމަށާއި، ކޮމިޝަންތައް ނުހައްދަވާނެ ކަމަށާއި، މައްސަލަތައް ބައްލަވާނީ ޤާއިމުކުރެވިފައިވާ ނިޒާމްތަކުގެ ތެރެއިންކަމަށެވެ.

ރައީސް މުޢިއްޒު އިތުރަށް ވިދާޅުވީ، ވޭތުވެދިޔަ 51 ހަފުތާ އާއި ދެ ދުވަހު މަސައްކަތްޕުޅު ކުރައްވާފައިވާނީ ރައްޔިތުންގެ ފަޅީގައި ހުންނަވައިގެންކަމަށާއި، އެމަނިކުފާނު ކުރައްވާ ކަމެއް ކުރައްވަނީ ވެސް އަދި ބޭނުންފުޅުވަނީ ވެސް، ރައްޔިތުންގެ ފަޅީގައި ހުންނަވައިގެން ކުރައްވާ ހެޔޮ ވެރިކަމެއްގެ ގޮތުގައި ކަމަށެވެ.