ޔުއެފާ ޗެމްޕިއަންސް ލީގުގެ ގަދަ 16 ގެ ބުރުގައި މިރޭ އަމިއްލަ ދަނޑުގައި ޕީއެސްޖީއާ ދެކޮޅަށް ނުކުންނައިރު، އެ ޓީމަށް ވުރެ ފުރިހަމަ ގޭމެއް ކުޅޭ އެހެން ޓީމަކާ މި ސީޒަނުގައި ލިވަޕޫލުން ކުރިމަތިލާފައިނުވާ ކަމަށް ކޯޗު، އާނޭ ސްލޮޓް ބުނެފިއެވެ.

ސްލޮޓް މިހެން ބުނީ، ޕީއެސްޖީއާ ދެކޮޅަށް މިރޭ ކުޅުމަށް ހަމަޖެހިފައިވާ މެޗުގެ ކުރީން ބޭއްވި ނޫސްވެރިންގެ ބައްދަލުވުމުގައެވެ.

މީގެ ހަފްތާއެއްހާ ދުވަސް ކުރީން، ޕީއެސްޖީގެ ދަނޑުގައި މި ދެ ޓީމު ބައްދަލުކުރި މެޗުން ލިވަޕޫލް 0-1 އިން މޮޅުވިނަމަވެސް، ސްލޮޓް ބުނީ، އެ މެޗުގައި ހުރިހާ ގޮތަކުންވެސް މޮޅަށް ކުޅެފައިވަނީ ޕީއެސްޖީ ކަމަށެވެ.

"އެމީހުންނަކީ އެހާ ފުރިހަމަ، ވަރަށް ރަނގަޅަށް ކޯޗުކޮށްދޭ ޓީމެއް. އެ ހުރިހާ ކަމެއް މިދިޔަ ހަފްތާގައި އަހަރެމެން ތަޖުރިބާކޮށްފީމު." ސްލޮޓް ބުންޏެވެ.

ސްލޮޓް ވަނީ، ބައެއް މީހުން ގަބޫލުކުރާގޮތުގައި އެ ދުވަހު ލިވަޕޫލްގެ ފަރާތުން ފެނުނީ ދަށް ކުޅުމެއްގެ ގޮތުގައި ސިފަކުރި ނަމަވެސް އެކަމާ އޭނާ އެއްބަސްނުވާ ކަމަށް ބުނެފައެވެ.

އޭނާ ބުނީ، މި ސީޒަނުގައި ލިވަޕޫލުން މިހާތަނަށް ކުރިމަތިލާފައިވާ އެހެން އެއްވެސް ޓީމެއްގެ ކިބައިގައި ނެތް ގިނަ ކޮލިޓީތަކެއް ޕީއެސްޖީގެ ކިބައިގައި އެބަހުރި ކަމަށެވެ.

އަދި، އެ މެޗުގައި ޕީއެސްޖީގެ ފަރާތުން ފެނުނު ކުޅުމާ މެދު ހައިރާންނުވާ ކަމަށާއި، ލިވަޕޫލަށް އުނދަގޫތައް ކުރިމަތިވީ ދަށްކޮށް ކުޅެވިގެން ނޫން ކަމަށް ވެސް ސްލޮޓް ބުންޏެވެ. އެއީ، އެ ދުވަހު ޕީއެސްޖީގެ ފަރާތުން ތަފާތު މޮޅު ޕާފޯމަންސެއް ފެނުމުން ކަމަށް ސްލޮޓް ފާހަގަކުރިއެވެ.

"އެމީހުންގެ ޕާފޯމަންސާ މެދު އަހަރެން ހައިރާން ނުވޭ، ވަރަށް ހިތްހަމަޖެހޭ ފަދަ ކުޅުމެއް ޕީއެސްޖީ ކުޅުނީ." ސްލޮޓް ބުންޏެވެ.

ސްލޮޓް ބުނީ، އެ މެޗަށް ނިކުތުމުގެ ކުރީން ވެސް ޕީއެސްޖީގެ އެކި މެޗުތައް އޭނާ ބަލާފައިވާ ކަމަށާއި، އެ މީހުންގެ ކުޅުމުގެ ވައްޓަފާޅީގައި ހުރިހާ ކަމެއްވެސް ވަރަށް ފުރިހަމަ ކަމަށެވެ.

އެހެންކަމުން، މިރޭގެ މެޗުގައި އެންފީލްޑްގައި ދެ ޓީމު ބައްދަލުކުރުމަށް ހަމަޖެހިފައިވާއިރު، ލިވަޕޫލުން ކުރީ މެޗަށް ވުރެ ރަނގަޅު ކުޅުމެއް ދައްކަންޖެހޭނެ ކަމަށް ގަބޫލުކުރާ ކަމަށް ސްލޮޓް ވަނީ ބުނެފައެވެ.

"އަހަރެމެންނަށް އިތުރަށް ރަނގަޅުކުރެވޭނެ ކަމަށް ދެކެން." ސްލޮޓް ބުންޏެވެ.

ސްލޮޓް ބުނީ، މިރޭގެ މެޗަށް ނިކުންނަ ލިވަޕޫލަކީ ކުރީ ހަފްތާގައި ޕީއެސްޖީއާ ދެކޮޅަށް ކުޅުނު ޓީމަށް ވުރެ ވަރުގަދަ ޓީމެއް ކަމަށެވެ. އެއީ، އޭނާގެ ޓީމުގެ ސަޕޯޓަރުންގެ ކުރިމަތީގައި ކުޅެން ޖެހިފައިވާތީ ކަމަށް ސްލޮޓް ފާހަގަކުރިއެވެ.

ފުރަތަމަ ލެގުގައި މޮޅުވެފައި އޮތް ނަމަވެސް މިރޭގެ މެޗަށް ކުރިމަތިލާއިރު އެޕްރޯޗަށް ބަދަލެއް ނާންނާނެ ކަމަށް ސްލޮޓް ބުންޏެވެ. އަދި، ޕީއެސްޖީއާ ދެކޮޅަށް ނިކުތުމަށް ހަމަޖެހިފައިވާ މިރޭގެ މެޗަކީ މީގެކުރީން ސްލޮޓް ބުނެފައިވާ ގޮތުން މި ހަފްތާގެ ތެރޭގައި އޭނާގެ ޓީމުން ކުރިމަތިލާ 'ތިން ފައިނަލް' ގެ ތެރެއިން ދެވަނަ މެޗެވެ.

އޭގެތެރެއިން ފުރަތަމަ ފައިނަލުގައި މި ހަފްތާ ބަންދުގައި ސައުތެމްޓަން އަތުން ވަނީ މޮޅުވެފައެވެ. އަދި، މިރޭގެ މެޗަށްފަހު ދެން ކުރިއަށް އޮތީ ނިއުކާސަލް ޔުނައިޓެޑާ ދެކޮޅަށް ކުޅުމަށް ހަމަޖެހިފައިވާ އިނގިރޭސި ލީގު ކަޕް ފައިނަލެވެ.

ސްލޮޓް ނިންމާލަމުން ބުނީ، އޭނާގެ ޓީމުން ކޮންމެ ހަފްތާއަކުވެސް ކުރާ މަސައްކަތަކީ ކުރިމަތިލާ މެޗެއް ކާމިޔާބުކުރުން ކަމަށެވެ. ޕީއެސްޖީއާ ދެކޮޅަށް ކުޅުނު ކުރީ މެޗާ މުޅިން ތަފާތު މެޗެއް ކުޅެން ބޭނުންވާ ކަމަށާއި، އެއްވަރުކޮށްލައިގެން ހިތްހަމަނުޖެހޭނެ ކަމަށް ސްލޮޓް ބުނެފައިވެއެވެ.

"އަހަރެމެން ބޭނުމީ ކޮންމެ މެޗަކުން މޮޅުވާން. ވީ އެންމެ ގިނަވަގުތު ބޯޅަ ގެންގުޅެން." ސްލޮޓް ބުންޏެވެ.