ފިލިޕީންސްގައި މަސްތުވާތަކެއްޗާ ދެކޮޅަށް ސަލާމަތީ ބާރުތަކުން އޭރު ކުރިއަށް ގެންދިޔަ އޮޕަރޭޝަންތަކުގައި ހިންގި ލާއިންސާނީ ބޮޑެތި ޖަރީމާތަކާ ގުޅިގެން، އޭރު ރައީސް ކަމުގައި ހުންނެވި ރޮޑްރީގޯ ޑުޓަރޓޭ ފުލުހުން ހައްޔަރުކޮށް، އިންޓަރނޭޝަނަލް ކްރިމިނަލް ކޯޓް (އައިސީސީ)އަށް ހާޒިރުކުރަން، ފުރުވާލައިފިއެވެ.

ފިލިޕީންސްގެ ފުލުހުން ޑުޓަރޓޭ ހައްޔަރުކޮށްފައިވަނީ، އޭރު ހިންގި ލާއިންސާނީ ޖަރީމާތަކާ ގުޅިގެން އައިސީސީ އިން ނެރެފައިވާ ހައްޔަރުކުރުމުގެ އަމުރު ތަންފީޒު ކުރުމަށެވެ.

އުމުރުފުޅުން 79 އަހަރުގެ ޑުޓަރޓޭއަށް އައިސީސީން ކުރަނީ ލާއިންސާނީ ޖަރީމާ ހިންގުމާއި މީހުން މެރުމުގެ ދަޢުވާއެވެ.

ފިލިޕީންސް ފުލުހުން ޑުޓަރޓޭ މަނީލާ އެއަރޕޯޓުން އިއްޔެގެ ވަގުތެއްގައި ހައްޔަރުކޮށް، ނެދަރލަންޑްސްގައި ހުންނަ އައިސީސީއަށް ހާޒިރުކުރަން މިހާރު ވަނީ ފުރުވާލައިފައެވެ.

ފިލިޕީންސްގެ ނައިބު ރައީސްގެ މަޤާމުގައި ހުންނެވި، ޑުޓަރޓޭގެ ދަރިކަނބަލުން ސާރާ ޑުޓަރޓޭ ނެރުއްވި ބަޔާނެއްގައި ވިދާޅުވީ، ޤާނޫނާ ޚިލާފަށް ބައްޕާފުޅު ކަމާބެހޭ އިދާރާތަކުން "ރަހީނުކޮށްފައިވާ" ކަމަށެވެ.

ޑުޓަރޓޭ ފުރުވާލުން ހުއްޓުވަން، ވަކީލުން ސުޕްރީމް ކޯޓަށް މައްސަލައެއް ވެސް ހުށަހެޅިއެވެ.

ޑުޓަރޓޭ އިސްކޮށް ހުންނަވައި މަސްތުވާތަކެއްޗާ ދެކޮޅަށް އެ ޤައުމުގެ ސަލާމަތީ ބާރުތަކުން ހިންގި އޮޕަރޭޝަންތަކުގައި އެތައް ހާސް މީހުން ވަނީ މަރުވެފައެވެ. އޭގެތެރޭގައި މަސްތުވާތަކެއްޗާ އެއްވެސް ގުޅުމެއް ނެތް މީހުން ހިމެނޭކަމުގެ ތުހުމަތުތައް ވަނީ އަމާޒުވެފައެވެ.