ޔުއެފާ ޗެމްޕިއަންސް ލީގުގެ ގަދަ 16 ގެ ބުރުގައި މިރޭ އިންޓަރ މިލާން ފަހަތަށް ޖައްސާލުމަށްފަހު އަނެއް ބުރަށް ދިއުމަށް އުއްމީދުކުރާ ކަމަށް ފެޔަނޫޑުގެ އައު ކޯޗު، ރޮބިން ވެން ޕާސީ ބުނެފިއެވެ.

މުބާރާތުގެ ގަދަ 16 ގެ ބުރުގައި އިންޓަރއާ ދެކޮޅަށް މިދިޔަ ހަފްތާގައި އަމިއްލަ ދަނޑުގައި ކުޅުނު މެޗުން 2-0 އިން ފެޔަނޫޑު ވަނީ ބަލިވެފައެވެ.

"ކުޅިވަރުގައި އޮތް އެންމެ ރީތި ކަމަކީ ކިތަންމެ ކުޑަ ފުރުޞަތެއް އޮތް ނަމަވެސް، އަބަދުވެސް އުއްމީދު އޮތުން." މިރޭގެ މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ވެން ޕާސީ ބުންޏެވެ.

ކުރީގެ އިތުބާރު ފޯވާޑް، ވެން ޕާސީ ފެޔަނޫޑްގެ ކޯޗުގެ މަގާމާ ހަވާލުވިފަހުން ކުޅެފައިވަނީ އެންމެ ދެ މެޗެވެ. އޭގެތެރެއިން އެއް މެޗަކީ އިންޓަރ އަތުން މިދިޔަ ހަފްތާގައި ބަލިވި މެޗެވެ.

ވެން ޕާސީ ބުނީ، އޭނާގެ ޓީމުން ބޭނުންވަނީ އެންމެންނަށް ހައިރާންކަން ގެނުވައި މިރޭގެ މެޗު ކާމިޔާބުކޮށް، އަނެއް ބުރަށް ދަތުރުކުރުން ކަމަށެވެ.

ގިނަ ބަޔަކު ދެކޭގޮތުގައި ފެޔަނޫޑަށް އަނެއް ބުރަށް ދިއުމުގެ އެއްވެސް ފުރުޞަތެއް ނެތް ކަމަށާއި، އެކަމަކު އޭނާ އެ ގޮތަށް ނުދެކޭ ކަމަށް ވެން ޕާސީ ބުނެއެވެ.

"ވަރަށް ވަރުގަދަ އިންޓަރ ޓީމެއް ބަލިކޮށް، އަނެއް ބުރަށް އަހަރެމެންނަށް ދެވިދާނެ. އެކަމަކު، އެއީ އަހަރެމެންގެ އެންމެ މޮޅު ކުޅުން ދައްކައިގެން." ވެން ޕާސީ ބުންޏެވެ.

ވެން ޕާސީ އިތުރަށް ބުނީ، މިރޭގެ މެޗުގެ ކުރީން ޓީމުގެ ހުރިހާ ކުޅުންތެރިންނަށް ދޭން ބޭނުންވާ މެސެޖަކީ، އަމިއްލަ ނަފުސާމެދު އިތުބާރުކޮށް، އެކަކު އަނެކަކުވެސް އެކަން ކުރެވިދާނެ ކަމަށް ގަބޫލުކުރުން ކަމަށެވެ.

އޭނާގެ ޓީމުން އެ ޗެލެންޖާ ކުރިމަތިލާނެ ކަމަށް ވެސް ވެން ޕާސީ ބުނެފައިވެއެވެ. އަދި، ވަކި ގޮތަކަށް ނަތީޖާ ނިކުމެދާނެ ކަމުގެ ވާހަކަތައް ދެއްކުމުގެ ބޭނުމެއް ނެތް ކަމަށް ވެސް ވެން ޕާސީގެ ވާހަކައިގައި ފާހަގަކުރިއެވެ.

އެހެންނަމަވެސް، މިރޭގެ މެޗަށް ނިކުންނައިރު ފެޔަނޫޑުގެ ފޯވާޑުލައިންގައި ހިމެނޭ އެންމެ މުހިއްމު އެއް ކުޅުންތެރިޔާ ކަމަށްވާ، ބްރެޒިލްގެ ފޯވާޑް، އިގޯ ޕައިޒާއޯ އަށް އަނިޔާވެ ނުކުޅެވޭތީވެ އެއީ ލިބުނު ފޫނުބެއްދޭނެ ވަރުގެ ގެއްލުމެއްގެ ގޮތުގައި ވެން ޕާސީ ސިފަކޮށްފައިވެއެވެ.