މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އިން އިންތިޒާމްކޮށްގެން މި ފަހަރު ބޭއްވީ މައިލޯ ތުރީ އޮން ތުރީ ރަމަޟާން ޗެލެންޖުގެ ސީނިއާ ބައިގެ ޗެމްޕިއަންކަން ދަ ގްރާންޑޭ ސްޕޯޓްސް ކުލަބާއި، ކުއީންސް ބާސްކެޓްބޯލް ކުލަބުން ހޯދައިފިއެވެ.

ސީނިއާ ކެޓަގަރީގެ ފިރިހެން ޑިވިޝަނުގެ ފައިނަލުގައި ދަ ގްރާންޑޭ ވަނީ 21-12 އިން މާންސް ބަލިކޮށްފައެވެ. އަންހެން ޑިވިޝަނުގެ ޗެމްޕިއަންކަން ކުއީންސް ހޯދީ ފައިނަލުގައި 10-08 އިން އެމްޕްރެސް ބަލިކޮށްގެންނެވެ.

މި އަހަރުގެ ތުރީ އޮން ތުރީ މުބާރާތް ކުރިއަށްދިޔައީ ފަސް އުމުރުފުރައަކަށް ބަހާލައިގެންނެވެ. އެއީ 12 އަހަރުން ދަށް، 14 އަހަރުން ދަށް، 16 އަހަރުން ދަށް އަދި 18 އަހަރުން ދަށާއި އަދި ސީނިއާ ކެޓަގަރީއެވެ.

މުބާރާތުގެ ހުރިހާ އިވެންޓެއްގެ ފައިނަލު މެޗުތައް ނިމުމުން ވަނަތަކަށް ހޮވުނު ފަރާތްތަކަށް އިނާމާއި މެޑެލް ދީފައިވަނީ ޝަރަފުވެރި މެހެމާން، ކުޅިވަރާއި ހަށިހެޔޮކަމާބެހޭ ވަޒީރު، އަބްދުﷲ ރާފިޢު އެވެ.

މި މުބާރާތުގެ 12 އަހަރުން ދަށުގެ ޗެމްޕިއަންކަން ހޯދީ ބަގްސް ބަނީ އާއި ވޯރިއާސް އެވެ. ސާދަ އަހަރުން ދަށުގެ ޗެމްޕިއަންކަން، ބްލޫމް ސްކޮޑާއި ވެނޮމް ހޯދިއިރު، 16 އަހަރުން ދަށުގެ ޗެމްޕިއަންކަން ހޯދީ، ޓޮރޮންޓޯ އާއި އާޖީލަކަށް ޓީމުންނެވެ. އަދި، 18 އަހަރުން ދަށުގެ ޗެމްޕިއަންކަން ހޯދީ އާޖީލަކަށާއި ރަމަޟާން ކަރީމް ޓީމުންނެވެ.