މެންޗެސްޓަރ ޔުނައިޓެޑްގައި ގިނަ އަދަދަކަށް އެންމެ އެކަށީގެންވާ ފެންވަރަށް ވުރެ ދަށް ކުޅުންތެރިން އެބަތިބި ކަމަށާއި، އޭގެތެރެއިން ބައެއް ކުޅުންތެރިންނަށް "މާބޮޑު މުސާރަ" އެއް ދެމުންގެންދާ ކަމަށް އެ ކުލަބުގެ އެއް ހިއްސާދާރު ކަމަށްވާ، ސަރ ޖިމް ރެޓްކްލިފް ބުނެފިއެވެ.

ރެޓްކްލިފް މިހެން ބުނެފައިމިވަނީ، ފަހަކަށް އައިސް ޔުނައިޓެޑުން ދަށް ނަތީޖާތަކެއް ނެރުމުން އަންނަ މިހާރުގެ ކޯޗު، ރުބެން އަމޯރިމް އަށް ގިނަ ގޮންޖެހުންތަކެއް ކުރިމަތިވެފައިވާ ދަނޑިވަޅެއްގައެވެ.

"ބައެއް ކުޅުންތެރިންނަކީ އެކަށީގެންވާ ވަރުގެ ރަނގަޅު ފެންވަރުގެ ކުޅުންތެރިންނެއް ނޫން. މީގެތެރެއިން ބައެއް ކުޅުންތެރިންނަށް ބޮޑު މުސާރަ އެބަދެމުންގެންދޭ،" ރެޓްކްލިފް ބުންޏެވެ.

މިހެން މިކަން އޮތް ނަމަވެސް، ކުލަބުން އެންމެ ބޭނުންވާ ފެންވަރުގެ ރަނގަޅު ސްކޮޑު އެކުލަވާލުމަށް ވަގުތު ބޭނުންވާނެ ކަމަށާއި، އަދި އެކަމުގެ ފުރިހަމަ ޒިންމާ ނަގަންޖެހޭނެ ކަމަށް ވެސް ރެޓްކްލިފް ބުނެފައިވެއެވެ.

މިދިޔަ ނޮވެންބަރު މަހު އޭރުގެ ކޯޗު، އެރިކް ޓެން ހާގް މަގާމުން ދުރުކުރުމަށްފަހު ގެނައި އަމޯރިމް އަށް ޔުނައިޓެޑާއެކު އެންމެ އެކަށީގެންވާ ފެންވަރު ނުދެއްކޭއިރު، ދެރަ ނަތީޖާތަކެއް ނެރެމުންދިއުމުގެ ސަބަބުން މިވަގުތު އުޅެނީ ލީގުގެ 14 ވަނައިގައެވެ. އަދި، އަމޯރިމްގެ އިރުޝާދުގެ ދަށުން ލީގުގައި ޔުނައިޓެޑް ކުޅުނު 17 މެޗުގެ ތެރެއިން ފަސް މެޗުން ބަލިވެފައިވާއިރު، ޑޮމެސްޓިކް ހުރިހާ މުބާރާތަކުން ވަނީ ކަޓައިފައެވެ.

މި ހުރިހާ ސަބަބުތަކާ ހުރެ މި ހަފްތާގެ އާދީއްތަ ދުވަހު ލީގުގައި އާސެނަލްއާ ދެކޮޅަށް ޔުނައިޓެޑް ކުޅުނު މެޗުގެ ކުރިން، އެ ޓީމުގެ އެތަކެއް ހާސް ސަޕޯޓަރުންނެއް ވަނީ ކުލަބުގެ ވެރިންނާ ދެކޮޅަށް އިހުތިޖާޖުކޮށްފައެވެ.

މިކަމާ ގުޅޭގޮތުން ރެޓްކްލިފް ބުނީ، ކުޑައިރުއްސުރެ އެންމެ ސަޕޯޓުކުރަމުންއައި ކުލަބުގެ 25 އިންސައްތަ ހިއްސާ ގަތްއިރު ވެސް ހާލަތު އޮތީ ގޯސްކޮށް ކަމަށެވެ. އޭރުވެސް ގިނަ ގޯސްތަކެއް ހަދާފައިވާ ކަމަށާއި، ޚާއްސަކޮށް ކުޅުންތެރިން ގެނައުމުގެ ވަކި މިންގަނޑެއް ނެތް ކަމަށް ރެޓްކްލިފް ބުންޏެވެ.

ޔުނައިޓެޑުން އެންތަނީ، ކަސެމީރޯ އާއި އޮނާނާގެ އިތުރުން ހޮއިލުންޑް އަދި ސަންޗޯ ވެސް ގެނައީ ކަމަށާއި، މި ކުޅުންތެރިންނަކީ ކޮންމެހެން ޓީމަށް ބޭނުންވާ ކުޅުންތެރިން ކަމުގައި ވިޔަސް އަދި ނުވިޔަސް އެންމެ ކުރީއްސުރެ ވާރުތަވަމުންއައިސްފައިވާ ގޮތަށް އެހެން ކަންކަން ކުރަމުންއައީ ކަމަށް ވެސް ރެޓްކްލިފް ބުނެފައިވެއެވެ. އަދި، މިއީ މިހާރުއްސުރެ ރަނގަޅުކުރަންޖެހޭ ކަންތައްތައް ކަމަށް ރެޓްކްލިފް ބުންޏެވެ.

މީގެއިތުރުން، ރެޓްކްލިފްގެ ވާހަކައިގައި ވަނީ، ޔުނައިޓެޑްގެ މިހާރުގެ ކޯޗު، އަމޯރިމް އަށް ހަމްދަރުދީވެ، އޭނާ އަށް ތައުރީފުކޮށްފައެވެ. ރެޓްކްލިފް ބުނީ، ކުރިން ޕޯޗުގަލްގެ ސްޕޯޓިންގ ލިޒްބަން އަށް ކޯޗުކޮށްދިން އަމޯރިމް އަކީ ފާހަގަކޮށްލެވޭ ޒުވާން ކޯޗެއް ކަމަށެވެ.

"އަމޯރިމް އަތުގައި އޮތް ސްކޮޑަށް ބަލާއިރު، އެ ކުރަމުންދާ މަސައްކަތަށް ތައުރީފު ހައްގު،" ރެޓްކްލިފް ބުންޏެވެ.

ރެޓްކްލިފް ބުނީ، ޔުނައިޓެޑްގައި ގިނަ އަހަރުތަކެއް ވަންދެން އަމޯރިމް ހުންނާނެ ކަމަށެވެ. އަދި، މިހާރު އަމޯރިމްގެ ކިބައިން އެ ފެންނަނީ ކުރިއަށް އޮތް ތާނގާއި ޔުނައިޓެޑާއެކު ރަނގަޅު މިސްރާބަކަށް ދެވިދާނެ ކަމުގެ ނިޝާންތައް ކަމަށާއި، ކުރިން ދުވަހު އާސެނަލްއާ ދެކޮޅަށް ކުޅުނު މެޗަކީ އެފަދަ މިސާލެއް ކަމަށް ވެސް ރެޓްކްލިފް ބުންޏެވެ.

ޔުނައިޓެޑަށް މާލީގޮތުން މިހާރު ކުރިމަތިވެފައިވާ ގޮންޖެހުންތަކުން އަރައިގަތުމުގެ ސަބަބުން ޒުވާން ކުޅުންތެރިން ކަމަށްވާ، ކޮބީ މެއިނޫ އާއި އަލެހަންދްރޯ ގާނާޗޯ ފަދަ ކުޅުންތެރިން ވިއްކުމާ އޭނާ ދެކޮޅު ކަމަށް ރެޓްކްލިފްގެ ވާހަކައިގައި ފާހަގަކުރިއެވެ.

އަދި، މިދިޔަ ދުވަސްތަކުގައި އުނދަގޫ ނިންމުންތަކެއް ނިންމާފައިވާ ކަމަށާއި، އޭގެތެރޭގައި ޔުނައިޓެޑްގެ ވަޒީފާއިން ގިނަ ބަޔަކު ވަކިކޮށްފައިވާއިރު، އެހެން އެގޮތަށް ނުނިންމިނަމަ މި އަހަރު ނިމެންވާއިރަށް އެ ކުލަބު އޮތީ ބަނގުރޫޓުވާ ހިސާބުގައި ކަމަށް ވެސް ރެޓްކްލިފް ބުންޏެވެ.