ENGLISH
04 އޭޕްރީލު 2025
މި އަހަރުގެ ސާފް ޗެމްޕިއަންޝިޕް ލަންކާގައި ބާއްވަން ނިންމައިފި
11 މާރިޗު 2025
|
މީގެކުރީން ސާފް ޗެމްޕިއަންޝިޕްގައި ރާއްޖެ ކުޅުނު މެޗެއްގެ ތެރެއިން. --ފޮޓޯ: މިހާރު
އެންމެ މަޤްބޫލު
މިއަހަރުގެ ސާފް ޗެމްޕިއަންޝިޕް ސްރީ ލަންކާގައި ބާއްވަން ނިންމައިފިއެވެ.
ދެކުނު އޭޝިއާގެ ގައުމުތަކުގެ މެދުގައި ކުޅޭ އެންމެ ވާދަވެރި ފުޓްބޯޅަ މުބާރާތް އަވަށްޓެރި ސްރީ ލަންކާގައި ބޭއްވުމަށް ނިންމީ މިއަދު ބޭއްވި ސާފްގެ އެކްސްކޯ ބައްދަލުވުމުގައެވެ.
މިގޮތަށް ނިންމާފައިވަނީ، ސްރީ ލަންކާގެ ފުޓްބޯޅަ ފެޑެރޭޝަނުގެ ރައީސް، ޖަސްވަރު އުމަރުގެ އެދިވަޑައިގަތުމުގެ މަތީން ސާފްގެ މެންބަރު ގައުމުތަކުން އެއްބަސްވެގެންނެވެ.
ސަތާރަ އަހަރަށްފަހު ސްރީ ލަންކާގައި ސާފް ޗެމްޕިއަންޝިޕް ބޭއްވުމަށް ހަމަޖެހިފައިވާއިރު، މި ފަހަރުގެ މުބާރާތް ކުރިއަށްދާނީ އަންނަ ޖޫން މަހުގެ 22 އިން ޖުލައި މަހުގެ 5 އަށެވެ.
އެންމެ ފަހުން ސްރީ ލަންކާގައި ސާފް ޗެމްޕިއަންޝިޕް ބޭއްވީ 2008 ވަނަ އަހަރު އެވެ. ލަންކާގެ އިތުރުން އެ ފަހަރުގެ މުބާރާތް ހޯސްޓްކުރީ ރާއްޖެއިންނެވެ. އެ ފަހަރު ރާއްޖޭން ވަނީ ފައިނަލުގައި އިންޑިއާ ބަލިކޮށް ތަށި އުފުލާލައިފައެވެ.
ލަންކާ އިން މި މުބާރާތް ކާމިޔާބުކޮށްފައިވަނީ މީގެ 30 އަހަރު ކުރީން ފައިނަލުގައި އިންޑިއާ ބަލިކޮށްގެންނެވެ.
ލަންކާގެ ފުޓްބޯޅަ ފެޑެރޭޝަނުން ގަބޫލުކުރާ ގޮތުގައި މި އަހަރުގެ ސާފް ޗެމްޕިއަންޝިޕް ބޭއްވުމުގެ ފުރުޞަތު އެ ގައުމަށް ލިބިގެންދިއުމަކީ ތާރީޚީ ވަގުތުކޮޅެކެވެ.
އެއީ، އެންމެ ފަހުގެ މުބާރާތުގައި ސަސްޕެންޝަނުގެ ސަބަބުން ލަންކާ އަށް ބައިވެރިނުވެވުމުންނެވެ. ދެހާސް ތޭވީސް ވަނަ އަހަރު ބެންގަލޫރުގައި ކުޅުނު ފައިނަލުގައި އިންޑިއާ އިން ވަނީ ޕެނަލްޓީ ޖަހައިގެން ކުވެއިތު ބަލިކޮށްފައެވެ.